އެސްއެމްއެސް މެދުވެރިކޮށް ޚިދުމަތް ދިނުމުގެ ނިޒާމެއް ހޯމްމިނިސްޓްރީގައި ގާއިމް ކުރަނީ
1 ފެބްރުއަރީ 2015 22:28
އެސްއެމްއެސް މެދުވެރިކޮށް ޚިދުމަތް ދިނުމުގެ ނިޒާމެއް ހޯމްމިނިސްޓްރީގައި ގާއިމް ކުރުމުގެ މަސައްކަތް ކުރައްވަމުން ގެންދަވާ ކަމަށް މިނިސްޓަރ ޢުމަރު ނަސީރު ވިދާޅުވެއްޖެއެވެ.
އެމަނިކުފާނު ވިދާޅުވީ އަންނަ ހަފްތާގައި އެސިސްޓަމް "އިންސްޓޯލް ކުރެވި ޚިދުމަތްދެވޭނެ" ކަމަށެވެ. އެއަށްވުރެވެސް ކުރިން އެޚިދުމަތް ފެށުމަކީ ކުރައްވާ އުންމީދެއް ކަމަށްވެސް ވިދާޅުވިއެވެ.
މިނިސްޓަރ ވިދާޅުވީ މި ނިޒާމް ގާއިމް ކުރުމުން އެމިނިސްޓްރީގެ މެންޑޭޓުގެ ތެރޭގައި ހިމެނޭ ހުރިހާ ކަމަކާ ގުޅޭގޮތުން އެސްއެމްއެސް މެދުވެރިކޮށް ޚިދުމަތް ލިބޭނެ ކަމަށެވެ. އެސްއެމްއެސް ކުރަން ޖެހޭނީ އެމީހަކު ބޭނުންވާ ކަމެއް ލިޔެފައި 1515 އަށް ކަމަށްވެސް މިނިސްޓަރ ވިދާޅުވިއެވެ.
"އެސްއެމްއެސް ފޮނުވުމުން ލަސްވެގެން ސައުވީސްގަޑިއިރުތެރޭގައި ޖަވާބު ލިބޭނެ. އަޅުގަނޑު ގަބޫލުކުރާ ގޮތުގައި ރާއްޖޭގެ ކޮމިޔުނިކޭޝަން ކުރިއަރައިފައިވާ މިންވަރަށް ބަލާއިރު ކޮންމެ ކަމެއްގައި މިނިސްޓްރީއަށް ސިޓީ ފޮނުވާކަށް ނުޖެހޭނެ. އެސް އެމްއެސް ފޮނުވުމުން މިނިސްޓްރީން އަންގާނެ ސިޓީ ފޮނުވަންޖެހޭ ކަމެއް ވިއްޔާ،" މިނިސްޓަރ ވިދާޅުވިއެވެ.
އެމަނިކުފާނު ވިދާޅުވީ މިނިސްޓްރީއަށް ފޮނުވުމަށް ސިޓީއެއް ލިޔުމަކީ ކޮންމެ މީހަކަށް ފަސޭހަވާނެ ކަމެއް ނޫންން ކަމަށެވެ. ނަަމަވެސް މިޒަމާނަކީ ކޮންމެ މީހެއްގެ އަތުގައި މޯބައިލް ފޯނެއް އޮންނަ ޒަމާނަކަށް ވުމުން އެބޭނުން ކޮށްގެން މިނިސްޓްރީއާ ހަމައަށް ވާސިލް ވެވޭނެ ކަމަށެވެ. ފޮނުވާ އެސްއެމްއެސްއަކީ ރަސްމީ އެއްޗެއް ކަމަށް މިނިސްޓްރީން ބަލައިގަންނާނެ ކަމަށްވެސް ވިދާޅުވިއެވެ.
މިޚިދުމަތް ތަޢާރަފް ކުރުމުގެ ބޭނުމަކީ މިނިސްޓްރީގެ ޚިދުމަތްތައް ރައްޔިތުންނާ ގާތުންދީ އަވަސް ޚިދުމަތް ފޯރުކޮށްދިނުން ކަމަށްވެސް މިނިސްޓަރ ވިދާޅުވިއެވެ.
ކިޔުންތެރިންގެ ހިޔާލު