ރައީސް ނަޝީދު މިނިވަން ކުރުމަށް ޖޭޕީ-އެމްޑީޕީން ގޮވާލައިފި
22 ފެބްރުއަރީ 2015 21:16
އެމްޑީޕީއާއި ޖޭޕީ ގުޅިގެން ނެރުނު ބަުޔާން އިއްވައިދެއްވީ ޖޭޕީގެ ނާއިބު ލީޑަރ އަމީން އިބްރާހީމް
ރާއްޖޭގެ ކުރީގެ ރައީސުލްޖުމްހޫރިއްޔާ އަދި އެމްޑީޕީގެ ރައީސް މުޙައްމަދު ނަޝީދު ވަގުތުން މިނިވަން ކުރުމަށް އެމްޑީޕީއާއި، ޖޭޕީން ސަރުކާރަށް ގޮވައިލައިފިއެވެ.
ޖޭޕީއާއި، އެމްޑީޕީއާ ދެމެދު އުފައްދާފައިވާ އިންޓަރ ޕާޓީ ކޮމިޝަންގެ ކުއްލި ބައްދަލުވުމަކަށްފަހު މިރޭ ނެރެފައިވާ ބަޔާނުގައި ބުނެފައިވަނީ ނަޝީދާ ދެކޮޅަށް ޓެރަރިޒަމްގެ ދަޢުވާކޮށް އެމަނިކުފާނު ބަންދުކުރުމަކީ އެދެޕާޓީން އެއްގޮތަކަށްވެސް ބަލައިގަންނާނެ ކަމެއް ނޫންކަމަށެވެ.
އެ ބަޔާނުގައި ބުނެފައިވަނީ ސަރުކާރުން ނަޝީދާ ދެކޮޅަށް އުފުލަނީ ސިޔާސީ ދަޢުވާއެއް ކަމަށެވެ. އެއީ ސިޔާސީ ލީޑަރުންނަށް ނުވަތަ ސިޔާސީ ވާދަވެރިންނަށް ބިރުދެއްކުމާއި އަނިޔާވެރިވުމަށް ހިންގާ ޢަމަލެއް ކަމަށެވެ.
ރައީސް ނަޝީދާ ދެކޮޅަށް ޕްރޮސެކިޔުޓަރ ޖެނަރަލް ދަޢުވާ އުފުލުމުން ފުލުހުންވަނީ ކޯޓުން އަމުރެއް ހޯދައިގެން އެމަނިކުފާނު ހައްޔަރު ކުރުމަށްފަހު ދޫނިދުއަށް ގެންގޮސްފައެވެ.
ސަރުކާރުން ބުނެފައިވަނީ ނަޝީދު ހައްޔަރު ކުރެއްވީ އެމަނިކުފާނު ފިއްލަވައި ވަޑައިގެންފައިވާނެތީ ކަމަށެވެ. ރައީސް ނަޝީދާ ދެކޮޅަށް އުފުލައިފައިވާ ދަޢުވާގެ އަޑުއެހުމެއް މާދަމާ ހަވީރު 4:00 ގައި ކްރިމިނަލް ކޯޓުގައިވަނީ ތާވަލްކޮށްފައެވެ.
ކިޔުންތެރިންގެ ހިޔާލު