ރައީސް ނަޝީދަށް ހުކުމް ކުރުމަށްފަހު ހިނގާ ހުރިހާ ކަމެއްގެ ޒިންމާ އުފުލަން ޖެހޭނީ ރައީސް ޔާމީން- ޝިފާޒު

ރާއްޖޭގެ ކުރީގެ ރައީސުލްޖުމްހޫރިއްޔާ އަދި އެމްޑީޕީގެ ރައީސް މުޙައްމަދު ނަޝީދަށް ހުކުމެއް ކޮށްގެން ގައުމުގައި ހިނގާ ހުރިހާ ކަމެއްގެ ޒިންމާ އުފުއްލަވަން ޖެހިވަޑައި ގަންނަވާނީ ރައީސް ޢަބްދުﷲ ޔާމީން ޢަބްދުލް ޤައްޔޫމަށް ކަމަށް އެމްޑީޕީގެ ނާއިބު ރައީސް މުޙައްމަދު ޝިފާޒު ވިދާޅު ވެއްޖެއެވެ.

ޝިފާޒު މިހެން ވިދާޅުވީ ކްރިމިނަލް ކޯޓުގެ އިސްގާޒީ ޢަބްދުﷲ މުޙައްމަދު (ޢަބްދުﷲ ގާޒީ) ހައްޔަރުކުރި މައްސަލާގައި ރައީސް ނަޝީދުގެ މައްޗަށް ޓެރަރިޒަމްގެ ދަޢުވާ ދައުލަތުން އުފުލައި އެމަނިކުފާނުގެ ޝަރީޢަތް ވަރަށް ބާރަށް ކުރިއަށްދާ ދަނޑިވަޅެއްގައެވެ.

އޭނާ ވިދާޅުވީ ރައީސް ނަޝީދަކީ ރާއްޖޭގެ ވެރިކަން ކުރައްވާފައިވާ ބޭފުޅެއް ކަމަށެވެ. އެމަނިކުފާނަކީ އެންމެ ބޮޑު ސިޔާސީ ޕާޓީގެ ރައީސް ކަމަށެވެ. އެމަނިކުފާނަކީ އެތައް ބައެއްގެ ބަގުބޫލުކަން ރާއްޖެއިންނާއި ބޭރުން ހޯއްދަވައިފައިވާ ބޭފުޅެއް ކަމަށްވެސް ވިދާޅުވިއެވެ.

ޝިފާޒު ވިދާޅުވީ ކްރިމިނަލް ކޯޓުގައި ރައީސް ނަޝީދުގެ މައްޗަށް އުފުލާފައިވާ ދަޢުވާގެ ޝަރީޢަތަކީ އިންސާފުވެރި ޝަރީޢަތެއް ކަމަށް ޤަބޫލު ނުކުރައްވާ ކަމަށެވެ. އެހެން ކަމުން ރައީސް ނަޝީދާމެދު އިންސާފުވެރި ހުކުމެއް އަންނާނެ ކަމަށް ގަބޫލު ނުކުރާ އެތައް ބަޔަކު އެބަތިބި ކަމަށްވެސް ވިދާޅުވިއެވެ.

ބޭއިންސާފުން ޝާރީޢަތް ހިންގައި ބޭއިންސާފުން ނަޝީދަށް ހުކުމް އިއްވުމުން އެމަނިކުފާނަށް ތާއިދުކުރާ މީހުންގެ ހިތްހަމަ ނުޖެހުންތަކެއް ހުންނާނެ ކަމަށް ގަބޫލު ކުރައްވާ ކަމަށް ޝިފާޒު ވިދާޅުވިއެވެ. އެފަދަ ހިތްހަމަ ނުޖެހުމެއްގެ ތެރޭގައި ގައުމުގައި ކޮންމެފަދަ ކަމެއްވެސް ހިނގުމުގެ ފުރުސަތު އޮވެދާނެ ކަމަށް ގަބޫލު ކުރައްވާ ކަމަށެވެސް ވިދާޅުވިއެވެ. އެފަދަ ކަމެއް ހިނގައިފިނަމަ އެކަމުގެ ފުރިހަމަ ޒިންމާ ނަންގަވަން ޖެހޭނީ ރައީސް ޔާމީން ކަމަށް ވިދާޅުވިއެވެ.

