އަޅުގަނޑުގެ ޝަރީޢަތުގައި ޢަމަލުކުރަނީ ޚުދުމުޚުތާރު ކަމާއެކު-ރައީސް ނަޝީދު

ކްރިމިނަލް ކޯޓުގެ އިސްގާޒީ ހައްޔަރުކުރި މައްސަލައިގައި ދައުލަތުން ކުރީގެ ރައީސް މުޙައްމަދު ނަޝީދުގެ މައްޗަށް ކޮށްފައިވާ ޓެރަރިޒަމް ދަޢުވާގެ ޝަރީޢަތުގައި ފަނޑިޔާރުން ޢަމަލުކުރަމުން ގެންދަނީ ޚުދުމުޚުތާރުކޮށް ކަމަށް ނަޝީދު ރޭ ވިދާޅުވެއްޖެއެވެ.

ވަކީލުންނާ ނުލައި ރޭ ކުރިއަށް ގެންދިޔަ ޝަރީޢަތުގެ އަޑުއެހުމުގެ ރައީސް ނަޝީދު ވިދާޅުވެފައިވަނީ މިއީ ރާއްޖެއިސްލާވި ފަހުން ރާއްޖޭގައި ހިންގާފައިވާ އެންމެ ބޭއިންސާފު ޝަރީޢަތް ކަމަށެވެ.

އެމަނިކުފާނުގެ ވަކީލުންވަނީ ދިފާޢުގައި ދައްކާނެ ވާހަކަތަކަށް ތައްޔާރުވާން އެކަށީގެންވާ ވަގުތު ކޯޓުން ނުދެއްވާ ކަމަށް ބުނެ ރައީސް ނަޝީދުގެ މައްސަލަ ދޫކޮށްލާފައެވެ.

އެފަދަ ބޭއިންސާފު ޝަރީޢަތެއް "ހިންގުމުގައި ހުންނެވީ ރިޔާސަތުގައި އިންނެވި ތިޔަ އިއްޒަތްތެރި ފަނޑިޔާރު. މިކަމުގައި ދިވެހިން އިންސާފު ހޯދާނެ." ރައީސް ނަޝީދު ވިދާޅުވިއެވެ. އެމަނިކުފާނުގެ ޝަރީޢަތުގެ އިސް ފަނޑިޔާރަކީ ގާޒީ ޢަބްދުﷲ ދީދީއެވެ.

މިރޭގެ ޝަރީޢަތުގައި ނަޝީދު ވިދާޅުވީ އެމަނިކުފާނުގެ މައްސަލަ ބައްލަވާ ތިން ފަނޑިޔާރުން ގެންދަވަނީ ރާއްޖޭގެ ޤާނޫނު އަސާސީ ވީދާލަމުން ކަމަށެވެ. ނަމަވެސް ދިވެހި ރައްޔިތުން ނިކުމެ ތިން ފަނޑިޔާރުން ޖަވާބުދާރީ ކުރުވުމަށް ނަޝީދުވަނީ ރޭ ވަނީ ގޮވާލައްވާފައެވެ.

މިރޭގެ އަޑުއެހުމުގައިއޮތީ ރައީސް ނަޝީދާ ދެކޮޅަށް އޯޑިއޯ ވީޑިއޯ ހުށަހެޅުމެވެ. ދައުލަތުގެ ފަރާތުން އެ ހުށަހަޅައި ނިމުމުން އެއަށް ޖަވާބުދާރީވާން ރައީސް ނަޝީދަށް ފުރުސަތު ދެއްވިއެވެ. ނަމަވެސް އެމަނިކުފާނު ވިދާޅުވީ ބޭނުންފުޅުވަނީ ގާނޫނީ ވަކީލުންގެ އެހީތެރިކަން ކަމަށެވެ. އެމަނިކުފާނު އެހެން ވިދާޅުވުމުން ފަނޑިޔާރުންގެ ބެންޗުން ބުނެފައިވަނީ އެފުރުސަތު އެބައޮތް ކަމަށެވެ. ކުރިންވެސް އެފުރުސަތު ދީފައިވާނެ ކަމަށެވެ.

އެކަމަކުވެސް ނަޝީދު އެދިވަޑައިގަންނަވަމުން ގެންދެވީ ވަކީލެއްގެ އެހީތެރިކަމާ ނުލައި މައްސަލަ ކުރިއަށް ނުގެންދެވުމަށެވެ. އެކަމަކު ޝަރީއަތް ކުރިއަށް ގެންދިޔުމުގެ އިތުރަށް އެހެން ޖަވާބެއް ފަނޑިޔާރުން ނުދެއްވައެވެ.

މިރޭގެ އަޑުއެހުމުގައި ފަނޑިޔާރުން ނިންމާފައިވަނީ އަބްދުﷲ ގާޒީވެސް މާދަމާ ކޯޓަށް ހާޒިރުކޮށް ހެކިބަސް ނެގުމަށެވެ. އަދި ނަޝީދުގެ ފަރާތުން އިތުރަށް ހެކި ނުނެގުމަށްވެސް ނިންމެވިއެވެ. އެއީ ދައުލަތުން ހުށަހަޅާފައިވާ ހެކީގެ ސަބަބުން ނަޝީދުގެ ދިފާއީ ހެކި ނަފީކުރެވޭނެ ކަމަށް ގަބޫލު ކުރެވޭތީ ކަމަށްވެސް ފަނޑިޔާރުންވަނީ ވިދާޅުވެފައެވެ.