ޝަރީޢަތް ނިމެންދެން ރައީސް ނަޝީދު ބަންދުގައި ބަހައްޓަން އަމުރު ކޮށްފި

ކްރިމިނަލް ކޯޓުގެ އިސް ގާޒީ ޢަބްދުﷲ މުޙައްމަދު ހައްޔަރުކުރި މައްސަލައިގައި، ކުރީގެ ރައީސް މުޙައްމަދު ނަޝީދާ ދެކޮޅަށް ދައުލަތުން އުފުލާފައިވާ ޓެރަރިޒަމްގެ ދަޢުވާގެ ފުރަތަމަ އަޑުއެހުން ބޭއްވުމަށްފަހު އެޝަރީޢަތް ނިމެންދެން އެމަނިކުފާނު ބަންދުގައި ބެހެއްޓުމަށް ކްރިމިނަލް ކޯޓުން މިއަދު އަމުރުކޮށްފިއެވެ.

ރައީސް ނަޝީދުގެ އިތުރަށް އެމަނިކުފާނު ސަރުކާރުގެ އިސްވެރިންތަކެއްގެ މައްޗަށްވެސް ދައުލަތުންވަނީ މިދަޢުވާ ކޮށްފައެވެ.

ރައީސް ނަޝީދުގެ ޝަރީޢަތުގެ އަޑުއެހުމަށްފަހު މިއަދު ބާއްވާފައިވަނީ ނަޝީދު ސަރުކާރުގެ ޑިފެންސް މިނިސްޓަރ ތަލްހަތު އިބްރާހީމް ކަލޭފާނުގެ ޝަރީޢަތުގެ އަޑުއެހުމެވެ. އެއަޑު އެހުމުގައި އޭނާއަށްވަނީ ވަކީލަކު ހަމަޖައްސައިިދިނުމަށް ތިންދުވަހުގެ މުއްދަތެއް ދީފައެވެ. ނަމަވެސް ޝަރީޢަތް ނިމެންދެން ފުލުހުންގެ ބަންދުގައި އޭނާ ބެހެއްޓުމަށް ކޯޓުން އަމުރެއް ނުކުރެއެވެ.

ރައީސް ނަޝީދުގެ ޝަރީޢަތުގެ އަޑުއެހުން މިއަދު ބާއްވާފައިވަނީ ވަކީލެއްގެ އެހީތެރިކަމާ ނުލައެވެ. އެމަނިކުފާނު ކޯޓަށް ވައްދާފައިވަނީ ފުލުހުންގެ ބާރު ބޭނުންކޮށްގެން ގަދަކަމުންނެވެ. ފުލުހުންގެ އެޢަމަލު ކުށްވެރިކުރާ ކަމަށާއި އެމައްސަލަ ބަލާނެ ކަމަށް ހިޔުމަންރައިޓްސް ކޮމިޝަނުންވަނީ ބުނެފައެވެ.

ރައީސް ނަޝީދު ގަދަކަމުން ކޯޓަށް ވެއްދުމުގެ ތެރޭގައި އެމަނިކުފާނަށް އެކިވަރުގެ އަނިޔާވެސް ލިބިފައިވާ ކަމަށް މަޢުލޫމާތު ލިބިފައިވެއެވެ. އެއަނިޔާގައި އެމަނިކުފާނުގެ އަތްޕުޅު ބިންދައިގެން ދިޔަކަމަށްވެސް މަޢުލޫމާތު ލިބިފައިވެއެވެ. ނަމަވެސް ފުލުހުންވަނީ އެކަން ދޮގުކޮށްފައެވެ.

ރައީސް ނަޝީދަށް ލިބިވަޑައިގެންފައިވާ އަނިޔާތަކަށް ފަރުވާ ހޯދުމަށް ޝަރީޢަތުގެ މަޖިލިސް ފެށުމުގެ ކުރިން އޭޑީކޭހޮސްޕިޓަލަށް ގެންގޮސްދިނުމަށްވެސް އެމަނިކުފާނުގެ ގާނޫނީ ޓީމުން އެދިފައިވެއެވެ. ނަމަވެސް އެފުރުސަތު ލިބިފައެއް ނުވެއެވެ. ކޯޓުން މިއަދު ފުލުހުންނަށް އަންގާފައިވަނީ ބަންދުގައި ހުންނަވާ ދުވަސްވަރު ރައީސް ނަޝީދަށް ބޭސްކޮށްދިނުމަށެވެ.

