ރައީސް ނަޝީދާމެދު ފުލުހުން ޢަމަލުކޮށްފައިވާ ރަޙުމްކުޑަގޮތް މިދަނީ ތަޙުގީގު ކުރަމުންް-އެޗްއާރުސީއެމް
23 ފެބްރުއަރީ 2015 20:42
ރާއްޖޭގެ ކުރީގެ ރައީސުލްޖުމްހޫރިއްޔާ އަދި އެމްޑީޕީގެ ރައީސް މުޙައްމަދު ނަޝީދާ ދެކޮޅަށް ދައުލަތުން އުފުލާފައިވާ ޓެރަރިޒަމްގެ ދައުވާގެ ފުރަތަމަ އަޑުއެހުމަށް އެމަނިކުފާނު ހާޒިރުކުރިއިރު ހިނގައިދިޔަ ކަންކަމުގައި ނަޝީދާމެދު ފުލުހުން ޢަމަލުކޮށްފައިވަނީ ރުޙުމް ކުޑަގޮތަކަށް ކަމަށް ހިއުމަން ރައިޓްސް ކޮމިޝަން އޮފް ދަ މޯލްޑިވްސް (އެޗްއާރްސީއެމް) ބުނެފިއެވެ.
އެކޮމިޝަނުން މިރޭ ނެރެފައިވާ ނޫސްބަޔާނެއްގައި ބުނެފައިވަނީ އެމައްސަލަ އެކޮމިޝަނުން ގެންދަނީ ތަހުގީގު ކުރަމުން ކަމަށެވެ. "ފުލުހުން ބާރުގެ ބޭނުން ނަހަމަ ގޮތުގައި ކޮށް، އެ މަނިކުފާނާ (ރައީސް ނަޝީދު) މެދު ރަޙުމުކުޑަ ގޮތަކަށް ޢަމަލުކޮށްފައިވާ މައްސަލަ މި ކޮމިޝަނުން އަންނަނީ ތަޙުގީގުކުރަމުންނެވެ،" އެބަޔާނުގައި ބުނެފައިވެއެވެ.
އެބަޔާނުގައި ބުނެފައިވަނީ ރައީސް ނަޝީދަށް ޤާނޫނީ ވަކީލެއްގެ އެހީތެރިކަންވެސް ލިބެންޖެހޭނެ ކަމަށެވެ. އަދި އެމަނިކުފާނު ކޯޓަށް ހާޒިރު ކުރުމުގައި ލިބިވަޑައިގެންފައިވާ އަނިޔާތަކަށް ބޭސްފަރުވާވެސް ކޮށްދޭންޖެހޭނެ ކަމަށެވެ. އަދި "ޤާނޫނު އަސާސީންނާއި ޤާނޫނުތަކުން ލިބިދޭންޖެހޭ ރައްކާތެރިކަމާއި ޙައްގުތައް ކަށަވަރުކޮށްދިނުމަށް ދައުލަތުގެ ކަމާބެހޭ މުއައްސަސާތަކަށް މި ކޮމިޝަނުން ގޮވާލަމެވެ،" އެޗްއާރުސީއެމްގެ ބަޔާނުގައި ބުނެފައިވެއެވެ.
ފުލުހުން ބުނެފައިވަނީ ރައީސް ނަޝީދަށް ފުލުހުން އާނިޔާކޮށްފައިނުވާނެ ކަމަށެވެ. އެމަނިކުފާނު ބިންމައްޗަށް ވެއްޓިވަޑައިގެންނެވީ އަމިއްލަފުޅަށް ކަމަށެވެ. އަދި އެމަނިކުފާނަށް އެއްވެސް އަނިޔާއެއް ލިބިފައިނުވާނެ ކަމުގެ ޔާގީންކަންވެސް ފުލުހުންވަނީ ދީފައެވެ.ކްރިމިނަލްކޯޓަށް ރައީސް ހާޒިރުކުރީ ދައުލަތުން އެމަނިކުފާނުގެ މައްޗަށް ކޮށްފައިވާ ޓެރަރިޒަމްގެ ދަޢުވާގެ ޝަރީޢަތުގެ ފުރަތަމަ އަޑުއެހުމަށެވެ.
ކިޔުންތެރިންގެ ހިޔާލު