ހުރިހާޓީޗަރުންނަށް ހަމަހަމަވާ އުސޫލަކުން މުސާރަ ބޮޑުކުރުމަށް ޖޭޕީން ގޮވާލައިފި
8 ޖެނުއަރީ 2015 16:03
ދިރާސީ އައު އަހަރާއެކު ޓީޗަރުންގެ މުސާރަ ބޮޑުކުރާއިރު ހުރިހާ ޓީޗަރުންނަށް ހަމަހަމަވާ އުސޫލުން މުސާރަ އަށް ބަދަލު ގެނައުމަށް ޖުމްހޫރީޕާޓީ (ޖޭޕީ) އިން ސަރުކާރަށް ގޮވާލައިފިއެވެ.
ޓީޗަރުންގެ މުސާރަ ބޮޑުކުރާނެކަން ރައީސް ޔާމީން އިޢުލާން ކުރެއްވުމުން އެކަމަށް މަރުޙަބާ ކިޔައި ޖޭޕީން ނެެެރެފައިވާ ބަޔާނެއްގައި ބުނެފައިވަނީ އެބަދަލާއެކު ހުރިހާ ޓީޗަރުންވެސް ހިމާޔަތް ކުރެވެންވާނެ ކަމަށެވެ. އަދި އެއްވެސް ޓީޗަރަކު ތަފާތުކޮށްގެން ނުވާނެ ކަމަށްވެސް ބުނެފައިވެއެވެ.
ސަރުކާރުން މުސާރައަށް ބަދަލު ގެންނެވުމަކީ އުފާ ކުރާ ކަމެއް ކަމަށާއި އެކަމާ ގުޅިގެން އެއްވެސް ޓީޗަރެއްގެ ވަޒީފާ ގެއްލިގެން ނުދާނެ ގޮތަކަށް ކަންކަން ހަމަޖެއްސުމަށްވެސް ޖޭޕީން ވަނީ ސަރުކާރުގައި އެދިފައެވެ.
ޓީޗަރުންގެ މުސާރައަށް ބަދަލު ގެންނަން އެޑިޔުކޭޝަން މިނިސްޓްރީންނާއި، ޓީޗަރުންގެ ޖަމިއްޔާއިންވެސް މަސައްކަތް ކޮށްފައިވާ ކަމަށް ރައީސް ޔާމީން ވަނީ ވިދާޅުވެފައެވެ.
ޖޭޕީގެ ބަޔާނުގައި ބުނެފައިވަނީ ޓީޗަރުންގެ މުސާރަ ބޮޑު ކުރުމަށް އެދި އެޕާޓީންވެސްވާނީ ސަރުކާރުގައި އެދިފައި ކަމަށެވެ. މުސާރަ ބޮޑުކޮށްދިނުމަށް އެޕާޓީގެ މަޖިލިސް މެންބަރުން ބުރަ މަސައްކަތްތަކެއް ކޮށްދީފައިވާ ކަމަށްވެސް ބަޔާނުގައި ބުނެފައިވެއެވެ. އެމަސައްކަތްތަކަކީ ޓީޗަރުންގެ ޖަމިއްޔާގެ އެދުމުގެ މަތިން ކޮށްދީފައިވާ މަސައްކަތްތަކެއް ކަމަށްވެސް ބުނެފައިވެއެވެ.
ދިރާސީ އައު އަހަރާ ގުޅިގެން ޓީޗަރުންގެ މުސާރަ ބޮޑުކުރާއިރު މިހާރުލިބޭ މުސާރައިގެ ތިންބައިކުޅަ އެއްބަޔަށްވުރެ ކުޑަނުވާވަރަށް ބޮޑުވެގެންދާނެ ކަމަށް އަންގާރަ ދުވަހުގެރޭ ރައީސް ވަނީ ވިދާޅުވެފައެވެ.
ކިޔުންތެރިންގެ ހިޔާލު