ބައެއް ފުލުހުންނަށް ފައިސާ ދީގެން ސިޔާސީ ބައެއް ކަންތައް ކުރުވުމަށް ދަނީ މަސައްކަތް ކުރަމުން-ފުލުހުން

ފުލުހުންގެ ތެރެއިން ބައެއް ފުލުހުންނަށް ފައިސާ ދީގެން ސިޔާސީ ބައެއް ކަންތައް ކުރުވުމަށް ސިޔާސީ ބައެއް ފަރާތްތަކުން ގެންދަނީ މަސައްކަތް ކުރަމުން ކަމަށް ފުލުހުން މިރޭ ބުނެފިއެވެ.

އިސްކަންދަރު ކޮށީގައި މިރޭ ބޭއްވި ނޫސްވެރިންގެ ބައްދަލުވުމެއްގައި ސުޕްރިންޓެންޑެންޓް އޮފް ޕޮލިސް ޙަމްދޫން ރަޝީދު ވިދާޅުވީ އެފަދަ ކަންކަމުގައި ފުލުހުން ބައިވެރިއެއް ނުވާނެ ކަމަށެވެ.

ޙަމްދޫން ވިދާޅުވީ ފުލުހުންގެ ސަފުތައް އޮތީ އެފަދަ ކަންކަމުގެ ތެރެއަށް ވަނުމަށްވުރެ ބަދަހިކޮށް ކަމަށެވެ. ފުލުހުންގެ ބަދަހި ސަފުތައް ރޫޅައިލުމަށް ބަޔަކު މަސައްކަތް ކުރިޔަސް އެކަމެއް ކާމިޔާބު ނުވާނެ ކަމަށްވެސް ޙަމްދޫން ވިދާޅުވިއެވެ.

އޭނާ ވިދާޅުވީ ފުލުހުންނަށް ފައިސާ ދީގެން ބައެއް ކަންތައް ކުރުވަން ބައެއް ފަރާތްތަކުން މަސައްކަތް ކުރަމުންދާ މައްސަލައިގެ ތަހުގީގުވެސް ކުރަމުންދާ ކަމަށެވެ.

މި ނިއުސްކޮންފަރެންސްގައި ޙަމްދޫން ވިދާޅުވީ ރައީސް ނަޝީދު މިއަދު ކޯޓަށް ހާޒިރުކުރިއިރު އެމަނިކުފާނަށް ފުލުހުން އަނިޔާކުރި ކަމަށް މީޑިއާގައި ފަތުރާފައިވަނީ ހަގީގަތެއްނެތް ވާހަކަތަކެއް ކަމަށެވެ.

ފުލުހުން ނަޝީދަށް އަނިޔާއެއް ނުކުރާ ކަމަށާއި، އެމަނިކުފާނު ވަނީ އަމިއްލަފުޅަށް ކޯޓު ކުރިމައްޗަށް ވެއްޓިވަޑައިގެންފައި ކަމަށްވެސް ޙަމްދޫން ވިދާޅުވިއެވެ. އަދި އެމަނިކުފާނު ވަނީ ކޯޓަށް ވަދެވަޑައިގަތުމަށްވެސް ދެކޮޅު ހައްދަވާފައި ކަމަށްވެސް ވިދާޅުވިއެވެ. އެމަނިކުފާނު ކޯޓަށް ވަދެވަޑައިގެންނެވުމަށް ދެކޮޅު ހެއްދެވުމުން ފުލުހުން އެމަނިކުފާނު ކޯޓަށް ވެއްދެވީ ނަގައިގަނެގެން ކަމަށްވެސް ވިދާޅުވިއެވެ.

މިއަދުގެ ޙާދިސާގެ ވީޑިއޯ ބަލައިގެން އެމައްސަލަ ތަހުގީގުކުރަމުން ގެންދާ ކަމަށްވެސް ޙަމްދޫން ވިދާޅުވިއެވެ. ރައީސް ނަޝީދުގެ ފަރާތްޕުޅުންވެސް ގަސްތުގައި ފުލުހުންނަށް ހަމަލާއެއް ދީފައިވާކަން އެވީޑިއޯއިން ފެންނަ ކަމަށްވާނަމަ އެކަމަށްވެސް ފިޔަވަޅު އަޅާނެ ކަމަށް ވިދާޅުވިއެވެ.

ރައީސް ނަޝީދަށް ފުލުހުން އަނިޔާކޮށް އެމަނިކުފާނުގެ އަތްޕުޅާއި، އިނގިލިފުޅު ބިނދުނު ވާހަކަވެސް ފުލުހުންވަނީ ދޮގުކޮށްފައެވެ.