ނަޝީދު މިނިވަން ކުރުމަށް ގޮވާލައި އެއާޕޯޓުގައި މުޒާހަރާކޮށްފި
5 މާރޗް 2015 18:20
އިބްރާހީމް ނާސިރު އިންޓަރނޭޝަަނަލް އެއަރޕޯޓް (އައިއެންއައިއޭ) ގައި މިއަދު ހަވީރު މުޒާހަރާ ކުރިބަޔަކު ހައްޔަރު ކޮށްފިއެވެ.
އެއާޕޯޓުގައި މުޒާހަރާ ކޮށްފައިވަނީ އެމްޑީޕީއަށް ސަޕޯޓުކުރާ އަންހެނުން ތަކެކެވެ. އެމީހުން ގޮވަމުން ގެންދިޔައީ އެމްޑީޕީގެ ރައީސް އަދި ރާއްޖޭގެ ކުރީގެ ރައީސް މުޙައްމަދު ނަޝީދު ވަގުތުން މިނިވަން ކުރުމަށެވެ.
ކްރިމިނަލްކޯޓުގެ އިސްގާޒީ ބަންދުކުރި މައްސަލައިގެ ޝަރިޢަތް ހިނގަމުންދާތީ އެޝަރިޢަތް ނިމެންދެން ނަޝީދު ހުންނެވީ ފުލުހުންގެ ބެލުމުގެ ދަށުގައެވެ.
ނަޝީދު ދޫކޮށްލުމަށް ގޮވުމުގެ އިތުރަށް ލިޔެފައިވާ ޕޯސްޓަރުތައްވެސް އެމީހުން ގެންގުޅުނެވެ. ފުލުހުން ބުނެފައިވަނީ މިމުޒާހަރާގައި ބައިވެރިވެފައިވަނީ 15 މީހުން ކަމަށެވެ. އެއީ ފިރިހެނަކާއި 14 އަންހެނުންނެވެ.
އެމީހުން ހައްޔަރުކޮށްފައިވަނީ އެއްވެ އުޅުމުގެ ގާނޫނުގެ ދަށުން، އެއްވެ މުޒާހަރާ ކުރުން މަނާތަނެއްގައި މުޒާހަރާ ކުރުމުން ކަމަށް ފުލުހުން ބުނެފައިވެއެވެ. އެއާޕޯޓުގައި މުޒާހަރާ ކުރުމަކީ މަނާކަމެކެވެ.
އެމީހުން ހައްޔަރުކޮށްގެން ގެންދިޔައީ ދޫނިދޫއަށް ކަމަށްވެސް ފުލުހުން ބުނެފައިވެއެވެ. ރައީސް ނަޝީދު މިނިވަން ކުރުމަށް ގޮވާލައި އެމްޑީޕީން ގެންދަނީ މާލޭގައި ކޮންމެ ރެއަކުވެސް މުޒާހަރާ ކުރަމުންނެވެ.
ކިޔުންތެރިންގެ ހިޔާލު