ގާނޫނުއަސާސީ ހިމާޔަތްކުރުމުގެ އެއްބަސްވުމުގައި ބުރާސްފަތި ދުވަހު ސޮއިކުރާނެ

ގާނޫނުއަސާސީ ނަގަހައްޓައި ދެމެހެއްޓުމުގެ ނަމުގައި ސަރުކާރާ ދެކޮޅަށް ޖުމްހޫރީ ޕާޓީ އާއި އެމްޑީޕީ ގުޅިގެން ކުރާ މަސައްކަތުގެ އެއްބަސް ވުމުގައި އަންނަ ބުރާސް ފަތި ދުވަހު ސޮއި ކުރެވޭނެ ކަމަށް އެ ދެ ޕާޓީން ބުނެފިއެވެ.

އެ މައްސައްކަތްތަކާ ބެހޭގޮތުން ޖުމްހޫރީ ޕާޓީ އާއި އެމްޑީޕީން، ޖޭޕީގެ މައި ޖަގަހަ މ.ކުނޫޒުގައި ރޭ ބޭއްވި މަޝްވަރާ ތަކަށްފަހު ނޫސްވެރިންނަށް މައުލޫމާތު ދެއްވަމުން ޖުމްހޫރީ ޕާޓީގެ ނާއިބު ރައީސް އަމީން އިބްރާހިމް ވިދާޅުވީ، ގާނޫނުއަސާސީ ނަގަހައްޓައި، ގާނޫނުގެ ބާރު ދެމެހެއްޓުމަށް އެމްޑީޕީއާއެކު ކުރާ މަސައްކަތްތަކުގައި ވަނީ ވަރަށް ބޮޑު ކުރިއެރުންތަކެއް ލިބިފައިވާ ކަމަށެވެ. އަދި ޖެޕީ އާއި އެމްޑީޕީ ގުޅިގެން ކުރާ އެ މަސައްކަތުގައި، ބައިވެރިވުމަށް މޯލްޑިވްސް ޓްރޭޑް ޔޫނިއަން (އެމްޓީޔޫ)ގެ ކައުންސިލުން ނިންމަވައި އެކަން ހާމަ ކުރެއްވީތީ ޝުކުރު ދަންނަވާ ކަމަށްވެސް ވިދާޅުވިއެވެ.

ޖޭޕީ އާއި އެމްޑީޕީން ކުރިއަށްގެންދާ މަޝްވަރާ ތަކުގައި ބައިވެރި ނުވުމަށް އަދާލަތު ޕާޓީން ނިންމާފައިވާތީ، އަމީން ވިދާޅުވީ، ޖޭޕީ އާއި އެމްޑީޕީން ކުރާ މަސައްކަތުގައި އަދާލަތުން ބައިވެރި ވުމުގެ ހެޔޮ ރޫހާއި ހެޔޮ ނިޔަތް އޮތްކަން އަދާލަތުން ބޭއްވި އެންމެ ފަހުގެ ބައްދަލުވުމުންވެސް ހާމަވެގެން ގޮސްފައިވާ ކަމަށެވެ.

"ގައުމަށް ދިމާވާ ބޮޑެތި ކަންކަމުގައި، ހާއްސަކޮށް ގައުމީ ކަންކަމުގައި އަދާލަތު ޕާޓީން ވަނީ ވަރަށް އިސް ރޯލެއް އަދާކޮށްފަ. އެހެންވީމާ ގައުމީ ރޫހުގައި، ރައްޔިތުންގެ ހިދުމަތުގައި، ގާނޫނުއަސާސީ ނެގެހެއްޓުމަށް މިކުރާ މަސައްކަތަކީ އަދާލަތުންވެސް އިސްކަން ދީގެން ބައިވެރިވާނެ ކަމެއް ކަމަށް އަޅުގަނޑުމެން ދެކެނީ،" އަމީން ވިދާޅުވި އެވެ.

އަމީން ވިދާޅުވީ، ޖުމްހޫރީ ޕާޓީ އާއި އެމްޑީޕީއާ ގުޅިގެން މިކުރަން ފަށާ މަސައްކަތުގެ އެއްބަސް ވުމުގައި އަންނަ ބުރާސްފަތި ދުވަހު ސޮއިކުރުން އޮންނާނެ ކަމަށެވެ. އަދި ހަމަ އެރޭ އެ މަސައްކަތުގައި ބައިވެރިވާ ހުރިހާ ފަރާތެއް ގުޅިގެން ކާނިވާ ސަރަހައްދުގައި ބޮޑު ޖަލްސާއެއް ބޭއްވުމަށް ހަމަޖެހިފައިވާ ކަމަށްވެސް އޭނާ ވިދާޅުވި އެވެ.

ނޫސްވެރިންނަށް މިކަމާބެހޭ މައުލޫމާތު ދެއްވަމުން އެމްޑީޕީގެ ޗެއާ ޕާސަން އަލީ ވަހީދު ވިދާޅުވީ، ދެ ޕާޓީން ގުޅިގެން މަސައްކަތް މިކުރެވޭ ބާރު މިނަށް ބަލާއިރު މި ހަފްތާއަކީ ވަރަށް ކާމިޔާބު ހަފްތާއަކަށް ވެގެންދާނެ ކަމަށެވެ. އަދި ބިރު ފަހަނައަޅައި ރައްޔިތުން ނިކުންނަންވީ ވަގުތު މިއޮތީ ޖެހިފައި ކަމަށްވެސް ވިދާޅުވިއެވެ.

އަލީ ވަހީދު ވިދާޅުވީ މި ސަރުކާރު އެންމެ ބޮޑަށް ބިރުގަންނަ އަދި އެންމެ ބާރުގަދަ އެންމެ ޖެހިލުންވާ ހަތިޔާރު ތަކަކީ ގަލަމާއި ދޫ ކަމަށެވެ. އެހެންކަމުން ހިޔާލު ފާޅުކުރުމުގެ މިނިވަންކަމަށް ހުރަސް އެޅުމަށް ސަރުކާރުން މަސައްކަތްކުރާ ކަމަށް ވިދާޅުވިއެވެ.

އަލީ ވަހީދު ވިދާޅުވީ، ދެޕާޓީން ގުޅިގެން ކުރާ މަސައްކަތާބެހޭގޮތުން އެއްބަސްވާ އެއްބަސްވުން ވެގެންދާނީ ރައްޔިތުންނަށް ހާމަކަމާއެކު ފެންނަ އެއްބަސް ވުމަކަށް ކަމަށެވެ.