ޑިފެންސް މިނިސްޓަރގެ ގެކޮޅު ބަލައި ފާސްކުރި ސަބަބު ރައްޔިތުންނަށް ސާފުވާން ޖެހޭނެ-އެމްޑީޕީ

ޑިފެންސް މިނިސްޓަރ މުޙައްމަދު ނާޒިމްގެ ގެކޮޅަށް ދަންވަރު ފުލުހުންވަދެ ބަލައި ފާސްކުރި ސަބަބު ރައްޔިތުންނަށް ސާފުވާން ޖެހޭނެ ކަމަށް އެމްޑީޕީން ބުނެފިއެވެ.

އެމްޑީޕީން މިހެން ބުނެފައިވަނީ ނާޒިމް އުޅުއްވާ ގެކޮޅަށް މިދިޔަ ހޮނިހިރު ދުވަހުގެރޭ ދަންވަރުގެ ވަގުތެއްގައި ފުލުހުންވަދެ އެގެއިން ބައެއް ސާމާނުތައް ގެންގޮސްފައިވާ މައްސަލައާ ގުޅިގެން ނެރެފައިވާ ބަޔާނެއްގައެވެ.

ފުލުހުން ބުނެފައިވަނީ އެގެއަށްވަދެ ހޯދާފައިވަނީ ފުލުހުން ކުރަމުންދާ ތަހުގީގަކަށް ބޭނުންވާ ބައެއް މައުލޫމާތު ކަމަށެވެ. ތަހުގީގަށް ބޭނުންވާ މައުލޫމާތު ލިބިފައިވިޔަސް އެއީ ކޮން ތަހުގީގެއް ކަމެއް ފުލުހުން ހާމައެއް ނުކުރެއެވެ.

އެބަޔާނުގައި ބުނެފައިވަނީ މޫނު ނިވާކޮށްގެން ތިބި ފުލުހުންތަކެއް ކޯޓު އަމުރެއްގެ ދަށުން "ޤައުމެއްގެ ދިފާއީ ވަޒީރެއް ދިރިއުޅުއްވާ ތަނެއްގެ ދޮރުތައް ރޭގަނޑުގެ މެންދަމުގެ ވަގުތެއްގައި ވައްޓައިލައި އެތަނެއް ފާސްކުރާކުރުމަކީ އާދައިގެ ކަމެއްކަމުގައި ނުދެކޭ" ކަމަށެވެ.

ޢާންމު އުސޫލުން ބެލިނަމަވެސް މީހުން ދިރިއުޅޭ ގެއަކަށް މެންދަމުގެ ވަގުތެއްގައި ދޮރުވައްޓައިލައިގެން ވަނުމަށް ކޯޓު އަމުރު ފުލުހުންނަށް ދޭންވާނީ ބޮޑު ކުށެއްގައި އެކަށީގެންވާ ހެކިތަކެއް ހުރެގެން ކަމަށްވެސް އެމްޑީޕީގެ ބަޔާނުގައި ބުނެފައިވެއެވެ.

" އަމުދުން ޤައުމުގެ ދިފާއީ ވަޒީރުގެ މައްޗަށް ކުށެއްގައި ތުހުމަތުކޮށް އެނާ ދިރިއުޅުއްވާ ތަނަކަށް މިގޮތަށް ފުލުހުން ވަނުމުގައި މާބޮޑަށް ބެލެވިފައި ވާނޭކަމަށް ދެކެންޖެހެއެވެ. އަދި މީޑިއާ އިން ރިޕޯރޓްކުރާ ގޮތުގައި ދިފާއީ ވަޒީރު މުޙައްމަދު ނާޒިމް ދިރިއުޅުއްވާ އެޕާރޓްމެންޓަށް ފުލުހުން އެގޮތަށް ރޭގައި ވަދެފައިވަނީ ޓެރަރިޒިމާއި، ހަތިޔާރު ގެންގުޅުމާއި އަދި ގޮވާ ތަކެއްޗާ ގުޅުންހުރި ކަމެއްގައިކަން ފާހަގަކުރަމެވެ." އެބަޔާނުގައި ބުނެފައިވެއެވެ.

"ސަރުކާރުން މި ޢަމަލު ހިންގި ސަބަބު ރައްޔިތުންނަށް ސާފުކޮށްނުދިނުމަކީ މިޕާރޓީން އިންތިހާއަށް ކަންބޮޑުވާކަމެކެވެ. އަދި ދިފާއީ ވަޒީރާ މެދު ސަރުކާރުގެ އިތުބާރު އޮތްކަމަށް ސަރުކާރުން ވިދާޅުވާއިރު، އެކަށީގެންވާ ހެކިތަކެއް ހުރެގެންކަމަށް ބުނެ ކޯޓު އަމުރެއް ހޯދައި، ސަރުކާރުން ފުލުހުން ފޮނުވައިގެން ދޮރުތައް ވައްޓައިލައި، މި ޢަމަލުތައް މި ސަރުކާރުގެ ދިފާއީ ވަޒީރާމެދު ހިންގާފައިވަނީ ސަރުކާރުގެ ތެރޭގައި އަނެއްކާ އެހެން ސަރުކާރެއް އޮވެގެން ކަމަށް ދޭހަވާގޮތަށް ވާހަކަދެއްކުމަކީ ވެސް މި ޕާރޓީން އިންތިހާއަށް ކަންބޮޑުވަމެވެ."

ނާޒިމްގެ ގެކޮޅަށްވަދެ އެގެކޮޅު ބަލައި ފާސްކޮށްފައިވަނީ މިނިސްޓަރަށް ދޭންޖެހޭ ގަދަރާއި އިއްޒތް ދެއްވައިގެން ކަމަށް ފުލުހުންވަނީ ބުނެފައެވެ. ނަމަވެސް އެމްޑީޕީން ބުނެފައިވަނީ "ދިފާއީ ވަޒީރަށް އިޙްތިރާމްކޮށްގެންކަމަށް (ފުލުހުން) ބުނާއިރު، މެންދަމުގެ ވަގުތެއްގައި އެންމެހައި ދޮރެއް ވައްޓައިލުމަށްފަހު ދިފާއީ ވަޒީރު ދިރިއުޅުއްވާ ތަނަން ފުލުހުންތަކެއް ވަނުމަކީ އިޙްތިރާމުގެ ބައެއްކަމުގައި ވަނީ ނަމަ، މިއީ ވެސް މި ޕާރޓީން ކަންބޮޑުވާކަމެކެވެ."