ފުވައްމުލަކުގެ ފެނާއި ނަރުދަމާ ނިޒާމުގެ ޢަމަލީ މަސައްކަތް ރިޔަން އާ ޙަވާލުކޮށްފި

ފުވައްމުލަކުގެ ފެނާއި ނަރުދަމާ ނިޒާމް ޑިޒައިން ކުރުމާއި، ޢަމަލީ މަސައްކަތް ސުޕަވައިޒް ކުރުމަށް ރިޔަން ޕްރައިވެޓް ލިމިޓެޑާ މިއަދު ޙަވާލުކޮށްފިއެވެ.

އެކުންފުންޏާ މިމަސައްކަތް ޙަވާލުކުރުންއޮތީ މޫކައި ހޮޓަލުގެ ކޮއިމަލާ މާލަމުގައި މިއަދު ބޭއްވި ރަސްމިއްޔާތެއްގައެވެ. މިރަސްމިއްޔާތު ޝަރަފުވެރިކޮށްދެއްވީ މިނިސްޓަރ އޮފް އެންވަޔަރަންމަންޓް އެންޑް އެނަރޖީ ތާރިޤް އިބްރާހީމެވެ.

މި މަޝްރޫޢުގެ ދަށުން ޏ. ފުވައްމުލަކުގެ ފެނާއި ނަރުދަމާ ނިޒާމް ޑިޒައިންގ ކުރުމާއި ޢަމަލީ މަސައްކަތް ސުޕަވައިޒް ކުރެވިގެން ދާނެ ކަމަށް މިނިސްޓްރީ އޮފް އެންވަޔަރަންމަންޓް އެންޑް އެނަރޖީން ހާމަކޮށްފައިވެއެވެ.

މި މަޝްރޫޢުއަށް ޖުމްލަ 231 މިލިއަން ރުފިޔާ ޚަރަދު ކުރުމަށްވަނީ ހަމަޖެހިފައި ކަމަށް މިނިސްޓްރީން ހާމަކޮށްފައިވެއެވެ. އެގޮތުން 174 މިލިއަން ރުފިޔާ ކުވައިތު ފަންޑުން ޚަރަދު ކުރުމަށް ވަނީ ހަމަޖެހިފައެވެ. އަދި ދިވެހި ސަރުކާރުން މި މަޝްރޫއަށް ޚަރަދު ކުރުމަށް ހަމަޖެހިފައިވަނީ 57 މިލިއަން ރުފިޔާ ކަމަށްވެސް ބުނެފައިވެއެވެ.

ރިޔަން ޕްރައިވެޓް ލިމިޓެޑުން މިކަމަށް ހުށަހަޅާފައިވާ ޖުމްލަ އަގަކީ 6,413,332.2 ރުފިޔާއެވެ. މި މަޝްރޫޢު ޑިޒައިން އެންޑް ސުޕަރވިޝަން މަސައްކަތް ނިންމުމަށް އެފަރާތުން ހުށަހަޅުއްވާފައިވާ މުއްދަތަކަކީ ސޮއިކުރާ ތާރީޚުން ފެށިގެން 24 މަސް ކަމަށްވެސް ތިމާވެއްޓާ ބެހޭ މިނިސްޓްރީން ބުނެފައިވެއެވެ.