އެސްޓީއޯގެ އެމްޑީގެ މަގާމުން އާޒިމް ވަކިކޮށްފި
9 މާރޗް 2015 19:01
ސްޓޭޓް ޓްރޭޑިންގް އޮގަނައިޒޭޝަން (އެސްޓީއޯ)ގެ މެނޭޖިން ޑިރެކްޓަރ (އެމްޑީ) މަގާމުގައި ހުންނެވި އާދަމް އާޒިމް މިއަދު ވަކިކޮށްފިއެވެ.
އާޒިމް ވަކިކުރިއިރު ހުންނެވީ މާލެއިން ބޭރުގައެވެ. ނަމަވެސް ވަޒީފާއިން ވަކިކުރި ކަމުގެ އެސްއެމްއެސް ލިބިފައިވާ ކަމަށް އޭނާ ވަނީ މިޑީއާގައި ވިދާޅުވެފައެވެ. ނަމަވެސް ވަކިކުރި ކަމުގެ ލިޔުން ލިބިވަޑައިގެންފައި ނުވާ ކަމަށްވެސް ވިދާޅުވިއެވެ.
ރައީސް އޮފީހުންވެސްވަނީ އާޒިމް މަގާމުން ވަކިކުރިކަން ކަށަވަރުކޮށްދީފައެވެ. އާޒިމް ވަކިކުރެއްވުމަށްފަހު އެމަގާމަށް މިހާރު ހަމަޖައްސާފައިވަނީ އެސްޓީއޯގެ ޕްރޮކިއުމެންޓް ޑިޕާޓްމަންޓުގެ އިސްވެރިޔަކަށް ހުންނެވި އަހުމަދު ޝަހީރެވެ.
އާޒިމް ބުނެފައިވަނީ ބަނގުރޫޓުވެފައިވާ ކުންފުންޏެއް ނަގައި ކޮޅަށްޖެހުމުގެ ފުރުސަތު ރައްޔިތުން ދެއްވީތީ ރައްޔިތުންނަށް ޝުކުރުއަދާ ކުރާކަމަށެވެ. އެސްޓީއޯގެ އެމްޑީއަކަށް ހުންނެވިއިރު އޭނާއާއެކު މަސައްކަތްކުރި ޓީމަށްވެސް ޝުކުރު އަދާ ކުރައްވާ ކަމަށް ވިދާޅުވެފައިވެއެވެ.
އާޒިމް އެ މަގާމަށް ހަމަޖެއްސެވީ 2013 ވަނައަހަރުގެ ނޮވެމްބަރ މަހުގައެވެ.
ކިޔުންތެރިންގެ ހިޔާލު