ސިއްހަތާއި ތައުލީމުގެ ދާއިރާއިން ގުޅުން ގާއިމްކުރުމަށް ޚާއްސަކަމެއް ދޭނަން- ލަންކާ ބޮޑުވަޒީރު
10 ޖެނުއަރީ 2015 21:49
ޞިއްޙީ ދާއިރާއާއި ތަޢުލީމީ ދާއިރާއިން ރާއްޖެއާއި ސްރީލަންކާ ދެމެދުގައި ގުޅުން ބަދަހި ކުރެއްވުމަށް ލަންކާ ސަރުކާރުން ޚާއްޞަ އަހަންމިއްޔަތެއް ދެއްވާނެ ކަމުގައި އެޤައުމުގެ އައު ބޮޑުވަޒީރު ރަނިލް ވިކްރަމަ ސިންހަ ވިދާޅުވެއްޖެއެވެ.
އެމަނިކުފާނު މިހެން ވިދާޅުވެފައިވަނީ ލަންކާގެ އައު ސަރުކާރުގެ އިސްބޭފުޅުންނަށް މަރުހަބާ ދެންނެވުމަށް އެގައުމަށް މިހާރު ވަޑައިގެން އުޅުއްވާ ރާއްޖޭގެ ޚާރިޖީ ވަޒީރު ދުންޔާ މައުމޫނާއި، ރައީސް އޮފީހުގެ މިނިސްޓަރ މުޙައްމަދު ޙުސައިން ޝަރީފާ ބައްދަލު ކުރައްވައި ދެއްކެވި ވާހަކަ ފުޅުގައެވެ.
މި ބައްދަލުކުރެއްވުމުގައި، އެމަނިކުފާނު ވިދާޅުވެފައިވަނީ ރާއްޖެއާއި ސްރީލަންކާއާ ދެމެދު އޮތް ގާތް ގުޅުން އިތުރަށް ހަރުދަނާކުރެއްވުމަށް މަސައްކަތްކުރައްވާނެ ކަމުގައެވެ. އަދި ބައިނަލްއަޤްވާމީ މައިދާނުގައި ސްރީލަންކާގެ އެއްބާރުލުމާއި ތާއީދު ރާއްޖެއަށް އަބަދުވެސް ލިބެމުންދާނެކަމުގެ ޔަޤީންކަން ބޮޑުވަޒީރު ދެއްވިއެވެ.މިބައްދަލުވުމުގައި ސްރީލަންކާގެ ބޮޑުވަޒީރު ވިދާޅުވެފައިވަނީ ދެޤައުމަށް އެންމެ ފަސޭހަ ވަގުތެއް ބައްލަވާފައި ރާއްޖެއަށް ރަސްމީ ދަތުރުފުޅެއް ކުރައްވާނެ ކަމަށެވެ.
ސްރީލަންކާގެ އާ ސަރުކާރުގެ ދައުރުގައި އެގައުމަށް ރަސްމީ ދަތުރުފުޅެއް ކުރައްވާ ފުރަތަމަ ރައީސެއްގެ ގޮތުން، ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް ސްރީލަންކާއަށް ރަސްމީ ދަތުރުފުޅެއް ކުރެއްވުމަށް ބޮޑުވަޒީރު ވަނީ ދަޢުވަތު ދެއްވާފައެވެ.
ކިޔުންތެރިންގެ ހިޔާލު