ދައުރު ހަމަވުމުގެ ކުރިން ވެރިކަން ބަދަލު ކުރާނަން، އެކަމަކު ބަޣާވާތެއް ނުކުރާނަން: ރައީސް ނަޝީދު
30 ޖެނުއަރީ 2015 0:24
ރައީސުލްޖުމްހޫރިއްޔާ އަބްދުﷲ ޔާމީނުގެ ރިޔާސީ ދައުރު ހަމަވުމުގެ ކުރިން ވެރިކަން ބަދަލު ކުރައްވާނެ ކަމަށާއި، އެހެން ނަަމަވެސް ބަޣާވާތެއް ނުކުރައްވާނެ ކަމަށް އެމްޑީޕީގެ ރައީސް މުހައްމަދު ނަޝީދު ވިދާޅުވެއްޖެއެވެ.
ވީޓީވީގެ ފަސްމަންޒަރު ޕްރޮގްރާމުގައި ވާހަކަ ދައްކަވަމުން ރައީސް ނަޝީދު ވިދާޅުވީ، ވެރިކަން ބަދަލު ކުރުމަށްފަހު ޖުމްހޫރީ ޕާޓީގެ ލީޑަރު ގާސިމް އިބްރާހީމް ވެރިކަމަށް ގެނެވޭނެ މަގެއް ބައްލަވަމުން އަންނަކަމަށެވެ.
"އަޅުގަނޑުމެންގެ އަމާޒަކީ 2018 އައުމުގެ ކުރިން ގާސިމް އިބްރާހީމާ ވެރިކަން ހަވާލުކުރުން. ޤައުމުގެ މުސްތަގްބަލާއި ސިޔާސީ ކުރިމަގަށްޓަކައި 2018 ގެ ކުރިން ރައީސް ޔާމީންގެ ވެރިކަން ބަދަލުކުރަންޖެހޭ،" ރައީސް ނަޝީދު ވިދާޅުވިއެވެ.
އެމަނިކުފާނު ވިދާޅުވީ ދިވެހި ރައްޔިތުންނާ ގައުމުގައި އިންވެސްޓު ކުރަން ތިބި ވިޔަފާރިވެރިންގެ ވެސް އެދުމަކީ ސަރުކާރު ބަދަލުކުރުން ކަމަށެވެ. އަދި ގައުމަށްޓަކާ ކޮންމެ ބޭފުޅަކާއެކު މަސައްކަތް ކުރައްވަން ވެސް ތައްޔާރަށް ހުންނެވި ކަމަށް ނަޝީދު ވިދާޅުވިއެވެ.
"އަޅުގަނޑުމެން މި ވާހަކަ ދަންނަވާއިރަށް ހަމަ ވިދާޅުވާނެ އަޅުގަނޑުމެން ބަޣާވާތެއް ކުރަން އުޅެނީއޭ. ނޫން، އެއީއަކީ ނޫން އަޅުގަނޑުމެން ދައްކާ ވާހަކައަކީ. ދިވެހިރާއްޖޭގައި ގާނޫނީ ހަމަތަކެއް އެބަހުރޭ، ކަންކަމަށް ބަދަލު ގެނައުމަށް."
ނަޝީދު ވިދާޅުވީ ބައެއް ބޭފުޅުންނާއެކު މަސަސައްކަތް ކުރައްވަން އުނދަގޫވި ނަމަވެސް ގައުމައްޓާކާ އެފަދަ ބޭފުޅުންނާއެކު މަސައްކަތް ކުރައްވަން ޖެހިވަޑައިގެންފިނަމަ މަސައްކަތް ކުރައްވާނެ ކަމަށެވެ.
"ބައެއް ބޭފުޅުންނަށް ބައެއް ބޭފުޅުންނާއެކު މަސައްކަތްކުރަން އުދަގޫވާނެ. އެހެން ނަމަވެސް އެފަދަ ބޭފުޅުންނާއެކު ވެސް ގައުމަށްޓަކާ މަސައްކަތް ކުރަންޖެހޭނެ،" ރައީސް ނަޝީދު ވިދާޅުވިއެވެ.
ރައީސް މައުމޫނުގެ ބައެއް ގާތް ބޭފުޅުން ވެސް ރައީސް ޔާމީނުގެ ވެރިކަން ބަދަލުކުރައްވަން ތައްޔާރަށް ތިއްބެވި ކަމަށް ނަޝީދު ވިދާޅުވިއެވެ. ނަމަވެސް އެއީ ކޮން ބޭފުޅުންނެއްކަމެއް ނަޝީދު ހާމައެއް ނުކުރައްވައެވެ.
ކިޔުންތެރިންގެ ހިޔާލު