މޫނު ނިވައިކޮށްގެންތިބެ މުޒާހަރާކުރި މައްސަލައިގައި ފިޔަވަޅު އަޅައިދިނުމަށް ހުށަހަޅައިފި
23 ފެބްރުއަރީ 2015 18:40
މިދިޔަ ބުރާސްފަތި ދުވަހު ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް) އިން އިންތިޒާމުކޮށްގެން ބޭއްވި މުޒާހަރާގައި މޫނު ނިވައިކޮށްގެންތިބި ބަޔަކު ބައިވެރިކޮށްފައިވާތީ އެމައްސަލަ ބަލައި ފިޔަވަޅު އަޅައިދިނުމަށް ސަރުކާރުގެ ކަމާބެހޭ މުއައްސަސާތަކަށް އެމްޑީޕީން ހުށަހަޅައިފިއެވެ.
ސަރުކާރަށް ތާއިދުކުރުމުގެ ގޮތުން ބޭއްވި އެމުޒާހަރާގައި ސަރުކާރުގެ ބައެއް ވަޒީރުންނާއި މަޖިލިސް މެމްބަރުންވަނީ ބައިވެރިވެފައެވެ. އަދި ރައީސް ޔާމީންވެސް ބައިވެރިވެފައިވެއެވެ.
މުޒަހަރާތަކުގައި ބައިވެރިވާ އެއްވެސް މީހަކު މޫނު ނިވައި ކުރުމަކީ ޞުލްޙަވެރިކަމާއެކު އެއްވެއުޅުމުގެ މިނިވަންކަމުގެ ޤާނޫނު ގެ 21 ވަނަ މާއްދާގެ ނ. ގެ ދަށުން މަނާކަމެކެވެ.
ނަމަވެސް، އެއީ ޣައިރު ޤާނޫނީ ކަމެއްކަން ފުލުހުންނަށް އެނގިތިބެ އެއްވެސް ފިޔަވަޅެއް އަޅައިފައި ނުވާކަމަށްވެސް އެމްޑީޕީން ބުނެފައިވެއެވެ. ނަމަވެސް އެރޭ އެމްޑީޕީއާއި ޖޭޕީން ބޭއްވި ފުލުހުންވަނީ ވަރަށް އަނިޔާވެރިގޮތަކަށް ރޫޅާލައިފައި ކަމަށްވެސް އެމްޑީޕީން ބުނެފައިވެއެވެ.
އެފަދަ ޢަމަލެއް ފުލުހުންހިންގިއިރު ޕޮލިސް އިންޓެގްރިޓީ ކޮމިޝަނުން ވެސް އެއްވެސް ފިޔަވަޅެއް އަޅާފައިނުވާ ކަމަށްވެސް އެމްޑީޕީން ބުނެފައިވެއެވެ. އެހެންކަމުން ރައްޔިތުންގެ މެދުގައިވެސް ހަމަހަމަ އުސޫލަކުން ޤާނޫނާއި އެއްގޮތަށް އަމަލުތަށް ބެހެއްޓުމަށް އެޕާޓީން ގޮވާލައިފައިވެއެވެ.
މޫނު ނިވައިކޮށްގެން ތިބެ މުޒާހަރާ ނުކުރުމަށް ފުލުހުންވަނީ އިލްތިމާސްކޮށް ބަޔާނެއް ނެެރެފައެވެ.
ކިޔުންތެރިންގެ ހިޔާލު