ރައީސް ނަޝީދު ހުށަހަޅުއްވާފައިވާ މައްސަލަ ފަސްކުރެވޭކަށް ނެތް: ހައިކޯޓު

ރައީސް ރައީސް މުހައްމަދު ނަޝީދުގެ ފަރާތްޕުޅުން ލަސްކުރަން އެދިވަޑައިގެން ހުށަހެޅުއްވި މައްސަލަ ފަސްކުރެވެން ނެތް ކަމަށް ހައި ކޯޓުން އަންގައިފިއެވެ.

ހުޅުމާލޭ މެޖިސްޓްރޭޓު ކޯޓުގެ ސައްހަކަން ސާބިތުކުރުމަށް ކުރީގެ ރައީސް ނަޝީދު ހައި ކޯޓަށް ހުށަހަޅުއްވާފައިވާ މައްސަލަ ފަސްކުރުމަށް އެދިވަޑައިގެން އެމަނިކުފާނުގެ ގާނޫނީ ވަކީލުންގެ ޓީމުން ވަނީ ހައިކޯޓަށް މިއަދު ވަނީ ހުށަހަޅުއްވައިފައެވެ.

އެ މައްސަލަ އަންނަ ބުދަ ދުވަހަށް ތާވަލު ކޮށްފައިވަނިކޮށް ރައީސް ނަޝީދުގެ ގާނޫނީ ވަކީލުންގެ ޓީމުން އެ މައްސަލަ ފަސްކުރުމަށް އެދިފައިވަނީ އެ މައްސަލައާއި ގުޅޭ މުހިންމު ދިރާސާތަކެއް ކުރުމަށް ކަމަށް އެ މަނިކުފާނުގެ އޮފީހުން ބުނެއެވެ.

" ހައި ކޯޓުން އެ މައްސަލަ ބައްލަވައި ނިންމަވާއިރު ކޯޓުން ކުރައްވަފާނެ ހުކުމަކީ ދަށު މަރުހަލާގައި ހިނގަމުންދާ ރައީސް މުހައްމަދު ނަޝީދުގެ މަސްލަހަތު އޮތް މައްސަލައަކާ ސީދާ ގޮތުން ގުޅުން ހުރި ހުކުމަކަށް ވެދާނެތީ، ޝަރީއަތުގެ މި މަރުހަލާގައި ރައީސް މުހައްމަދު ނަޝީދުގެ ފަރާތްޕުޅުން އިތުރަށް ވާހަކަ ދެއްކުމުގެ ކުރިން ކުރަންޖެހޭ މުހިއްމު ދިރާސާތަކެއް ހުރުމާއެކު އެ ފުރުސަތު ދެއްވުމަށް،" ރައީސް ނަޝީދުގެ އޮފީހުން ނެރެފައިވާ ބަޔާނުގައި ބުނެފައިވެއެވެ.

ހުޅުމާލޭ މެޖިސްޓްރޭޓު ކޯޓުން ބަލަމުން އަންނަ މައްސަލައަކީ ރައީސް ނަޝީދުގެ ވެރިކަމުގައި ކްރިމިނަލް ކޯޓުގެ އިސް ގާޒީ އަބްދުﷲ މުހައްމަދު (އަބްދުﷲ) ގާޒީ ހައްޔަރު ކޮށްގެން ގެންގުޅުނު މައްސަލައެވެ. އެ މައްސަލައިގައި ރައީސް ނަޝީދުގެ ގާނޫނީ ވަކީލުންގެ ޓީމުން އުފުލާފައިވާ ދައުވާއަކީ، ހުޅުމާލޭ ކޯޓުގައި ރައީސް ނަޝީދުގެ މައްސަލަ ބަލާ ބެންޗު އެކުލަވާލާފައިވަނީ ޖޭއެސްސީ ކަމުން ވާތީ އެކަމުގެ ކަންބޮޑުވުމެވެ. ރައީސް ނަޝީދުގެ ޓީމުން ބުނެފައިވަނީ ކޮންމެ ކޯޓެއްގެ ވެސް މައްސަލަ ބަލާ ބެންޗު އެކުލަވައިލާނީ އެ ކޯޓެއްގެ އިސް ގާޒީ ކަމަށް ގާނޫނުގައި ބުނެފައިވާކަމަށެވެ. އެހެން ނަމަވެސް ޖޭއެސްސީން ބުނަމުން އަންނަނީ އެ މައްސަލައިގައި ބެންޗު އެކުލަވާލީ ސްޕްރީމް ކޯޓުގެ ލަފާގެ މަތިން ކަމަށެވެ. އަދި އެ މައްސަލަ ބެލުމުގެ އިހުތިޔާރު ހައި ކޯޓަށް ނޯންނާނެ ކަމަށެވެ.

ރައީސް ނަޝީދުގެ ހައިކޯޓަށް ހުޅަހެޅުއްވި މައްސަލަ މެދު ކެނޑިފައިވަނީ، ހައިކޯޓުގެ އިސްގާޒީ އަހުމަދު ޝަރީފް ޗުއްޓީގައި ހުންނަވަނިކޮށް ޖޭއެސްސީން އޭނާ ސަސްޕެންޑު ކުރުމުންނެނެވެ. މިހާރު އޭނާ ވަނީ ޖުވޭނިއަލް ކޯޓަށް ބަދަލުވެސް ކޮށްފައެވެ.

އަންނަ ބުދަ ދުވަހަށް ހައިކޯޓުގައި ތާވަލުކޮށްފައިވަނީ ރައީސް ނަޝީދު ހުށަހަޅުއްވާފައިވާ މައްސަލައިގެ އިބްތިދާއީ އަޑުއެހުމެވެ. އިބްތިދާއީ އަޑުއެހުމަށްފަހު ދެން އޮންނާނީ ހުކުމް އިއްވުމެވެ.