ސަރުކާރުން އަންނަނީ ރައީސް ނަޝީދު ހައްޔަރުކުރުމަށް ރާވަމުން: އެމްޑީޕީ

އިދިކޮޅު ލީޑަރު އަދި އެމްޑީޕީގެ ރައީސް މުހައްމަދު ނަޝީދު ހައްޔަރުކުރުމަށް ސަރުކާރުން ރާވަމުން އަންނަކަމަށް އެ ޕާޓީން ތުހުމަތުކޮށްފިއެވެ.

އެމްޑީޕީން ނެރުނު ބަޔާނެއްގައި ބުނެފައިވަނީ، ސަރުކާރުން އަންނަނީ ސިޔާސީ އެކި ފަރާތްތަކަށް ބިރުދައްކަމުން ކަމަށެވެ. އަދި ރައީސް ނަޝީދު ހައްޔަރު ކުރުމަށް ސަރުކާރުން މަސައްކަތްކުރާކަމުގެ މައުލޫމާތު ލިބިފައިވާކަމަށެވެ. 

ކުރީގެ ރައީސްކަން ކުރައްވާފައިވާ ބޭފުޅަކަށް ޤާނޫނު އަސާސީންނާއި އަދި ވަކި ޚާއްޞަ ޤާނޫނަކުން އެމަނިކުފާނަށް ރައްކާތެރިކަން ކަށަވަރުކޮށްދިނުމަށް ދައުލަތުގެ މައްޗަށް ލާޒިމުވެގެންވާކަމަށް ވެސް އެ ބަޔާނުގައި ބުނެފައިވެއެވެ. 

ޒައިދް ފައުންޑޭޝަން ގެ ފަރާތުން ބާއްވާ ރިނިއުބަލް އެނާޖީ އިނާމް ދިނުގެ ހަފްލާގައި ބައިވެރިވެ ވަޑައިގަތުމަށް ރައީސް ނަޝީދު މިވަގުތު ހުންނެވީ އަބޫދާބީގައިއެވެ. އެމަނިކުފާނު މިއަދު ކުރެއްވި ޓުވީޓެއްގައި ވިދާޅުވެފައިވަނީ، އެމަނިކުފާނު ހައްޔަރު ކުރުމަށް ސަރުކާރުން މަސައްކަތް ކުރަމުން އަންނާތީ ދަތުރުފުޅު ކުރުކޮށްލެއްވުމަށްފަހު ރާއްޖެ ވަޑައިގަތުމަށް ނިންމަވާފައިވާކަމަށެވެ. 

މި މައްސަލައިގައި ސަރުކާރުން އަދި އެއްވެސް އެއްޗެއްނުބުނެއެެވެ.