ކޮމިޓީތަކުގައި ސަރުކާރު ޖަވާބުދާރީ ކުރުވަން ރައްޔިތުންނާއެކު މަސައްކަތް ކުރުމަށް އެމްޑީޕީ ތައްޔާރު -މެމްބަރ ފަލާހު
12 ފެބްރުއަރީ 2015 17:05
މިއަދުގެ ނިއުސްކޮންފަރެންސްގައި ފަލާހު (ވ) ވާހަކަ ދައްކަވަނީ-ފޮޓޯ އެމްޑީޕީ
ރައްޔިތުންގެ މަޖިލީހުގެ ކޮމިޓީތަކުގައި ސަރުކާރު ޒިންމާދާރު ކުރުވުމަށް ރައްޔިތުންނާއެކު މަސައްކަތް ކުރުމަށް އެމްޑީޕީ އޮތީ ތައްޔާރަށް ކަމަށް މާފަންނު ހުޅަނގު ދާއިރާގެ މެމްބަރ މުޙައްމަދު ފަލާޙު މިއަދު ވިދާޅުވެއްޖެއެވެ.
އޭނާ މިހެން ވިދާޅުވީ އެމްޑީޕީ އޮފީހުގައި މިއަދު ބޭއްވި ބައްދަލުވުމެއްގައި ނޫސްވެރިންނަށް މައުލޫމާތު ދެއްވަމުންނެވެ.
ފަލާޙު ވިދާޅުވީ މަޖިލީސްތެރޭގައި މިހާރު ކަންކަން ހުރިގޮތުން ސަރުކާރު ޒިންމާދާރު ކުރުމަށް އެމްޑީޕީވަނީ ނުކުޅެދިފައި ކަމަށެވެ. އެމްޑީޕީ އެކަނި އެކަން ނުކުރެވުނަސް ރައްޔިތުންގެ އެހީއާއެކު އެކަން ކުރެވޭނެ ކަމަށް ވިދާޅުވިއެވެ. އެކަން އެގޮތަށް ކުރުމަކީ އެމްޑީޕީގެ އިތުރަށް ރައްޔިތުންގެ ޒިންމާއެއް ކަމަށްވެސް އޭނާ ވިދާޅުވިއެވެ. އެހެން ކަމުން ސަރުކާރު ޖަވާބުދާއިރާ ކުރުވުމަށް ރައްޔިތުން ތެދުވާން ޖެހިފައިވާ ކަމަށްވެސް ވިދާޅުވިއެވެ.
އޭނާ ވިދާޅުވީ ސަރުކާރު ޖަވާބުދާރީ ކުރުވުމަށް މަޖިލީސް ތެރެއިން އެމްޑީޕީއަށް ދަތިތަކެއް އެބަހުރި ކަމަށެވެ. ނަމަވެސް އެދަތިކަމަކީ ކޮބައިކަމެއް ވިދާޅެއް ނުވެއެވެ. އެކަމަކު މަޖިލީހުގެ ސާފު އަޣުލަބިއްޔަތު މިހާރުއޮތީ ވެރިކަންކުރާ ޕީޕީއެމްގައިކަން ފާހަގަ ކުރެވެއެވެ.
މި ނިއުސްކޮންފަރެންސްގައި އައްޑޫ ސިޓީ މީދޫ ދާއިރާގެ މެންބަރ ރޮޒައިނާ އާދަމް ވަނީ މަރުވެފައިވަނިކޮށް ވ. ރަކީދޫން ފެނިފައިވާ ޢުމުރުން 3 އަހަރުގެ އިބްތިހާލުގެ މައްސަލާގައި ސަރުކާރަށް ވަރަށް ބޮޑަށް ފާޑުވިދާޅުވެފައެވެ.
އޭނާ ވިދާޅުވެފައިވަނީ އެމައްސަލާގައި ފުލުހުންނާއި، ޖެންޑަރ މިނިސްޓްރީންވަނީ ވަރަށް ބޮޑަށް އިހުމާލުވެފައި ކަމަށެވެ. އެދެތަނުންވެސް އެކަމާ ގުޅިގެން އަމަލު ކޮށްފައި ވަނީ ގެވެށި އަނިޔާގެ ޤާނޫނާ ޚިލާފަށް ކަމަށް އޭނާ ވިދާޅުވިއެވެ.
ކިޔުންތެރިންގެ ހިޔާލު