ނަޝީދު ދޫކޮށްލުމަށްއެދި ކަނޑުމަތީގައި މުޒާހަރާ ކުރަން ނިންމައިފި
4 މާރޗް 2015 22:04
ދިވެހި ރައްޔިތުންގެ ޑިމޮކްރެޓިކް ޕާޓީ (އެމްޑީޕީ) ގެ ރައީސް އަދި ރާއްޖެގެ ކުރީގެ ރައީސް މުޙައްމަދު ނަޝީދު މިނިވަންކޮށްލުމަށްއެދި ކަނޑުމަތީގައި މުޒާހަރާއެއް ކުރަން ނިންމައިފިއެވެ.
މިމުޒާހަރާގައި ބައިވެރިވާނީ އެކަމަށް ތާއިދުކުރާ މަސްވެރިންނާއި ދަނޑުވެރިންނެވެ. މިފަދަ މުޒާހަރާއެއް ބޭއްވުމަށް ނިންމާފައިވަނީ މަސްވެރިކަމާއި ދަނޑުވެރިކަމާބެހޭ އެމްޑީޕީގެ ކޮމިޓީން ބުދަދުވަހު ބޭއްވި އަވަސް ބައްދަލުވުމަކުންނެވެ.
އެކޮމިޓީން ނިންމާފައިވަނީ މިމުޒާހަރާ މި މަހުގެ 13 ވާ ހުކުރު ދުވަހު ބޭއްވުމަށެވެ. ރައީސް ނާޝީދާ ދެކޮޅަށް ދައުލަތުންވަނީ ޓެރަރިޒަމްގެ ދަޢުވާ އުފުލާފައެވެ. އެކަމާ ގުޅޭޝަރިޢަތް މިހާރުވެސް ކުރިއަށް އެބަދެއެވެ. ޝަރީޢަތް ހިނގަމުންދާއިރުވެސް އެމަނިކުފާނު ދޫކޮށްލުމަށް އެދި ސަޕޯޓަރުން ގެންދަނީ އަޑު އުފުލަމުންނެވެ.
ރައީސް ނަޝީދު މިނިވަން ކުރުމަށް ގޮވާލައި އިއްޔެއާއި މިއަދުވަނީ މާލޭގައި ސައިކަލް ބުރެއް ބާއްވާފައެވެ. އޭގެ އިތުރަށް އެމްޑީޕީއާއި ޖޭޕީ ގުޅިގެން ކޮންމެ ރެއަކު ގެންދަނީ ރައީސް ނަޝީދާއި ސިޔާސީ އެހެން ކުށްވެރިން ދޫކޮށްލުމަށް އެދި މަގުތަކަށް ނިކުމެ ގޮވާލަމުންނެވެ.
ކިޔުންތެރިންގެ ހިޔާލު