އެމްޑީޕީ-ޖޭޕީ އާ ކުރިމަތިލައި ޤައުމު ސަލާމަތް ކުރަން ތައްޔާރު-އަދީބު

އެމްޑީޕީއާއި ޖޭޕީން ކުރަމުން ގެންދާ ކަންކަމަށް ކުރިމަތިލައި މިޤައުމު ސަލާމަތް ކުރުމަށް ތައްޔާރަށް ތިބިކަމަށް ޓޫރިޒަމް މިނިސްޓަރ އަޙުމަދު އަދީބު މިއަދު ވިދާޅުވެއްޖެއެވެ.

އެމަނިކުފާނު މިއަދު ކުރައްވާފައިވާ ޓޫވީޓެއްގައި ވިދާޅުވެފައިވަނީ އެމްޑީޕީއާއި ޖޭޕީން މާ ވާހަކަ ގިނަނުކޮށް ކުރަން ބޭނުންވާ ކަމެއް ކުރުމަށެވެ. އެކަމަކާ ކުރިމަތިލާން ތައްޔާރު ކަމަށް ވިދާޅުވެފައިވެއެވެ.

މިނިސްޓަރ އަދީބު މިގޮތަށް ޓުވީޓު ކުރެއްވީ އެމްޑީޕީއާއި ޖޭޕީ ގުޅިގެން "ޤާނޫނު އަސާސީގެ ދިފާޢުގައި ދިވެހިން" ގެ ނަމުގައި ބޮޑުއެއްވުމެއް މިއަދު ބޭއްވުމަށް ތައްޔާރުވަމުން ދަނިކޮށްނެވެ. އެއެއްވުން އޮންނާނީ މިއަދު ހަވީރު 4.00 ގައެވެ.

އެދެޕާޓީންވަނީ މިމުޒާހަރާގައި ބައިވެރިވުމަށް ރަށްރަށުގައިތިބި ސަޕޯޓަރުން މާލެއައުމަށް ގޮވައިލައިފައެވެ. މިގޮވާލުމަށް ތާއިދު ކުރުމުގެ ގޮތުން ބައެއް ރަށްރަށުން މިއަދުވެސްވަނީ މާލެއައިސްފައެވެ. އެމްޑީޕީގެ ޗެއަރޕާސަން ޢަލީ ވަޙީދާއި، ނާއިބު ރައީސް މުޙައްމަދު ޝިފާޒު ވިދާޅުވެފައިވަނީ މިއަދަކީ ސަރުކާރު ޤާނޫނު އިމުގެ ތެރެއަށް ވައްދާނެ ދުވަސް ކަމަށެވެ. އަދި މިއަދަކީ "ސަރުކާރުގެ ސައިޒު ދައްކާލާނެ" ދުވަސް ކަމަށެވެ.

އެމްޑީޕީއާއި ޖޭޕީން މިހާރު ކުރަމުންދާ ސިލްސިލާ މުޒާހަރާތަކުގައި ބުނެފައިވަނީ މިސަރުކާރު ބަދަލު ކުރާނެ ކަމަށެވެ. ނުވަތައް ވައްޓާލާނެ ކަމަށެވެ.

އެދެޕާޓީގެ މިފަދަ ވާހަކަތަކަށް ރައްދުދެއްވައި ހޯމްމިނިސްޓަރ ޢުމަރު ނަސީރު ވިދާޅުވެފައިވަނީ މަގުމަތިން ސަރުކާރު ނުވެއްޓޭނެ ކަމަށެވެ. އަދި މިއަދުގެ އެއްވުން ވެެގެންދާނީ މެދުމިނުގެ އެއްވުމަކަށް ކަމަށްވެސް ވިދާޅުވިއެވެ. އެއްވުމުގައި ބައިވެރިވާނީ ގިނަވިޔަސް 5000 މީހުން ކަމަށްވެސް ޢުމަރު ވިދާޅުވިއެވެ.

އެމަނިކުފާނު ވިދާޅުވެފައިވަނީ ސަރުކާރު ވައްޓަންޖެހޭ އެއްވެސް ސަބަބެއްވެސްނެތް ކަމަށެވެ. އަދި އެކަން އެގޮތަށް ނުވެސް ކުރެވޭނެ ކަމަށެވެ.

މިއަދުގެ ބޮޑު އެއްވުން ކުރިއަށް ގެންދާއިރު އެމްޑީޕީގެ ރައީސް އަދި ރާއްޖޭގެ ކުރީގެ ރައީސް މުޙައްމަދު ނަޝީދު ހުންނެވީ ދައުލަތުން އުފުލާފައިވާ ދަޢުވާއެއްގެ ދަށުން ދޫނިދޫގައި ބަންދުކޮށްފައެވެ. ޖޭޕީގޭ ލީޑަރ ޤާސިމް އިބްރާހީމް ހުންނެވީ ސްރީލަންކާގައެވެ. މަޢުލޫމާތު ލިބިފައިވާ ގޮތުގައި ޤާސިމް މާލެ ވަޑައިގަންނަވަނީ މިރޭގެ ވަގުތެއްގައެވެ.