ހުޅުމާލޭގެ ދެވަނަ ފިޔަވަހީގެ މަސައްކަތް ދެންލަހެއް ނުވާނެ-ސުހައިލް
10 ޖެނުއަރީ 2015 13:13
ހުޅުމާލޭގެ ދެވަނަ ފިޔަވަހީގެ މަސައްކަތް ފެށުން ދެން ލަހެއްނުވާނެ ކަމަށް ހުޅުމާލެ ޑިވެލޮޕްމެންޓް ކޯޕަރޭޝަން (އެޗުޑީސީ) ގެ މެނޭޖިން ޑިރެކްޓަރ ސުހައިލް އަހުމަދު ވިދާޅުވެއްޖެއެވެ.
އޭނާ ވިދާޅުވީ ދެވަނަ ފިޔަވަހި ހިއްކުމަށް ބޭނުންވާ ބޯޓް (ޑްރެޖަރ) ވެސް މިއަދު ހެނދުނު ވަނީ ރާއްޖެ އައިސްފައި ކަމަށެވެ. އެބޯޓު ރާއްޖެއައިސްފައިވަނީ މިއަދު ހެނދުނުގެ ވަގުތެއްގައެވެ.
މިބޯޓަކީ ބެލްޖިއަމްގެ ޑްރެޖިން އިންޓަރނޭޝަނަލް ކުންފުނީގެ ބޯޓެކެވެ. އެކުންފުންޏަކީ ހުޅުމާލޭގެ ބިން ހިއްކަން ހަވާލު ކޮށްފައިވާ ކުންފުންޏެވެ. މިއަދު ރާއްޖެއައި ބޯޓަކީ އެއްފަހަރާ 4600 ޓަނުގެ ވެލި އުފުލުމުގެ ގާބިލްކަން ލިބިފައިވާ އުޅަނދެކެވެ.
" އަޅުގަނޑު ދަންނަވާނީ އެ ބޯޓް މިހާރު ރާއްޖެ އައިސްފައިވާތީ މަސައްކަތް ކުރިއަށް ގެންދިއުމަށް އެއްވެސް ހުރަހެއް ނެތޭ،" ސުހައިލް ވިދާޅުވެފައިވެއެވެ.
ދެވަނަފިޔަވަހީގެ މަސައްކަތް ނުފެށި ލަސްވީ ބޭނުންވާ ބައެއް ސާމާނު ލިބުމުގެ ދަތުކަން ކުރުމުންނެވެ. ނަަމަވެސް އެހުރިހާ މައްސަލައެއް މިހާރުވަނީ ހައްލުވެފައެވެ. އެހެންކަމުން މަސައްކަތް ފެށުން ދެން ލަހެއް ނުވާނެ ކަމަށް ސުހައިލް ވިދާޅުވިއެވެ. ނަަމަވެސް މަސައްކަތް ފަށާނެ ތާރީޚެއް އޭނާ ހާމަކުރައްވާފައެއް ނުވެއެވެ.
ހުޅުމާލެ ދެވަނަ ފިޔަވަހީގެ ދަށުން ހިއްކާނީ 240 ހެކްޓަރެވެ. މިއީ ބޭންކްއޮފް ސިލޯނުން 30 މިލިއަން ޑޮލަރިގެ ލޯން ނަގައިގެން ކުރިއަށް ގެންދާ މަޝްރޫޢެކެވެ.
ކިޔުންތެރިންގެ ހިޔާލު