މޫސުމަށް އަންނަ ބަދަލުތަކާއި އެއްގޮތަށް ރައްކާތެރިކަމުގެ ފިޔަވަޅު އެޅުމަކީ ކުދިގައުމުތަކުގެ އިގްތިސާދަށް ދަތިކަމެއް: މައުމޫނު

މޫސުމަށް އަންނަ ބަދަލުތަކާއެއްގޮތަށް ރައްކާތެރިކަމުގެ ފިޔަވަޅު އެޅުމަކީ ކުދިގައުމުތަކުގެ އިގްތިސާދަށް ދަތިކަމެއްކަމަށް ކުރީގެ ރައީސް މައުމޫނު އަބްދުލްގައްޔޫމް ވިދާޅުވެއްޖެއެވެ.

 ދިއްލީ ސަސްޓެއިނަބަލް ޑިވެލޮޕްމަންޓުގެ 15 ވަނަ ސަމިޓުގައި ތަގުރީރު ކުރައްވަމުން ރައީސް މައުމޫނު ވިދާޅުވެފައިވަނީ، މޫސުމަށް އަންނަ ބަދަލުތަކާ ގުޅިގެން ދުނިޔޭގެ ތިމާވެއްޓަށް ލިބެމުންދާ ގެއްލުމުގެ އެންމެ ބޮޑު އަސަރެއް ކުރާނީ ރާއްޖެ ފަދަ ނާޒުކު ތިމާވެއްޓެއް އޮތް ކުދި ޖަޒީރާ ގައުމުތަކަށް ކަމަށާއި އެފަދަ ގައުމުތަކަށް ހުރި ނުރައްކަލާއި ގޮންޖެހުންތަށް ނުހަނުބޮޑުކަމަށެވެ. އެގޮތުން 2004 ވަނަ އަހަރު ދިމާވި ސުނާމީ ކާރިސާ ފަދަ ކާރިސާތަކުން ސަލާމަތްވުމަށް ކަނޑުތޮށި އުސްކޮށް، ވަރުގަދަ ކުރުމާއި ރާޅު އެރުން ހުއްޓުވުމުގެ ގޮތުން ބިން އުސްކުރުން ފަދަ ކަންކަމަކީ ދިވެހި ރާއްޖެ ފަދަ ކުދި ޖަޒީރާ ގައުމުތަކަށް ޚަރަދުގެ ގޮތުންނާއި އެހެނިހެން ގޮތްގޮތުން ބެލި ނަމަވެސް ކުރެއްވޭނޭ ވަރުގެ ކަމެއް ނޫން ކަމަށެވެ. 

"ދުނިޔެ ހޫނުވުމުގެ މައްސަލަ އަކީ އިންތިހާ އަށް ކަންބޮޑުވާން ޖެހޭ މައްސަލައެއް ކަން ފާހަގަކޮށް، ދުނިޔޭގެ ތިމާވެއްޓަށް އަންނަމުންދާ ބަދަލުތަކާ މެދު ދުނިޔޭގެ ސަމާލުކަން ހޯދުމަށް އެންމެ ފުރަތަމަ އަޑު އުފުލި އެއް ގައުމަކީ ނުވަތަ ގައުމަކީ ދިވެހި ރާއްޖެ.  އެއީ 1987 ވަނަ އަހަރުގެ ތެރޭގައި. އަދި 1989 ވަނަ އަހަރު ރާއްޖޭގައި ބާއްވާފައިވާ [ސްމޯލް ސްޓޭޓް ކޮންފަރެންސް އޮން ސީ ލެވެލް ރައިޒް] ކޮންފަރެންސް އަކީ މިފަދަ ގޮތަކަށް ދުނިޔޭގެ ފެންވަރުގައި ބޭއްވިގެން ދިޔަ ފުރަތަމަ ކޮންފަރެންސް،" ރައީސް މައުމޫނު ވިދާޅުވިއެވެ. 

މައުމޫން ވިދާޅުވީ މޫސުމަށް އަންނަ ބަދަލުތަކާ ގުޅޭ ގޮތުން ފްރާންސްގެ ޕެރިހުގައި މި އަހަރު ބާއްވާ އދ. ގެ ކޮންފަރެންސްގައި ނިންމާ ނިންމުންތަކަކީ މުހިންމު ނިންމުންތަކެއްކަމަށެވެ. އެގޮތުން، އެ ނިންމުންތައް ތަންފީޒުކުރުމަށް ގައުމުތަކުގެ ގާނޫނު ނިންމުންތަކާއި އެއްގޮތަށް ބަދަލުކުރުމަކީވެސް މުހިންމުކަމެއްކަމަށް އެމަނިކުފާނު ވިދާޅުވިއެވެ. 

"ކުރީގައި ވެސް އެގޮތަށް ފާސްކޮށްފައިވާ ކޮންވެންޝަންތަކާއި އެފަދަ ޖަލްސާތަކުގައި ނިންމާފައިވާ ނިންމުންތަކާއި ގައުމުތަކުން ވައުދުވެފައިވާ ކަންކަމަށް އަމަލު ކުރުމުގައި، އެކަށީގެންވާ މިންވަރެއްގައި ފުރިހަމައަށް އަމަލު ކޮށްފައިވާ ތަން ފެނިފައެއްނުވޭ،" ރައީސް މައުމޫނު ވިދާޅުވިއެވެ.