ރައީސް ޔާމީން ސިންގަޕޫރަށް ކުރެއްވި ދަތުރުފުޅުތަކުގެ މައުލޫމާތު ހޯދަން އެމްޑީޕީން އެދިއްޖެ
11 ޖެނުއަރީ 2015 18:26
ރައީސް ޔާމީން ސިންގަޕޫރަށް ކުރެއްވި ދަތުރުފުޅުތަކުގެ މައުލޫމާތާއި އެމަނިކުފާނުގެ ސިއްހީ ހާލުކޮޅާ ބެހޭ މައުލޫމާތު ހޯދަން އެމްޑީޕީން ރައީސް އޮފީހަށް ސީޓީއެއް ފޮނުވައިފިއެވެ.
އެމްޑީޕީގެ ޗެއާރޕާސަންގެ ނާއިބު ސޮއިކުރައްވައި، ރައީސުލްޖުމްހުރިއްޔާގެ ނާއިބު ޑރ. މުހައްމަދު ޖަމީލް އަހުމަދަށް ފޮނުވާފައިވާ ސިޓީގައި ބުނެފައިވަނީ ރައީސް ޔާމީން ސިންގަޕޫރަށް ވަޑައިގެންފައިވާ އަދަދާއި، އެފަދަ ދަތުރުފުޅުތަކުގައި ސިންގަޕޫރުގައި ހޭދަވި ދުވަސްތަކާއި، އެ ދަތުރުފުޅުތަކުގައި ރައީސުލްޖުމްހޫރިއްޔާ އަރިހުގައި ބައިވެރިވެވަޑައިގެންނެވި ބޭފުޅުންގެ އަދަދާއި، އެދަތުރުފުޅުތަކަށް ދައުލަތުން ޚަރަދުވި އަދަދާއި، ރައީސުލްޖުމްހޫރިއްޔާގެ ސިއްޙީ ހާލުކޮޅާ ބެހޭގޮތުން މައުލޫމާތު ދިނުމަށެވެ.
އެސިޓީގައި ބުނެފައިވަނީ ދިވެހި ދައުލަތުގެ އިޚުލާޞްތެރި އިދިކޮޅު ޕާޓީއެއްގެ ހައިޞިއްޔަތުން، ރައީސުލްޖުމްހޫރިއްޔާގެ ސިއްޙީ ހާލުކޮޅާ ގުޅޭގޮތުން ލިބެމުންދާ ޚަބަރުތަކާއި، ޤާނޫނު އަސާސީގެ 123 ވަނަ މާއްދާ އަދި 124 ވަނަ މާއްދާގައި ވާގޮތުގެ މަތިން ރައީސުލްޖުމްހޫރިއްޔާގެ މަޤާމުގެ ޒިންމާތަކާއި މަސްއޫލިއްޔަތު އަދާކުރަން ނުކުޅެދިއްޖެ ހާލަތެއް ދިމާވެފައިވާކަމަށް ފެންނާތީ އެކަމާއި ކަންބޮޑުވުން އެމްޑީޕީންވަނީ ފާޅުކޮށްފައެވެ.
ރައީސުލްޖުމްހޫރިއްޔާގެ މަޤާމާއި ހަވާލުވެވަޑައިގަތްފަހުން، އަމިއްލަ ދަތުރުފުޅުތަކުގެ ނަމުގައާއި ރަސްމީ ދަތުރުފުޅުތަކުގެ ނަމުގައި ސިންގަޕޫރަށް ވަޑައިގެންނެވި އަދަދުގެ ތަފްސީލަށް އެސިޓީގައި އެދިފައިވެއެވެ.
ކިޔުންތެރިންގެ ހިޔާލު