ޑިމޮކްރަސީއަށް ކުރާ މަސައްކަތަށް ބޭރުގެ ފަރާތްތަކުން ނުފޫޒު ފޯރުވާ- ޚާރިޖީ ވަޒީރު ދުންޔާ

ރާއްޖޭގައި ޑިމޮކްރަސީ ހަރުދަނާކޮށް ކުރިއެރުވުމަށް ސަރުކާރުން ކުރަމުންދާ މަސައްކަތަށް ބޭރުގެ ފަރާތްތަކުން ނޫފޫޒު ފޯރުވާ ކަމަށް ރާއްޖޭގެ ޚާރިޖީ ވަޒީރާ ދުންޔާ މައުމޫން ވިދާޅުވެއްޖެއެވެ.

އެކަމަނާ މިހެން ވިދާޅުވީ ޖެނީވާގައި މިހާރު ކުރިއަށްދާ އިންސާނީ ހައްގުތަކާބެހޭ އދ. ގެ ކައުންސިލްގެ ހައިލެވެލް ސެގްމެންޓުގައި ވާހަކަފުޅު ދައްކަވަމުންނެވެ.

އެކަމަނާ ވިދާޅުވެފައިވަނީ ސަރުކާރުން ގެންދަނީ ރާއްޖޭގައި ޑިމޮކްރަސީ ހަރުދަނާކޮށް ކުރިއެރުވުމަށް ގިނަގުނަ މަސައްކަތް ކުރަމުން ކަމަށެވެ. ނަމަވެސް ބޭރުގެ ފަރާތްތަކުން އެމަސައްކަތަށް ނުފޫޒު ފޯރުވަމުން ގެންދާތީ އެކަމަށް ހުރަސް އެޅޭކަމަށްވެސް ވިދާޅުވިއެވެ.

އެކަމަނާ ވިދާޅުވީ ޑިމޮކްރަސީގެ ފުރިހަމަ މަންފާ ލިބޭނީ ޤާނޫނުގެ ވެރިކަން ދަމަހައްޓައިގެން ކަމަށެވެ. ދިވެހިރައްޔިތުންގެ ކުރިމަގު ބައްޓަންކޮށް ކުރިއެރުމުގެ ބާރާއި ގާބިލިއްޔަތު ދިވެހިންނަށް ފުރިހަމައަށް ލިބިގެންވާ ކަމަށްވެސް ވިދާޅުވިއެވެ.

އެކަމަނާ ވިދާޅުވީ ޑިމޮކްރަސީ ބާރުވެރިކޮށް ދެެމެހެއްޓުމަށް ދިމާވާ ގޮންޖެހުންތައް ނައްތާލަން ޖެހޭ ކަމަށެވެ. ޑިމޮކްރަސީ ބާރުވެރި ކުރުމަށް ގާނޫނީ ވެރިކަން ދަމަހައްޓައި ނަހައްޓަން ޖެހޭ ކަމަށެވެ. އެއީ ޑިމޮކްރަސީގެ މައި އަސާސެއް ކަމަށްވެސް ވިދާޅުވިއެވެ.

ޑިމޮކްރަސީއަކީ ހަމައެކަނި އިންތިޚާބުގައި ވޯޓުލުން ނޫން ކަމަށާއި، ރައްޔިތުންގެ ހައްގުތައް ރައްކާތެރިކުރުމާއި، ސިޔާސީ، އިގްތިސާދީ، މަދަނީ ހައްގުތައް ރައްޔިތުންނަށް ފޯރުކޮށްދިނުމަކީ ޑިމޮކްރަސީގެ މައިގަނޑު އަސާސް ކަމަށްވެސް ވިދާޅުވިއެވެ. އެހެންކަމުން ޑިމޮކްރަސީގެ މައިގަނޑު އަސާސްތަކާއި، ރުކުންތައް ރައްކާތެރި ކުރެއްވުމަށް އެކަމަނާ ދެމި ހުންނަވާނެ ކަމަށްވެސް ވިދާޅުވިއެވެ.

އެކަމަނާވަނީ އިންސާނީ ހައްގުތައް ހިމާޔަތް ކުރުމަށް ރާއްޖެއިން ހޯދައިފައިވާ ކާމިޔާބީއާ ބެހޭގޮތުންވެސް ވާހަކަފުޅު ދައްކަވާފައެވެ.