ރައީސް ނަޝީދުގެ މައްސަލަ ހައިކޯޓުގައި އިސްތިއުނާފް ކުރުމަށް ކްރިމިނަލް ކޯޓުންވަނީ ހުރަސް އަޅާފައި

‏ ރާއްޖޭގެ ކުރީގެ ރައީސުލްޖުމްހޫރިއްޔާ އަދި އެމްޑީޕީގެ ރައީސް މުޙައްމަދު ނަޝީދު ހައްޔަރުގައި ބަހައްޓަން ކޮށްފައިވާ އަމުރު ހައިކޯޓުގައި އިސްތިއުނާފް ކުރުމަށް ކްރިމިނަލް ކޯޓުންވަނީ ހުރަސް އަޅާފައި ކަމަށް އެމްޑީޕީން ބުނެފިއެވެ.

"ރާއްޖޭގެ ކުރީގެ ރައީސުލްޖުމްހޫރިއްޔާ މުޙައްމަދު ނަޝީދުގެ މައްޗަށް ޕްރޮސެކިއުޓަރ ޖެނެރެލް އުފުއްލަވާފައިވާ ޓެރަރިޒަމްގެ ދަޢުވާއާ ގުޅިގެން ޝަރީޢަތް ނިމެންދެން އެމަނިކުފާނު ބަންދުގައި ބެހެއްޓުމަށް 23 ފެބްރުއަރީ 2015 ވަނަ ދުވަހު ކްރިމިނަލް ކޯޓުން ކުރައްވާފައިވާ އަމުރު، ދިވެހިރާއްޖޭގެ ހައި ކޯޓުގައި އިސްތިއުނާފުކުރުމަށް ކްރިމިނަލް ކޯޓުން ހުރަސް އަޅުއްވައި، ރައީސް މުޙައްމަދު ނަޝީދަށް ޤާނޫނު އަސާސީން ކަށަވަރުކޮށްދީފައިވާ އިސްތިއުނާފުކުރުމުގެ ޙައްޤު ނިގުޅައިގަނެފައިވާކަން ކަންބޮޑުވުމާއެކު ފާހަގަކުރަމެވެ." އެޕާޓީން ނެރެފައިވާ ނޫސްބަޔާނެއްގައި ބުނެފައިވެއެވެ.

އެ އަމުރު އިސްތިއުނާފްކުރުމަށް ނަޝީދުގެ ޤާނޫނީ ވަކީލުން ހުށަހަޅުއްވާފައިވަނީ ހުސްވި ފެބްރުއަރީމަހުގެ 24 ވަނަ ދުވަހުއެވެ. "ނަމަވެސް އިދާރީގޮތުން ކްރިމިނަލް ކޯޓުން ފޯރުކޮށްދެއްވަން ޖެހިވަޑައިގަންނަވާ ފޯމުތައް ފޯރުކޮށްދެއްވުމުގައި ލަސްކުރައްވައި، އަދި އެފަހުން މިއަދާ ހަމައަށް ވެސް ކްރިމިނަލް ކޯޓުން އިސްތިއުނާފްގެ މައްސަލައިގެ ލިޔެކިޔުންތައް ހައި ކޯޓަށް ހުށަހަޅުއްވާފައިނުވާ" ކަމަށްވެސް އެބަޔާނުގައި ބުނެފައިވެއެވެ.

ހަމަ އެފަދައިން ޤާނޫނު އަސާސީން ކަށަވަރުކޮށްދީފައިވާ، ޤާނޫނީ ވަކީލުންގެ އެހީތެރިކަން ހޯއްދެވުމަށް ބޭނުންފުޅުވާކަމަށް ރައީސް ނަޝީދު ތަކުރާރުކޮށް ކްރިމިނަލް ކޯޓުގައި އެދިވަޑައިގެންފައިވާ ކަމަށްވެސް ބުނެފައިވެއެވެ. ނަމަވެސް އެމަނިކުފާނު ޙައްޔަރުކޮށްގެން ކްރިމިނަލް ކޯޓަށް ގެންގޮސް ދަޢުވާ އުފުލާފައިވާ ކަމަށްވެސް ބުނެފައިވެއެވެ. "އަދި މައްސަލަ ނިމެންދެން ބަންދުގައި ބެހެއްޓުމަށް ކޯޓުން އަމުރުކުރައްވާފައިވަނީ ޤާނޫނީ ވަކީލުންގެ އެހީތެރިކަން ބޭނުންކުރެއްވުމުގެ ޙައްޤުން، ޤާނޫނު އަސާސީއާ ޚިލާފަށް އެމަނިކުފާނު މަޙުރޫމު ކުރައްވައެވެ." އެބަޔާނުގައި ބުނެފައިވެއެވެ.

"ޤާނޫނު އަސާސީގެ 51 ވަނަ މާއްދާގެ (ބ) އަދި (ޅ) އާއި 53 ވަނަ މާއްދާ އާއި 48 ވަނަ މާއްދާގެ (ށ) އިން ރައީސް ނަޝީދަށް ކަށަވަރުކޮށްދީފައިވާ ޤާނޫނީ ވަކީލުންގެ އެހީތެރިކަން ހުރިހައި މަރުޙަލާއެއްގައި ފުރިހަމައަށް ހޯއްދެވުމުގެ ޙައްޤުން އެމަނިކުފާނު މަޙުރޫމުކުރައްވައި، އަދި ޤާނޫނު އަސާސީގެ 56 ވަނަ މާއްދާއިން ކަށަވަރުކޮށްދީފައިވާ އިސްތިޢުނާފުކުރުމުގެ ޙައްޤުން ވެސް އެމަނިކުފާނު މަޙުރޫމުކުރައްވާފައި ވަނީ، ކްރިމިނަލް ކޯޓުން ޤާނޫނު އަސާސީއާ ޚިލާފަށް އިދާރީ ދަތިތައް އެމަނިކުފާނަށް ކުރިމަތިކުރުވައިގެންކަން ފާހަގަކުރަމެވެ."

ޤާނޫނީ ވަކީލުންގެ އެހީތެރިކަން ބޭނުންކުރުމުގެ ޙައްޤާއި އިސްތިއުނާފުކުރުމުގެ ޙައްޤަކީ އިންސާފުވެރި ޝަރީޢަތަކަށް ބޭނުންވާ އެންމެ އަސާސީ ޙައްޤުތައް ކަމަށްވެސް އެބަޔާނުގައި ބުނެފައިވެއެވެ. "އަދި މި ޙައްޤުތަކުން ރައީސް ނަޝީދު މަޙުރޫމުކުރުމަކީ ޤާނޫނު އަސާސީއާއި ޝަރީޢަތްކުރުމުގެ ހަމަތަކާއި ބައިނަލްއަޤުވާމީ މިންގަނޑުތަކާ ކަނޑައެޅިގެން ޚިލާފުކަމެއްކަން ފާހަގަކުރަމެވެ."