ޝިފާޒު އެގޮތަށް ވިދާޅުވީ ރައީސް ނަޝީދާ ދެކޮޅަށް ބޭއިންސާފުން ޙުކުމެއް ކޮށްފި ނަމަ އެކަމާ ދެކޮޅަށް ރާއްޖޭގައި ޚާއްސަ ޙަރަކާތްތަކެއް ހިންގަން އެމްޑީޕީން ރާވާފައިވަނީތޯ ދެންނެވުމުން ޝިފާޒު ވިދާޅުވީ "އެމްޑީޕީ ކަމެއް ކުރާވާހަކެއް ނޫން މިބުނީ. އެކަމަކު ރައީސް ނަޝީދުގެ ދެކެ ލޯބިވާ، އެތައް ބަޔަކު އެބައުޅޭ. މިހާރުވެސް އެމީހުން މަގުތަކަށް ނުކުމެ އެގޮވަނީ ނަޝީދު މިނިވަންކުރަން. އެފަދަ ދަނޑިވަޅެއްގައި ބޭއިންސާފުން ހުކުމެއް ކޮށްފިނަމަ ރައީސް ނަޝީދުގެ ސަޕޯޓަރުން އެކާމާ މިހާރަށްވުރެ ބޮޑަށް އިހުތިޖާޖު ކުރުމުގެ ފުރުސަތު އޮވެދާނެ. އެކަމާ ދެކޮޅު ހަރަކާތްތަކެއް ހިންގައިފާނެތީ އެވާހަކަ ފާހަގަކޮށްލީ،" ކަމަށެވެ.

ރައީސް ނަޝީދު ވިދާޅުވެފައިވާ ގޮތުގައި އެމަނިކުފާނާމެދު މިހާރު ކުރަމުންދާ ޝަރީޢަތަކީ ރާއްޖެ އިސްލާމްވި ފަހުން ރާއްޖޭގައި އެންމެ ބޭއިންސާފުން ކުރެވޭ ޝަރީޢަތެވެ. އެމަނިކުފާނަށް ވަކީލުންގެ އެހީތެރިކަންވެސް މިހާރު ނުލިބޭ ކަމަށް ވިދާޅުވެފައިވެއެވެ. ޝަރީޢަތުގެ އަޑުއެހުން ތަކުގައި އެމަނިކުފާނު އެދިވަޑައި ގަންނަވަނީ ވަކީލުން އައްޔަން ކުރަން ބޭނުންފުޅުވާ ކަމަށެވެ.

ރައީސް ނަޝީދު މިނިވަން ކުރުމަށްއެދި އެމްޑީޕީއާއި ޖޭޕީއާއި ރައީސް ނަޝީދުގެ ސަޕޯޓަރުން ގެންދަނީ ކޮންމެ ރެއަކުވެސް މުޒާހަރާ ކުރަމުންނެވެ. އެމަނިކުފާނު ދޫކޮށްލުމަށް ގޮވާލައި ދޫނިދުއާ ދިމާ ކަނޑުމަތީގައިވެސް ބަޔަކު އިއްޔެވަނީ ދޯންޏެއްގައި މުޒާހަރާ ކޮށްފައެވެ.

އެމުޒާހަރާގައި ބައިވެރިވި 5 ދޭސީންނާއި، 2 ބިދޭސީން ވަނީ ފުލުހުންގެ ބެލުމުގެ ދަށަށް ގެންގޮސްފައެވެ. އަދި ދޯނިވެސްވަނީ ފުލުހުންގެ ބެލުމުގެ ދަށުގައެވެ.