ރައީސް ޔާމީނަށް ހުށަހެޅި ސިޓީއެއް ބަލައި ނުގަތުމުން މުޒާހަރާކޮށްފި

ރާއްޖޭގެ ކުރީގެ ރައީސުލްޖުމްހޫރިއްޔާ އަދި އެމްޑީޕީގެ ރައީސް މުޙައްމަދު ނަޝީދުގެ މައްޗަށް ދައުލަތުން ކޮށްފައިވާ ޓެރަރިޒަމްގެ ދަޢުވާ އަނބުރައި ގެންދެވުމަށާއި އެމަނިކުފާނު މިނިވަން ކުރުމަށް ރައީސް ޔާމީނަށް ސިޓީއެއް ހިފައިގެންދިޔަ އެމްޑީޕީގެ އާންމު މެންބަރުން މުޒާހަރާ ކޮށްފިއެވެ.

އެމްޑީޕީގެ އަންހެނުންގެ ރޫޙުގެ ފަރާތުން ވާހަކަ ދައްކަވަމުން ކުރީގެ އެޑިޔުކޭޝަން މިނިސްޓަރ ޝިފާ މުޙައްމަދު ވިދާޅުވީ އެސިޓީ ހިފައިގެންދިޔައީ މުޒާހަރާ ކުރުމަކާ ނުލައި މީހުން ވަކިވަކިން ކަމަށެވެ. ނަމަވެސް މުޒާހަރާ ކުރަން ޖެހުނީ އެސިޓީ ރައީސަށް އެރުވުމުގެ ފުރުސަތު ނުދިނުމުން ކަމަށެވެ. އޭނާ ވިދާޅުވީ ފުލުހުންވަނީ ރައީސް އޮފީހަށް ވަނަނުދީހުރަސް އަޅާފައި ކަމަށެވެ.

އެމްޑީޕީގެ އަންހެނުންގެ ރޫހުގެ ފަރާތުން އިންތިޒާމް ކޮށްގެން ބޭއްވި ސައިކަލުބުރެއްވެސް މިއަދު ހަވީރު ބޭއްވިއެވެ. ސައިކަލް ބުރުގައިވެސް ގޮވާލައިފައިވަނީ ރައީސް ނަޝީދާއި ސިޔާސީ އެހެން ކުށްވެރިން މިނިވަން ކުރުމަށެވެ.

ކްރިމިނަލް ކޯޓުގެ އިސް ގާޒީ ޢަބްދުﷲ މުޙައްމަދު ބަންދުކުރި މައްސަލާގައި ރައީސް ނަޝީދުގެ މައްޗަށް ޓެރަރިޒަމް ދަޢުވާ އުފުލައި އެމަނިކުފާނު މިހާރު ހުންނެވީ ފުލުހުންގެ ބަންދުގައެވެ.

އެމަނިކުފާނު މިނިވަން ކުރުމަށް އެމްޑީޕީން މުޒާހަރާ ކުރަމުންދާއިރު އެމަނިކުފާނުގެ ޝަރީޢަތް ނިންމައި އަވަހަށް ހުކުމް އިއްވަން ގޮވާލައި ޕީޕީއެމްގެ ސަޕޯޓަރުން މިއަދުވަނީ އަޑުއުފުލާފައެވެ. ޕީޕީއެމްގެ ބައެއް މެންބަރުން ބޭއްވި ހިނގާލުމުގައި ގޮވާލަފައިފައިވަނީ އެ މަނިކުފާނަށް ޙައްޤު އަދަބު ދޭން ޖެހޭނެ ކަމަށެވެ.