ރައީސް ނަޝީދު ކޯޓަށް ވަދެވަޑައިގެންނެވުމުގެ ކުރިން އެމަނިކުފާނު ބިންމައްޗަށް ވެއްޓިވަޑައިގެންފައި ވަނިކޮށްވަނީ ފެނިފައެވެ. ނަމަވެސް ފުލުހުން ބުނެފައިވަނީ އެމަނިކުފާނު އަމިއްލަފުޅަށް ވެއްޓިވަޑައިގެންނެވީ ކަމަށެވެ.

"ވީގޮތަކީ ރައީސް ނަޝީދު ބޭނުންފުޅުވީ ކޯޓަށް ވަދެވަޑައިގެންނެވުމުގެ ކުރިން މީޑިއާއަށް އިންޓަރވިއުއެއް ދެއްވަން. އަޅުގަނޑުމެންގެ ބަންދުގައި ބަހައްޓައިގެން ކޯޓަށް ވަކި ގަޑިއަކަށް ހާޒިރުކޮށްދިނުމަށް އަމުރެއް އައިސްފައިވަނިކޮށް މީޑިއާތަކަށް އިންޓަރވިއުދެއްވަން ފުރުސަތެއް ނުދެވޭނެ. އެފުރުސަތު ނުދިނުމުން ރައީސް ނަޝީދު އަމިއްލަ އިޚްތިޔާރުގައި ވެއްޓިވަޑައިގެންނެވީ. ކޯޓަށް ވަދެވަޑައިގަނަންވަން އިންކާރު ކުރެއްވީ،" ފުލުހުންގެ މީޑިއާގެ އިސްބޭފުޅަކު ވިދާޅުވިއެވެ.

ރައީސް ނަޝީދު ކޯޓަށް ވެއްދުމަށް ފުލުހުންކުރި މަސައްކަތުގައި އެމަނިކުފާނުގެ އިނގިލިފުޅަށް އަނިޔާވާނެހެން ފުލުހަކު ހިފަހައްޓައިގެން އުޅެނިކޮށް ނޫސްވެރިންނަށްވަނީ ފެނިފައެވެ. އެކަމުގެ ސަބަބުން އެމަނިކުފާނަށް އެއްވެއްސް އަނިޔާއެއް ލިބިވަޑައިގެންފައިވޭތޯ ދެންނެވުމުން ފުލުހުންގެ މީޑިއާގެ އިސްބޭފުޅަކު ވިދާޅުވީ އެއްވެސް އަނިޔާއެއް ލިބިވަޑައި ނުގަންނަވާކަމުގެ ޔަގީންކަން ދެއްވާ ކަަމަށެވެ. މިއަދުގެ ޝަރީޢަތުގެ އަޑުއެހުމަށް ކޯޓުރޫމަށް ނަޝީދު ވަދެވަޑައިގެންނެވީ ކޮރު ޖައްސަވަމުންނެވެ. ފުލުހުންވަނީ އެމަނިކުފާނަށް އަނިޔާކޮށްފައި ކަމަށްވެސް މަޖިލިހުގައި އެމަނިކުފާނު ވިދާޅުވި ކަމަށް މަޢުލޫމާތު ލިބިފައިވެއެވެ.

ކޯޓު އަމުރެއްގެ ދަށުން ރައީސް ނަޝީދު ހައްޔަރުކޮށްފައިވަނީ އިއްޔެއެވެ. އެމަނިކުފާނު ހައްޔަރުކުރުމާއެކު މާލޭގެ މަގުތައް ހަލަބޮލިވިއެވެ. އަދި އެމަނިކުފާނު ވަގުތުން މިނިވަން ކުރުމަށްވެސް އެމަނިކުފާނުގެ ސަޕޯޓަރުން ގެންދަނީ ސަރުކާރަށް ގޮވައިލަމުންނެވެ.