ސިޔާސީނުވެ އިޖުތިމާޢީ ކަންކަމުގައި ހަރަކާތްތެރިވުމަށް ކުޅިވަރުކުޅޭ ފަރާތްތަކަށް ރައީސް ގޮވައިލައްވައިފި

ކުޅިވަރުގެ މައިދާނުގައި ހަރަކާތްތެރިވާ ފަރާތްތަކަކީ ވަރަށް ގިނަ ބައެއްގެ މަޤްބޫލު ޝަޚްސިއްޔަތުން ކަމަށާއި، ޤައުމުގައި ހިންގާ އިޖުތިމާޢީ ކަންކަމުގައި ސިޔާސީނުވެ އެކަންކަން ކަމުގައި އެފަދަ ފަރާތްތަކުން ބައިވެރިވުމަށް ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލް ޤައްޔޫމް ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ ސަރުކާރުގެ ކުޅިވަރު މެނިފެސްޓޯގެ ދަށުން ކުޅިވަރުތަކުގެ ސީނިއަރ އަންހެން އަދި ފިރިހެން ޤައުމީ ސްކޮޑުތަކުގެ ކުޅުންތެރިންނަކީ މުސާރަ ލިބޭ ޕްރޮފެޝަނަލުންގެ ގޮތުގައި ހަމަޖެއްސުމުގެ ވަޢުދު ރަސްމީކޮށް އިފްތިތާޙު ކުރުމަށްޓަކައި ދަރުބާރުގޭގައި ރޭ ބޭއްވި ޙަފްލާގައި ވާހަކަފުޅު ދައްކަވަމުންނެވެ.

އެމަނިކުފާނު ވިދާޅުވީ ދުނިޔޭގެ އެހެން ޤައުމުތަކެކޭ އެއްގޮތަށް ރާއްޖޭގައިވެސް އިޖްތިމާޢީ އެކިކަހަލަ ބަލިމަޑުކަން އާންމުވެފައިވާ ކަމަށެވެ. ކުޅިވަރުގައި ވާދަވެރިކަމާއެކީ، އެންމެކުރިއަށް ދިއުމަށް ބޭނުންވާ ކުއްޖަކީ، އެފަދަ އިޖްތިމާޢީ ބަލިމަޑުކަމުން ދުރުގައި ހުންނާނެ ކުއްޖެއް ކަމާ ދޭތެރޭގައި ޝައްކެއް ނުކުރައްވާ ކަމަށްވެސްވިދާޅުވިއެވެ. ޤައުމު ބިނާ ކުރުމާއި، ޤައުމުގެ އެއްބައިވަންތަކަން ދެމެހެއްޓުމާއި، ނުބައި ކަންކަމުން އެހެން ކުދިން ދުރަށްލުމަށް އިސްނަގައިގެން މަސައްކަތް ކުރުމަކީ، ކުޅިވަރުގެ ދާއިރާއިން ޤައުމަށް ޚިދުމަތް ކުރުމަށް ލިބޭ ފުރުޞަތުތަކުގެ ތެރެއިން ހިމެނޭ ފުރުޞަތުތަކެއް ކަމުގައިވެސް ވިދާޅުވިއެވެ.

އެމަނިކުފާނު ވިދާޅުވީ ކުޅިވަރު ކުޅުމަކީ ހުސް ވަގުތުތަކެއް ފުރާލުންނޫން ކަމަށެވެ. އެއީ ޤައުމު ބިނާ ކުރުމުގައި ވަރަށް މުހިންމު ރުކުނެއް ކަމުގައިވެސް ރައީސުލްޖުމްހޫރިއްޔާ ވިދާޅުވިއެވެ. ކުޅިވަރަކީ އިންސާނާއަށް ޤައުމު ބިނާކުރަން ބޭނުންވާ، އަދި ކުޅިވަރުގެ ބޭރުން ދަތުރުކުރަން ބެނުންވާ ރާސްތާއަކަށް ދަތުރުކުރުމަށް ވަރަށް ގިނަ ފިލާވަޅުތަކެއް ލިއްބައިދޭ ކަމެއް ކަމުގައިވެސް ވިދާޅުވިއެވެ.

ޤައުމު ބިނާ ކުރަން ބޭނުންވާ އެއްބައިވަންތަކަމުގެ ރޫޙާއި، ވާދަވެރިކަމުގެ ރޫޙާއި، ކުރިއަށް ދިއުމުގައި ހުރި ހިތްވަރާއި، އެ މީހަކަށް ދަސްވެފައިހުރި ތަމްރީނެއްގެ ބޭނުން ޢަމަލީގޮތުން ހިފުމަކީ، ކުޅިވަރުން ނަގައިދޭ ވަރުގަދަ ފިލާވަޅުތައް ކަމުގައިވެސް އެމަނިކުފާނު ވިދާޅުވިއެވެ.

އެމަނިކުފާނު ވިދާޅުވީ ޤައުމު ކުރިއަށް ގެންދެވޭނީ ޒުވާނުންގެ ހަކަތައިގައި ހުރި ބާރުމިނެއް ޒުވާނުން ދައްކައިގެން ކަމަށެވެ. އެ ހަކަތަ ޒުވާނުންގެ ކިބައިން ސަރުކާރަށް ފެނިވަޑައިގަންނަވާނަމަ، ޒުވާނުންނަށް މި ސަރުކާރުން ކޮށްދެއްވަން ހުރި ކަންތައްތަކަކީ އަގު ނުކުރެވޭނެ، ހުސްނުވާވަރުގެ ކަންތައްތައް ކަމުގައިވެސް ރައީސުލްޖުމްހޫރިއްޔާ ވިދާޅުވިއެވެ. ޒުވާނުންގެ ކުރިމަގު އުޖާލާ ވުމަކީ ޤައުމުގެ ކުރިމަގު އުޖާލާވުން ކަމަށާއި، ޒުވާނުން ހަމަޖެހިގެން އުޅުމަކީ ރާއްޖޭގެ މުސްތަޤްބަލު ހަމަޖެހިގެން ދިއުންކަމުގައިވެސް އެމަނިކުފާނު ވިދާޅުވިއެވެ.