އަރަންޖެހުނު ކޮންމެ އޮޑިއަކަށް އަރާނަން: ގާސިމް

ގާނޫނު އަސާސީ ހިމާޔަތްކުރުމަށް އަރަންޖެހުނު ކޮންމެ އޮޑިއަކަށް އަރާނެކަމަށް ޖުމްހޫރީ ޕާޓީގެ ލީޑަރ ގާސިމް އިބްރާހިމް ވިދާޅުވެއްޖެއެވެ.

ގާސިމް ދިރިއުޅުއްވާ މާފަންނު ވިލާ ބަލައި ފާސްކުރުމަށް ކޯޓުއަމުރެއް ނެރުނުކަމަށް ފެތުރުނު ހަބަރާ ގުޅިގެން މިއަދު އެމަނިކުފާނުގެ ސަޕޯޓަރުން ވަނީ އެގޭ ދޮށަށް އެއްވެފައެވެ. މި މައްސަލައާއި ގުޅިގެން ގާސިމް ދެއްވި ނިއުސް ކޮންފަރެންސްގައި ވިދާޅުވީ، ރާއްޖެއަށް ރައްކާތެރިކަމާ އަމަން އަމާންކަން އޮތީ ގާނޫނު އަސާސީ ހިމާޔަތްކޮށްގެން ކަމަށެވެ. 

ވެރިކަން ކުރަންޖެހެނީ ރައްޔިތުންނަށް ބިރުދައްކައިގެން ނޫންކަމަށާ، ރައްޔިތުންނަށް ހިދުމަތްކޮށްދިނުމުގައި ހަމައެކަނި ވޯޓުދިން މީހުންނަށް ބެލުމަކީ އުސޫލެއް ނޫންކަމަށެވެ. 

"ވެރިކަމުގައި ހުންނަވާ ބޭފުޅަކީ ވަރަށް އިހްލާސްތެރިކަމާ އެކު ހައްގުތަކަށް ހުރުމަތްތެރިކޮށް ހިތައިގެން ކުރަންޖެހޭ ކަމެއް ކުރަންޖެހޭ ބޭފުޅެއް. ވެރިކަމުގައި ހުންނަ ބޭފުޅަކީ އެއްވެސް ރައްޔިތަކު ތަފާތުކުރުމެއް ނެތި ހަމަހަމަކަމާއި އިންސާފުން ކަންތައްކޮށްދެއްވަން ޖެހިވަޑައިގަންނަވާ ބޭފުޅެއް. އަރަން ޖެހުނު ކޮންމެ އޮޑިއަކަށް ނަމަވެސް އަޅުގަނޑުމެން އަރާނަން،" ގާސިމް ވިދާޅުވިއެވެ. 

ކިތަންމެ ބާރުގަދަ ބޭފުޅަކާ ކުރިމަތިލާން ވެސް "ތުރުތުރު" ނާޅާނެކަމަށް ގާސިމް ވިދާޅުވިއެވެ. އެމަނިކުފާނު ހުންނެވީ ގާނޫނީ ހުދޫދުގެ ތެރޭގައި ކަމަށް ވެސް ގާސިމް ވިދާޅުވިއެވެ.