މިރޭގެ މުޒާހަރާގައި ހައްޔަރުކުރި 10 މީހުންގެ ތެރެއިން ދެ މީހަކު ދޫކޮށްލައިފި
23 ފެބްރުއަރީ 2015 2:13
ރޭގެ މުޒާހަރާގެ ބައިވެރިއަކު ފުލުހުންގެ ބެލުމުގެ ދަށަށް ގެންނަނީ-ފޮޓޯ ހަވީރު
ރައީސް ނަޝީދު ހައްޔަރުކޮށްގެން ދޫނިދުއަށް ގެންދިޔުމުން އެމަނިކުފާނު މިނިވަން ކުރުމަށް ގޮވާލައި އެމްޑީޕީއާއި ޖޭޕީން މިރޭ ބޭއްވި މުޒާހަރާގައި 10 މީހުން ހައްޔަރުކުރި ކަމަށް ފުލުހުން ހާމަކޮށްފިއެވެ.
ފުލުހުންގެ މީޑިއާއިން ބުނެފައިވަނީ ހައްޔަރުކުރި މީހުންގެ ތެެރޭގައި ހިމެނޭ އަންހެނަކާއި 18 އަހަރު ނުފުރޭ ކުއްޖަކަށް ނަސޭޙަތް ދިނުމަށްފަހު މިހާރުވަނީ ދޫކޮށްލާފައެވެ. ފުލުހުން ހާމަކޮށްފައިވާ ގޮތުގައި އެމީހުން ހައްޔަރުކޮށްފައިވަނީ ފުލުހުންގެ ދައުރު އަދާކުރުމަށް ހުރަސްއަޅައި ފުލުހުންގެ އަމުރަށް ނުކިޔަމަންތެރި ވުމުން ކަމަށެވެ.
ފުލުހުންގެ ބެލުމުގެ ދަށުގައި މިހާރުތިބި 8 މީހުންނާ ބެހޭ މައުލޫމާތެއް ފުލުހުން ދީފައެއް ނުވެއެވެ. ފުލުހުން ހައްޔަރުކުރި މީހުންގެ ތެރޭގައި އެމްޕީ ޢަލީ ޢާޒިމްވެސް ހިމެނެއެވެ. މާލޭގައި މިހާރުކުރަމުންދާ މުޒާހަރާތަކާ ބެހޭގޮތުން ފުލުހުން ބުނެފައިވަނީ ސުލްޙަވެރިކަމާއެކު އެއްވެއުޅުމުގެ މިނިވަންކަމުގެ ޤާނޫނާއި އާއްމު އިޖްތިމާޢީ މިންގަނޑުތަކާ ޚިލާފު ޢަމަލުތައް ހުއްޓުވުމުގެ ޤާނޫނާއި ޚިލާފު ނުވާނެ ގޮތުގެ މަތިން މުޒާހަރާ ކުރުމަށެވެ.
އެފަދަ އެއްވުންތަކާއި މުޒާހަރާތަކުގައި 18 އަހަރުން ދަށުގެ ކުދިން ބައިވެރި ނުކުރުމަށްވެސް ފުލުހުންވަނީ އިލްތިމާސް ކޮށްފައެވެ. އަދި "ކާކުކަން ނޭނގޭގޮތަށް މޫނު ނިވާކޮށްގެން ތިބުންފަދަ ކަންކަން ނުކުރުމަށްވެސް" އިލްތިމާސް ކޮށްފައިވެއެވެ.
ކިޔުންތެރިންގެ ހިޔާލު