ހަތިޔާރަކީ ނާޒިމާއި އޭނާގެ އާއިލާއާ ގުޅުންހުރި އެއްޗެއް ނޫން- ވަކީލުން
22 ޖެނުއަރީ 2015 15:44
ކުރީގެ ޑިފެންސް މިނިސްޓަރ މުޙައްމަދު ނާޒިމްގެ އަނބިކަނަބަލުންގެ ގޭގެ އެޕާޓުމެންޓަކުން ފެނިފައިވާ ހަތިޔާރުފަދަ ތަކެއްޗަކީ ނާޒިމާއި އޭނާގެ އާއިލާއާ ގުޅުންހުރި އެއްޗެއްނޫން ކަމަށް ނާޒިމްގެ ވަކީލުންގެ ޓީމުން ބުނެފިއެވެ.
އެޓީމުން މިއަދު އެގޮތަށް ބަޔާން ނެރުނުއިރު ފުލުހުންވަނީ އެގެއިން ނުރައްކާތެރި ހަތިޔާރު ފެނުނު ކަމަށް ބުނެފައެވެ. އެބަޔާނުގައި ބުނެފައިވަނީ އެގެއިން ފެނުނު ކަމަށް ބުނާ ހަތިޔާރަކީ ކާކުގެ އެއްޗެއް ކަމެއް ހާމަކުރައްވަން އެނގިވަޑައިނުގަންނަވާކަން ހާމަކުރައްވަން ނާޒިމް ބޭނުންފުޅުވާ ކަމަށެވެ. އަދި ގާނޫނާ ޚިލާފު އެއްވެސް ކަމެއް ނާޒިމް ކުރައްވާފައިވާނުވާނެ ކަމަށާއި އަދި ނުވެސް ކުރައްވާނެ ކަމަށް ވަކީލުން ހާމަކުރައްވާފައިވެއެވެ. އަދި އެފަދަ އެއްވެސް ކަމެއް ކުރިއަށް އޮތްތަނުގައި ނުކުރާނޭ ކަމުގެ ޔަގީންކަން ނާޒިމްގެ ފަރާތުން އެންމެހާ ފަރާތްތަކަށް ވަކީލުންގެ ޓީމުންވަނީ ހާމަކުރައްވާފައެވެ.
ނާޒިމްގެ ވަކީލަކަށް ހަމަޖައްސާފައިވަނީ ކުރީގެ އެޓަރނީ ޖެނެރަލް ޢާއިޝަތު ޢާޒިމާ ޝަކޫރު ކަމަށް ނާޒިމް ވަނީ ވިދާޅުވެފައެވެ.ނާޒިމްވިދާޅުވެފައިވަނީ ފުލުހުންގެ ތަހުގީގަށް ފުރިހަމަ އެއްބާރުލުން ދެއްވާނެ ކަމަށެވެ. އަދި ކުރިއަށްއޮތްތަނުގައިވެސް އެއްބާރު ލެއްވުން ދެއްވަމުން ގެންދަވާނެ ކަމަށް ނާޒިމް ވިދާޅުވެފައިވެއެވެ.
"ގަދަ ކީރިތިވަންތަ މާތް ﷲގެ ހަޟްރަތުން ވާގި އެދި ހުރެ، ކުރެވިފައިވާ ތުހުމަތުން ބަރީއަ ވުމުގެ މަސައްކަތް ކުރިއަށް ގެންދާނޭ ކަމަށާއި، ތެދު ހަގީގަތާއި ހައްގުގެ މަގުގައި ކުރެވޭ މި މަސައްކަތުގައި މާތް ﷲގެ ވާގިފުޅާއެކު، ކާމިޔާބީ ލިބޭނެ ކަމުގައި ފުރިހަމަ އުންމީދު އެބައޮތް ކަމުގައި ވެސް އޭނާ ހާމަކުރައްވަ އެވެ،" ވަކީލުންގެ ޓީމުން ނެެރެފައިވާ ބަޔާނުގައި ވެއެވެ.
ނާޒިމް އުޅުއްވާ ގޭގެ އެޕާޓްމެންޓަށް ވަދެ ފުލުހުން އެގެ ފާސްކުރުމުން ނާޒިމް ވިދާޅުވެފައިވަނީ އާއިލާއާއެކު ޑިފެންސް މިނިސްޓަރ އަވަހާރަށް ފުޅަށް އޮންނަވަނިކޮށް ދަންވަރުގެ ވަގުތެއްގައި އެގެއަށް ފުލުހުންވަދެ ބާލައި ފާސްކުރުމުން އެއިން ދޭހަވަނީ ކޮންމެ ގެއަކަށްވެސް އެގޮތަށް ފުލުހުންވަދެފާނެކަން ކަމަށެވެ. މިހާދިސާއަށްފަހު ޑިފެންސް މިނިސްޓަރުކަމުން ނާޒިމްވަނީ ވަކިކުރައްވާފައެވެ.
ކިޔުންތެރިންގެ ހިޔާލު