ނާޒިމްގެ ބަންދުގެ މައްސަލަ މާދަމާ އިސްތިއުނާފު ކުރާނަން- ގާނުނީ ޓީމް

ކުރީގެ ޑިފެންސް މިނިސްޓަރ މުޙައްމަދު ނާޒިމްގެ ބަންދުގެ މުއްދަތަށް 15 ދުވަސް ކޯޓުން މިއަދު ޖަހައިދިން މައްސަލަ ހައިކޯޓުގައި އިސްތިއުނާފް ކުރާނެ ކަމަށް ނާޒިމްގެ ގާނޫނީ ވަކީލުންގެ ޓީމުން ބުނެފިއެވެ.

ނާޒިމް ރޭ ހައްޔަރުކޮށްފައިވަނީ ދައުލަތާ އިދިކޮޅު ހަރަކާތެއް ހިންގަން އުޅުމުގެ ތުހުމަތުގައެވެ. ފުލުހުންގެ ބެލުމުގެ ދަށަށް ނާޒިމް ގެންދިޔުމަށްފަހު އޭނާގެ ބަންދާމެދު ގޮތެއް ނިންމުމަށް ކްރިމިނަލް ކޯޓަށް މިއަދު ހާޒިރު ކުރުމުން އެކޯޓުންވަނީ އޭނާ ބަންދުގައި ބެހެއްޓުމަށް 15 ދުވަހުގެ މުއްދަތެއް ދީފައެވެ.

މިމައްސަލަ ހައިކޯޓުގައި އިސްތިއުނާފް ކުރަން ނިންމާފައިވާ ކަމަށް ހާމަކޮށްފައިވަނީ ނާޒިމްގެ ގާނޫނީ ޓީމުގައި ހިމެނޭ އަލްއުސްތާޛު މައުމޫން ޙަމީދެވެ. ނޫސްވެރިންނަށް މައުލޫމާތު ދެއްވަމުން އޭނާ މިރޭ ވިދާޅުވީ އެމައްސަލަ އިސްތިއުނާފް ކުރަން ނިންމެވީ ނާޒިމް އުޅުއްވާ ގެއިން ހަތިޔާރު ފެނުނު ކަމަށް ފުލުހުން ބުނެފައިވާ މައްސަލަ ތަހުގީގު ނިންމުމަށްފަ ޕީޖީއަށް ފޮނުވުމަށްފަހު ނާޒިމް ހައްޔަރު ކުރުމުންނެވެ.

ތަހުގީގު ނިންމައި ޕީޖީއަށް ފޮނުވުމަށްފަހު މީހަކު ހައްޔަރު ކުރެވޭނީ ޕީޖީ އެކަމަށް އެދުމުން ކަމަށް މައުމޫން ވިދާޅުވިއެވެ. އެކަމަކު ނާޒިމް ހައްޔަރު ކުރުމަށް ޕީޖީ އެދިފައިވާ ކަމެއް އެނގިފައިނުވާ ކަމަށް މައުމޫން ވިދާޅުވިއެވެ.

މައުމޫން ވިދާޅުވީ ނާޒިމް އުޅުއްވާ ގެއިން ފެނިފައިވާ ކަމަށް ބުނާ ގޮވާއެއްޗެއްސަކީ ފަހުން ފެނުނު އެއްޗެއް ކަމަށް ފުލުހުން ބުނެފައިވާ ކަމަށެވެ. އަދި އެގެ ބަލާ ފާސްކުރިއިރު ގޮވާއެއްޗެއް ފެނިފައި ނުވާކަމަށް ފުލުހުން ނާޒިމަށް އަންގައިފައިވާ ކަމަށްވެސް މައުމޫން ހަމީދު ވިދާޅުވިއެވެ. އަދި ގޮވާތަކެތި ކަމަށް ބުނެ ފުލުހުން ހާމަކޮށްފައިވާ ފޮޓޯއަކީވެސް އެއްވެސް ހަގީގަތެއްނެތް ފޮޓޯއެއް ކަމަށް ވިދާޅުވިއެވެ.

ނާޒިމް އުޅުއްވާ ގޭގެ ކަބަޑެއްގެ ވަތްގަނޑެއްގެ ތެރެއިން ފުލުހުންނަށް ފެނުނު ކަމަށްބުނާ ކަޅުދަބަހަކީ ފުލުހުން އެގެއަށް ވަނުމުގެ ކުރިން އޮންނާނެ އެއްޗެއް ނޫންކަމަށްވެސް ނާމައުމޫން ވިދާޅުވިއެވެ.

އެގެ ބަލައި ފާސްކުރީ ނާޒިމްގެ ހާޒިރުގައި ނޫންކަމަށްވެސް މައުމޫން ހަމީދު ވިދާޅުވިއެވެ. އޭގެ ބަދަލުގައި ފުލުހުން އެގެއަށްވަދެ ނާޒިމްގެ ދެކަނބަލުންނާއި ދެ ދަރިން ސިޓިން ރޫމަށް ނެރުނު ކަމަށްވެސް މައުމޫން ވިދާޅުވިއެވެ. އެގެ ޗެކްކުރަން ފަށައިފައިވަނީ އޭގެ 10 ވަރަކަށް މިނިޓްފަހުން އައި ފުލުހުން ކަމަށްވެސް މައުމޫން ވިދާޅުވިއެވެ. ނަމަވެސް ގާނޫނު ބުނާ ގޮތުގައި ޗެކްކުރަންޖެހޭނީ ތުހުމަތު ކުރެވޭ މީހާގެ ހާޒިރުގައި ކަމަށްވެސް ވިދާޅުވިއެވެ.

މައުމޫން ވިދާޅުވީ އެއްމައްސަލަ އިސްތިއުނާފް ކުރުމުގެ އިތުރަށް ޕޮލިސް އިންޓަރގްރިޓީ ކޮމިޝަނަށާއި، ކަމާބެހޭ އެހެން މުއައްސަސާތަކަށްވެސް ހުށަޅާނެ ކަމަށެވެ. ނާޒިމްގެ ގާނޫނީ ޓީމުގައި ހިމެނިވަޑައިގަންނަވާ ކުރީގެ ޕޮލިސް ކޮމިޝަނަރ ޢަބްދުﷲ ރިޔާޒު ވިދާޅުވީ މިމައްސަލާގައި ސްޕްރީމް ކޯޓަށްވެސް ވަޑައިގަންނަވާނެ ކަމަށެވެ.

މައުމޫން ހަމީދު ވިދާޅުވީ ނާޒިމް އުޅުއްވާގެ ޖެނުއަރީމަހުގެ 18 ވަނަދުވަހުގެ ރޭ ދަންވަރު ފާސްކުރިއިރު ނާޒިމަށް ރައްކާތެރިކަމާއި އިހްތިރާމް ދިން ކަމަށް ފުލުހުން ބުނެފައިވިޔަސް ގާނޫނީ ގޮތުން ދޭންޖެހޭ ރައްކާތެރި ކަމެއް ނާޒިމަށް ދީފައިނުވާ ކަމަށެވެ.