ފަންސަވީ ބުރިއަށް ގެތައް އިމާރާތް ކުރުމުގެ ހުއްދަދޭން ނިންމައިފިން-ރައީސް ޔާމީން

ފަންސަވީ ނުވަތަ ވިހި ބުރިއަށް ގެތައް އިމާރާތް ކުރުމުގެ ހުއްދަދޭން ސަރުކާރުން ނިންމަވައިިފި ކަމަށް ރައީސުލްޖުމްހުރިއްޔާ ޢަބްދުﷲ ޔާމީން އަބްދުލް ގައްޔޫމް ދެންމެ ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ ހުޅުމާލޭގެ ދެވަނަ ފިޔަވަހި ހިއްކުމުގެ މަޝްރޫއު ފެށުމަށް މިހާރު ކުރިއަށް ގެންދާ ޖަލްސާގައި ވާހަކަފުޅު ދައްކަވަމުންނެވެ.

އެމަނިކުފާނު ވިދާޅުވީ މާލެއާއި، މާލޭ ކައިރި ހިސާބުތަކުގައި 20 ނުވަތަ 25 ބުރިއަށް އިމާރާތް ކުރުމުގެ ހުއްދަ ދެއްވަން ނިންމެވީ ތަހުލީލު ކުރުމަށްފަހު އެވަރުގެ "ހަކަތަ" ބިމުގައި ހުރިކަމަށް ދައްކާތީ ކަމަށެވެ. އެހެން ކަމުން ކުރިއަށްއޮތް ތަނުގައި ސަރުކާރުން ހިތްވަރު ދޭނީ އުސްކޮށް އިމާރާތް ކުރުމަށް ކަމަށް ވިދާޅުވިއެވެ.

ރައީސް ޔާމީން ވިދާޅުވީ ދަފްތަރުގައިވެސް ވަރަށް ގިނަމީހުން އެބައުޅޭ ކަމަށެވެ. އެމީހުންނަށްވެސް ގެދޮރުގެ ހިޔާވަހިކަން ލިބެންޖެހޭ ކަމަށެވެ. އެގޮތުން ހުޅުމާލެވެސް އުސްކުރަންޖެހޭ ކަމަށް ވިދާޅުވިއެވެ.

ގެދޮރުގެ ފަސޭހަކަން ފަހިކޮށްދިނުމުގެ ގޮތުން މާލެއިމން ޖާގަ ހުސްކުރުމުގެ މަސައްކަތްވެސް ވަރަށް އަވަހަށް ސަރުކާރުން ފަށާނެ ކަމަށްވެސް ވިދާޅުވިއެވެ. އަޖުމަބެލުމުގެ ގޮތުން އެކަން ވަރަށް އަވަހަށް ކުރައްވާނެ ކަމަށާއި އެކަން ކުރައްވާނެ ގޮތްވެސް ސަރުކާރުން އެކުލަވާލައިފައިވާނެ ކަމަށެވެ. އެގޮތުން ސްކޫލްތައް ހިމޭނެ ސަރަހައްދުގައި މިކަން ފަށާނެ ކަމަށް ރައީސް ވިދާޅުވިއެވެ.

ރައީސް ޔާމީން ވިދާޅުވީ ހުޅުމާލެ ތަރައްގީ ކުރަނީ މާލޭގެ ރައްޔިތުންނަށް އެކަނި ނޫން ކަމަށެވެ. އެތަން ތަރައްގީ ކުރަނީ ހުރިހާ ދިވެހިންނަށް ކަމަށްވެސް ވިދާޅުވިއެވެ. އެގޮތުން ވ. ފުލިދޫގެ ރައްޔިތުންގެ 80 އިންސައްތަ މީހުން ހުޅުމާލެއަށް ބަދަލުވުމަށް އެދި ޕެޓިޝަނެއް ހުށަހަޅާފައިވާ ކަމަށް ވިދާޅުވިއެވެ. އެހެން ކަމުން ހުޅުމާލެއަކީ އެންމެންގެ ސަހަރު ކަމަށް ހެދުމަށްވެސް ވިދާޅުވިއެވެ.

އެމަނިކުފާނު ވިދާޅުވީ ހުޅުމާލެ ވެގެންދާނީ ވަޒީފާގެ ފުރުސަތުއޮތް ކަންކަން ފަސޭހަ ޒުވާނުންގެ ސިޓީއަކަށް ކަމަށެވެ. އެހެން ނަމަވެސް ހުޅުމާލެއަކީ ހަމައެކަނި ޒުވާނުންގެ ތަނެއް ނޫންކަމަށެވެ. އުމުރުން ދޮށީ މީހުންގެ މަތިން ހަނދާން ނައްތާލުމަކީ އެއްގޮތަކަށްވެސް ސަރުކާރުން ކުރައްވާނެކަމެއް ނޫންކަމަަށްވެސް ރައީސް ވިދާޅުވިއެވެ.

އެމަނިކުފާނު ވިދާޅުވީ ކޮންމެ ޒުވާނަކުވެސް އެމީހެއްގެ ހަޔާތް ރަނގަޅު ކުރުމަށް ބޭނުންވާނެ ކަމަށެވެ. ޒުވާން އުމުރުގައި ދަރިން ލިބި އުފާވެރި ހަޔާތެއް ބޭނުންވާނެ ކަމަށެވެ. އެހެން ކަމުން މަސްތުވާތަކެއްޗާއި އެފަދަ އެހެން ކަންކަމުން ދުރުވެތިބުމަށް ޒުވާނުންނަށް ގޮވައިލެއްވިއެވެ.

ސަރުކާރުން ޒުވާނުންނަށް ބޭނުންވާ ކަންކަން ކޮށްދެއްވާނެ ކަމަށްވެސް އެމަނިކުފާނު ވިދާޅުވިއެވެ. ޒުވާނުންގެ އަތުގައި ވަރަށް ބޮޑު ބާރެއް އެބައޮތް ކަމަށާއި، އެކަން ޒުވާނުން ހަނދާން ނައްތައިގެން ނުވާނެ ކަމަށްވެސް ރައީސް ވިދާޅުވިއެވެ. އެހެން ކަމުން ހަސަދަވެރިކަމާއި ދުރަށް ގޮސް އެންމެންވެސް އެއްގަލަކަށް އަރައި އެކުގައި މަސައްކަތް ކުރަންޖެހޭ ކަމަށް ރައީސް ވިދާޅުވިއެވެ.

އެމަނިކުފާނު ވިދާޅުވީ ހުރިހާ ސަރުކާރަކުންވެސް އޮތީ ޒުވާނުންގެ އަތުގައި ހިފަން ތައްޔާރަށް ކަމަށެވެ. ކޮންމެ ޒުވާނަކީ ފިހާރަތަކުގެ ސޭޓުންނަށް، ކުރޫޒް ލައިނާ ތަކުގެ ކައްޕީންނަށް، ވިޔަފާރިވެރިންނަށް ވުމަށް ރައީސް އެދިވަޑައިގެންނެވިއެވެ. ޒުވާނުންނަކީ ބަލިމަޑުކަމެއްގެ ތެރޭގައި އުޅޭ ބައަކަށްވެގެން ދައުލަތް ކުރިއަށް ގެންދަން ދަތިވާނެ ކަމަށް ވިދާޅުވިއެވެ.