މޯބައިލް ވަސީލަތްތަކުން ޓީވީ ބެލޭ ހިދުމަތެއް އުރީދޫން ފަށައިފި

މޯބައިލް ޑޭޓާ ބޭނުންކުރެވޭ ވަސީލަތްތައް މެދުވެރިކޮށް ޓީވީ ބަލައިލެވޭ ހިދުމަތެއް އުރީދޫން ފަށައިފިއެވެ.

އުރީދޫން މިއަދު ތައާރަފްކުރި ހިދުމަތް ބޭނުންކުރުމަށް “GO” ޖައައްސަވާފައި 5577 އަށް މެސެޖު ކުރުމުން ހިދުމަތް ލިބެމުން އަންނާނެކަމަށް އުރީދޫން ބުނެއެވެ. 

ޕްލޭ ކާސްޓް މޯލްޑިވްސް އާ ގުޅިގެން ތައާރަފުކޮށްފައިވާ އެ ޚިދުމަތުގެ ދަށުން ރާއްޖޭގެ ފަސް ޗެނަލެއް މިހާރުވެސް ވަނީ ދޫކޮށްފައެވެ. އަންނަ މަހުގެ 28 ވަނަ ދުވަހާ ހަމައަށް އެ ހިދުމަތް އެއްވެސް ފީއަކާއި ނުލައި ބަލައި ލެވޭނެކަމަށް އުރީދޫން ބުނެއެވެ.

އަންނަ މަހުގެ ތެރޭގައި އުރީދޫން އާންމުކުރާ ޕެކޭޖުތަކުގެ ދަށުން އިތުރު 30 ވަރަކަށް ޗެނަލު ދޫކުރެވޭނެކަމަށް އެ ކުންފުނިން ބުނެއެވެ.