ހުޅުމާލޭ ބާބަކިއު ސަރަހައްދު ދެތިން ހަފްތާތެރޭ ހުޅުވޭނެ- އެޗްޑީސީ
19 ފެބްރުއަރީ 2015 14:55
ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ) އިން ހުޅުމާލޭގައި ތަރައްގީ ކުރަމުންދާ ބާބަކިއު ސަރަހައްދުގެ މަސައްކަތް ނިމި ދެތިން ހަފްތާތެރޭ ހުޅުވޭނެ ކަމަށް އެތަނުން ބުނެފިއެވެ.
އެޗުޑީސީގެ ޑެޕިޔުޓީ މެނޭޖިން ޑިރެކްޓަރ މުޙައްމަދު ސައިމަން ވިދާޅުވީ "އަޅުގަނޑުމެން މަސައްކަތް މިކުރަނީ ކުރިއަށްއޮތް ދެތިން ހަފްތާތެރޭގައި ބާބަކިއު ސަރަހައްދު ހުޅުވަން. އެތަން މިހާރުވަނީ ގާތްގަނޑަކަށް ނިމިފައި،" ކަމަށެވެ.
އޭނާ ވިދާޅުވީ އެސަރަހައްދު ހުޅާއިރު ކުޑަ ކެފޭއެއްވެސް ހުންނާނެ ކަމަށެވެ. އަދި ބާބަކިއު ހަދަން އަންނަ މީހުންނަށް ބޭނުންވާ ބައެއްސާމާނު އެތަނުން ގަންނަން ލިބޭނެ އިންތިޒާމްވެސް ހަމަޖެހިފައި ހުންނާނެ ކަމަށް ވިދާޅުވިއެވެ.
ސައިމަން ވިދާޅުވީ ބާބަކިއު ހަދާ ސަރަހައްދުގައި ބަހައްޓާނެ "ބަބަކިއު ޕިޓް" ތަކަށް މިހާރުވަނީ އޯޑަރު ކުރައްވާފައި ކަަމަށެވެ. ވަރަށް އަވަހަށް އެސާމާނުވެސް ރާއްޖެއަށް އަންނާނެ ކަމަށް އުންމީދު ކުރައްވާ ކަމަށް ވިދާޅުވިއެވެ.
އެސަރަހައްދަކީ ޒުވާނުންނަށްޓަކައި ހުޅުމާލޭގައި ގާއިމްކުރާ ތަންތަނުގެ ތެރޭގައި ހިމެނޭ ބައެކެވެ. މިހާރުވެސް ހަފްތާއެއްގެ ކޮންމެ ބަންދަކަށްވެސް ވަރަށްގިނަ އާއިލާތަކުން އެސަރަހައްދަށް ޖަމާވެ އުފާކުރަމުންދާ ކަމަށް ސައިމަން ވިދާޅުވިއެވެ. އެހެން ކަމުން އެސަރަހައްދު ވަރަށް އަވަހަށް ހުޅުވުމަށް މަސައްކަތް ކުރައްވަމުން ގެންދަވާ ކަމަށް ވިދާޅުވިއެވެ.
ކިޔުންތެރިންގެ ހިޔާލު