މިދިޔައަހަރު ރާއްޖޭގެ 7 ރަށެއްގެ ބަނދަރުވަނީ ހަދައި ނިމިފައި-ރައީސް
2 މާރޗް 2015 23:42
ރާއްޖޭގެ 7 ރަށެއްގެ ބަނދަރުވަނީ މިދިޔަ އަހަރު ހަދައި ނިމިފައި ކަމަށް ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލް ޤައްޔޫމް ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ ރައްޔިތުންގެ މަޖިލީހަށް މިއަދު ހުށަހެޅުއްވި ރިޔާސީ ބަޔާނުގައެވެ.
އެމަނިކުފާނު ވިދާޅުވީ ރާއްޖޭގެ 32 ރަށެއްގެ ބަނދަރު ހެދުމުގެ މަސައްކަތް މިހާރު ހިނގަމުންދާ ކަމަށެވެ. އޭގެ އިތުރަށް 4 ރަށެއްގެ ބިން ހިއްކައި މިހާރު ވަނީ ނިމިފައި ކަމަށްވެސް ވިދާޅުވިއެވެ. އަދި 3 ރަށެއްގެ ބިން ހިއްކުމުގެ މަސައްކަތް ހިނގަމުންދާ ކަމަށެވެ. އަދި ތިން ރަށެއްގައި ބިން ހިއްކި ސަރަޙައްދު ޙިމާޔަތް ކުރުމުގެ މަސައްކަތް މިހާރުދަނީ ހިނގަމުން ކަމަށް ވިދާޅުވިއެވެ.
ސަރުކާރުން ހިންގާ ރަށްރަށުގެ މަގުތައް ހެދުމުގެ މަޝްރޫޢުގެ ދަށުން 10 ރަށެއްގެ މަގު ހެދުމުގެ މަސައްކަތް މިހާރުވަނީ ކޮންޓްރެކްޓް ކުރެވިފައި ކަމަށްވެސް އެމަނިކުފާނު ވިދާޅުވިއެވެ. އެރަށްރަށުގެ ތެރެއިން 6 ރަށެއްގެ މަސައްކަތް މިހާރު ދަނީ ހިނގަމުން ކަމަށްވެސް ވިދާޅުވިއެވެ.
އޭގެ އިތުރަށް މާލޭގެ މަގުތަކުގައި ފެންބޮޑުވާ މައްސަލައަށް ޙައްލެއް ހޯދުމުގެ ގޮތުން ފެންބޮޑުވުމުގެ މައްސަލަ އެންމެ ބޮޑަށް ކުރިމަތިވެފައިވާ ކަމަށް ފާހަގަކުރެވިފައިވާ ސަރަޙައްދުތަކުގައި ފެން ހިންދުމަށާއި ފެން ބޭރުކުރުމުގެ ނިޒާމެއް ޤާއިމުކުރުމަށް އެމް.ޑަބްލިޔޫ.އެސް.ސީ.އާ ހަވާލުކޮށް އެ މަސައްކަތުގެ ބޮޑު ބައެއް މިހާރުވަނީ ނިމިފައި ކަމަށްވެސް ވިދާޅުވިއެވެ.
މާލޭގެ މުނިސިޕަލް ޚިދުމަތްތަކަށް ސަރުކާރުން ގެނެސްފައިވާ ބަދަލުތަކާ ގުޅިގެން، މާލޭގެ މަގުތައް މަރާމާތު ކުރުމުގެ މަސައްކަތްތައް މިހާރު ވަނީ ފަށާފައި ކަމަށްވެސް ވިދާޅުވިއެވެ.
ކިޔުންތެރިންގެ ހިޔާލު