އަންނަ ރިޔާސީ އިންތިޚާބުގައި ވާދައެއް ނުކުރާނަން- ޢުމަރު

ދެހާސް އަށާރަވަނަ އަހަރު ރާއްޖޭގައި ބާއްވާ ރިޔާސީ އިންތިޚާބުގައި ވާދަ ނުކުރައްވާނެ ކަމަށް މިހާރުގެ ހޯމްމިނިސްޓަރ ޢުމަރު ނަސީރު ވިދާޅުވެއްޖެއެވެ.

ޢުމަރުވަނީ މިދިޔަ ރިޔާސީ އިންތިޚާބުގައި ޕީޕީއެމްގެ ރިޔާސީ ޕްރައިމެރީގައި ރައީސް ޔާމީނާ ވާދަ ކުރައްވާފައެވެ. އެފަހަރު ޕްރައިމެރީ ކާމިޔާބު ކުރައްވައިގެން ރިޔާސީ ޓިކެޓް ހޯއްދެވީ މިހާރުގެ ރައީސް ޢަަބްދުﷲ ޔާމީން ޢަބްދުލް ޤައްޔޫމެވެ.

އަންނަ ރިޔާސީ އިންތިޚާބުގައި ވާދަ ނުކުރައްވާނެކަން މީގެ ކުރިންވެސް ޢުމަރުވަނީ ހާމަކުރައްވާފައެވެ.

ޢުމަރު ވިދާޅުވީ އޭނާ ހޯމްމިނިސްޓަރަކަށް ހުންނެވީ ޖުމްހޫރީ ޕާޓީގެ ޖާގައެއްގައި ކަމަށެވެ. ނަމަވެސް ސަރުކާރު ކޯލިޝަނުން ވަކިވެއްޖެ ކަމަށް ޖުމްހޫރީ ޕާޓީންވެސް އިޢުލާން ކުރުމުން ދެންވާނެ ގޮތެއް އެނގިވަޑައި ނުގަންނަވާ ކަމަށެވެ. "އަޅުގަނޑު ކޮށްގެންހުރި ހުވައިގައި ރައީސުލްޖުމްހޫރިއްޔާއަށް ވަފާތެރިވުންވެސް ހިމެނޭ. އެހުވައިގެ މަތީގައި އަޅުގަނޑު ދެމިހުންނާނަން. ރައީސުލްޖުމްހުރިއްޔާއަށް ވަފާތެރިކަން މަތީހުރެ އެމަނިކުފާނު އަންގަވާ ކަންނަ ކުރުންމަތީ ސާބިތުވެ ހުންނާނަން،" ޢުމަރު ވިދާޅުވިއެވެ.

ޢުމަރު ވިދާޅުވީ މިސަރުކާރު ގެނައުމަށް އޭނާގެ މަސައްކަތްވެސް ހިމެނޭ ކަމަށެވެ. އެހެން ކަމުން ސަރުކާރު ދެމެހެއްޓުމަކީވެސް ކުރައްވަން ޖެހޭނެކަމެއް ކަަމަށް ވިދާޅުވިއެވެ.

އެެއްވެސް ޕާޓީއަކަށް ސޮއިކުރައްވާނަންތޯ ދެންނެވުމުން ޢުމަރު ވިދާޅުވީ އެކަމާ މިވަގުތު ނުވިސްނަވާ ކަމަށެވެ. އެފަދަ ކަންކަމަކީ ވިސްނުންތެރިކަމާއެކު މަޝްރާކޮށްގެން ކުރަންޖެހޭނެ ކަންކަން ކަމަށް ވިދާޅުވިއެވެ.