ސަރުކާރުން ގެންދަނީ އަސާސީ ހައްގުތައް ހަނިކުރަމުން: ރައީސް ނަޝީދު

ރައީސުލް ޖުމްހޫރިއްޔާ އަބްދުﷲ ޔާމީންގެ ސަރުކާރުން ގެންދަވަނީ އަސާސީ ހައްގުތައް ހަނިކުރަމުންކަމަށް އިދިކޮޅު ލީޑަރ ރައީސް މުހައްމަދު ނަޝީދު ވިދާޅުވެއްޖެއެވެ.

ޑިމޮކްރަސީއަށް އައު އުންމީދެއްގެ ނަމުގައި އެމްޑީޕީން މިރޭ ކާނިވާ ސަރަހައްދުގައި ބޭއްވި ޖަލްސާގައި ވާހަކަ ދައްކަވަމުން ރައީސް ނަޝީދު ވިދާޅުވީ، ކޮންމެ ދުވަހެއްގެ ކޮންމެ ވަގުތެއްގައި ވެސް އެމްޑީޕީ އޮތީ ރައީސް ޔާމީނުގެ ސަރުކާރާއި ކުރިމަތިލާން ކެރިގެން ކަމަށެެވެ. 

"ސަރުކާރުން ގެންދަވަނީ ރައްޔިތުންގެ އަސާސީ ހައްގުތައް ހަނިކުރަމުން. ކަރުނަ ގޭހަކަސް، ދަގަނޑު މުގުރަކަސް، އަނދަގޮނޑިއަކަސް، އެންގަލަކަސް، ޗޭނު ބިޑިއަކަސް، މުޅި އުމުރުގެ އަނދަގޮނޑިއަކަށް އަޅުގަނޑުމެން ދެމިތިބޭނަން. މަނިކުފާނަކަށް އަޅުގަނޑުމެންނެއް ފަހަތަކަށް ނުޖެއްސޭނެ." ރައީސް ނަޝީދު ވިދާޅުވިއެވެ. 

ރައީސް ޔާމީނު ގާނޫނޫއަސާސީއަށް ގޮންޖައްސަވަމުން ގެންދަވާއިރު އެމްޑީޕީން މަޑުން ނުތިބޭނެކަމަށެވެ. 

"މާލިއްޔަތު ގާނޫނަށް ތަކުރާރުކޮށް ހިލާފުވެވަޑައިގަންނަވަމުން ގެންދަވަނީ. ދައުލަތުގެ ހަރަދު ބަރަދަށް ޒިންމާދާރުވުމުގެ ގާނޫނާ ހިލާފު. މައުލޫމާތު ލިބިގަތުމާއި ހޯދުމުގެ ހައްގަށް އަރައިގަނޭ،" 

ރައީސް ޔާމީނު މަސައްކަތް ކުރައްވަނީ ދިވެހިރާއްޖެ އަލުން އަނބުރާ ހުދުމުހުތާރު ވެރިކަމެއްގެ ތެރެއަށް ގެންދިއުމަށްކަމަށް ވެސް ރައީސް ނަޝީދު ވިދާޅުވިއެވެ. އަދި ރައީސް ޔާމީނު އެ ބީދައިން ކުރައްވާ މަސައްކަތް ޕުޅު ފެއިލް ކޮށްލައްވާނެކަމަށް ވެސް ރައީސް ނަޝީދު ވަނީ މިރެޭގެ ޖަލްސާގައި ވިދާޅުވެފައެވެ.