ރައްޔިތުންނަށް އިންސާފު ހޯދައިދީފައިނޫނީ ހުއްޓައެއް ނުލާނަން- އިންތި
31 ޖެނުއަރީ 2015 23:28
ރައްޔިތުންނަށް ގެއްލިފައިވާ އިންސާފު އަނބުރައި ހޯދައިދީފައިނޫނީ ހުއްޓައި ނުލައްވާނެ ކަމަށް ރައްޔިތުންގެ މަޖިލީހުގެ މެންބަރ އަދި އެމްޑީޕީގެ ތަރުޖަމާނު އިމްތިޔާޒު ފަހުމީ (އިންތި) މިރޭ ވިދާޅުވެއްޖެއެވެ.
ޖުމްހޫރީޕާޓީ (ޖޭޕީ) ގެ މައިޖަގަހަ މ. ކުނޫޒުގައި މިހާރު ކުރިއަށްދާ ޖަލްސާގައި ވާހަކަ ދައްކަމުން އޭނާ ވިދާޅުވީ މިސަރުކާރުން ގެންދަނީ ގާނޫނާއި ގާނޫނު އަސާސީއާ ޚިލާފަށް އެތައް ކަމެއް ކުރަމުން ކަމަށެވެ.
ގާނޫނު އަސާސީ ހިމާޔަތް ކުރުމަށް ބުނެ އެމްޑީޕީއާއި ޖޭޕީ ގުޅިގެން ބާއްވަމުން ގެންދާ މިޖަލްސާގައި އޭނާ ވިދާޅުވީ ގާނޫނުއަސާސީއާ ޚިލާފަށް ސަރުކާރުން ކޮށްފައިވާ ބައެއް ކަންތައްތަކަކީ ސްޕްރީމް ކޯޓުގެ ފަނޑިޔާރު މުއުތަސިމް އަދުނާނާއި، އުއްތަމަ ފަނޑިޔާރު އަހުމަދު ފާއިޒު ޙުސައިން މަގާމުން ވަކިކުރުމެވެ. އަދި ދައުލަތުގެ އެޓަރނީ ޖެނެރަލް ވަކިކުރުމާއި، ސްޕްރީމްކޯޓުގެ ބެންޗުގެ އަދަދު މަދުކުރުން ކަމަށެވެ. މިސަރުކާރަކީ ރައްޔިތުންގެ ތާއީދެއްނެތް ސަރުކާރެއް ކަމަށާއި ރައްޔިތުންގެ ތާއިދުނެތް ސަރުކާރަކުން ވެރިކަން ކުރުމަކީވެސް ގާނޫނުއަސާސީއާ ޚިލާފުކަމެއް ކަމަށް އިންތި ވިދާޅުވިއެވެ.
އިންތި ވިދާޅުވީ މިސަރުކާރުން ވެފައިވާ ވަޢުދުތައްވެސް އެއްއަހަރު ވެގެންދިޔައިރުވެސް ފުއްދަމުން ގެންދާތަނެއް ނުފެންނަ ކަމަށެވެ. ކޮންމެ އާއިލާއަކަށް ހަމަޖައްސައިދޭން ވެފައިވާ ވައުދުގެ ދަށުން އަދި އެއްވެސް އާއިލާއަކަށް ޑޮކްޓަރަކު ހަމަނުޖެހޭ ކަމަށާއި، ޓީޗަރުންނަށް ދިމާވެފައިވާ މައްސަލަ ހައްލުކޮށްދިނުމުގެ ބަދަލުގައި މިހާރުވަނީ ކުރިއަށްވުރެ މުސާރަ ކުޑަކޮށްފައި ކަމަށްވެސް އޭނާ ވިދާޅުވިއެވެ. އަދި ވަޒީފާތައްވެސް އިތުރުވަމުން ނުދާކަމަށްވެސް ވިދާޅުވިއެވެ.
މިސަރުކާރުން ގެންދަނީ ގާނޫނު އަސާސީއާ ޚިލާފުވަމުން ކަމަށްވިދާޅުވެ ގާނޫނު އަސާސީ ހިމާޔަތް ކުރުމަށް އެންމެންވެސް ނިކުތުމަށް އިންތި ގޮވައިލެއްވިއެވެ.
ކިޔުންތެރިންގެ ހިޔާލު