އެމްޑީޕީއާއި ޖުމްހޫރީ ޕާޓީ ގުޅިގެން މަސައްކަތްކުރަން ނިންމައިފި
26 ޖެނުއަރީ 2015 23:42
އެމްޑީޕީއާއި ޖުމްހޫރީ ޕާޓީ ގުޅިގެން "ގާނޫނު އަސާސީ ހިމާޔަތްކުރުމަށް" މަސައްކަތް ކުރުމަށް ދެ ޕާޓީން އެއްބަސްވެއްޖެއެވެ.
ދެ ޕާޓީން އެއްބަސް ވެފައިވަނީ ޖުމްހޫރީ ޕާޓީގެ އޮފީހުގައި މިރޭ ދެ ޕާޓީގެ އިސްވެރިން ބޭއްވި ބައްދަލުވުމެއްގައި މަޝްވަރާ ކުރުމަށްފަހު އެވެ. ގާނޫނު އަސާސީގެ ހިމާޔަތުގައި ރައްޔިތުންގެ މަޖިލީހުގަ އާއި ރައްޔިތުންގެ މަޖިލީހުގެ ބޭރުން ވެސް ގުޅިގެން މަސައްކަތްކުރުމަށް ދެ ޕާޓީން ވަނީ އެއްބަސް ވެފައެވެ. އެހެން ނަމަވެސް އެ މަސައްކަތްތަކަކީ ކޮބައިކަން ނިންމާނީ އިތުރަށް މަޝްވަރާކުރުމަށް ފަހު ކަމަށް ޖުމްހޫރީ ޕާޓީން ވަނީ ބުނެފައެވެ.
މި މަޝްވަރާތަކުގައި ޖުމްހޫރީ ޕާޓީގެ ފަރާތުން ބައިވެރިވީ އެ ޕާޓީގެ ދެ ނައިބު ލީޑަރުން ކަމުގައިވާ އަމީން އިބްރާހިމް އަދި ޑރ. ހުސައިން ރަޝީދު ހަސަންގެ އިތުރުން ރައްޔިތުންގެ މަޖިލީހުގެ ކިނބިދޫ ދާއިރާގެ މެމްބަރު އަބްދުﷲ ރިޔާޒާއި މަތިވެރީ ދާއިރާގެ މެމްބަރު ހުސައިން މުހައްމަދާއި ކެންދޫ ދާއިރާގެ މެމްބަރު އަލީ ހުސައިނާއި އަހްމަދު ސަމީރެވެ. އެމްޑީޕީގެ ފަރާތުން ބައިވެރިވީ އެ ޕާޓީގެ ޗެއާޕާސަން އަލީ ވަހީދާއި ރައްޔިތުންގެ މަޖިލީހުގެ ކުރީގެ ރައީސް އަބްދުﷲ ޝާހިދާއި މާލޭ ސިޓީގެ މޭޔަރު މުހައްމަދު ޝިހާބެވެ.
ކިޔުންތެރިންގެ ހިޔާލު