މުޒާހަރާގެ ބައިވެރިން ބިޑިއަޅުވައިގެން ލޯންޗަށް އެރުވި މައްސަލަ ތަހުގީގު ކުރުމަށް އެދިއްޖެ

މިދިޔަ ބުރާސްފަތި ދުވަހު އިބްރާހިމް ނާސިރު އިންޓަނޭޝަނަލް އެއާޕޯޓުގައި މުޒާހަރާކުރި އެމްޑީޕީގެ އަންހެން އެކްޓިވިސްޓުން ބިޑިއަޅުވައިގެން ފުލުހުންގެ ލޯންޗަށް އެރުވި މައްސަލަ ތަހުގީގުކުރުމަށް އެމްޑީޕީން ޕޮލިސް އިންޓަ ގްރިޓީ ކޮމިޝަނުގައި އެދިއްޖެއެވެ.

އެމްޑީޕީން ބުނެފައިވަނީ އެޕާޓީގެ އެކްޓިވިސްޓުން ދޫނިދޫއަށް ގެންގޮސްފައިވަނީ ލައިފްޖެކެޓު ވެސް ނާޅުވައިކަމަށެވެ. އަދި ފުލުހުންގެ ލޯންޗުގައި މީހުން އުފުލުމަށް ހުއްދަ އޮތް މިންވަރަށްވުރެ އިތުރަށް މީހުން އުފުލާފައިވާކަމަށް ވެސް އެ ޕާޓީން ބުނެއެވެ. އެގޮތުން، ލޯންޗަކީ 18 މީހުންގެ ޖާގައިގެ އުޅަނދެއް ނަމަވެސް، އެ ލޯންޗުގައި ޖުމްލަ 21 މީހުން އެއްފަހަރާ ދަތުރުކޮށްފައިވާކަމަށް ވެސް އެމްޑީޕީން ބުނެއެވެ. 

އެއާޕޯޓުގައި މުޒާހަރާ ކޮށްފައިވަނީ އެމްޑީޕީއަށް ސަޕޯޓުކުރާ އަންހެނުން ތަކެކެވެ. އެމީހުން ގޮވަމުން ގެންދިޔައީ އެމްޑީޕީގެ ރައީސް އަދި ރާއްޖޭގެ ކުރީގެ ރައީސް މުޙައްމަދު ނަޝީދު ވަގުތުން މިނިވަން ކުރުމަށެވެ.

ކްރިމިނަލްކޯޓުގެ އިސްގާޒީ ބަންދުކުރި މައްސަލައިގެ ޝަރިޢަތް ހިނގަމުންދާތީ އެޝަރިޢަތް ނިމެންދެން ނަޝީދު ހުންނެވީ ފުލުހުންގެ ބެލުމުގެ ދަށުގައެވެ.

ނަޝީދު ދޫކޮށްލުމަށް ގޮވުމުގެ އިތުރަށް ލިޔެފައިވާ ޕޯސްޓަރުތައްވެސް އެމީހުން ގެންގުޅުނެވެ. ފުލުހުން ބުނެފައިވަނީ މިމުޒާހަރާގައި ބައިވެރިވެފައިވަނީ 15 މީހުން ކަމަށެވެ. އެއީ ފިރިހެނަކާއި 14 އަންހެނުންނެވެ.

އެމީހުން ހައްޔަރުކޮށްފައިވަނީ އެއްވެ އުޅުމުގެ ގާނޫނުގެ ދަށުން، އެއްވެ މުޒާހަރާ ކުރުން މަނާތަނެއްގައި މުޒާހަރާ ކުރުމުން ކަމަށް ފުލުހުން ބުނެފައިވެއެވެ. އެއާޕޯޓުގައި މުޒާހަރާ ކުރުމަކީ މަނާކަމެކެވެ.

އެމީހުން ހައްޔަރުކޮށްގެން ގެންދިޔައީ ދޫނިދޫއަށް ކަމަށްވެސް ފުލުހުން ބުނެފައިވެއެވެ. ރައީސް ނަޝީދު މިނިވަން ކުރުމަށް ގޮވާލައި އެމްޑީޕީން ގެންދަނީ މާލޭގައި ކޮންމެ ރެއަކުވެސް މުޒާހަރާ ކުރަމުންނެވެ.