ފާއިތުވިއަހަރަކީ ކުށަށްއަރައިގަންނަ ނިސްބަތް ދަށްކުރެވުނު އަހަރެއް- ސީޕީ

ނިމިގެންދިޔަ 2014 ވަނަ އަހަރަކީ ކުށަށް އަރައިގަންނަ ނިސްބަތް ވަރަށް ބޮޑަށް މަދުކުރެވުނު އަހަރެއް ކަމަށް ކޮމިޝަނަރއޮފް ޕޮލިސް (ސީޕީ) ޙުސައިން ވަޙީދު ވިދާޅުވެއްޖެއެވެ.

މީލާދީ އައުއަހަރާ ގުޅިގެން ޕޮލިސް ލައިފްގައި ހާމަކުރައްވާފައިވާ ބަޔާނެއްގައި ސީޕީ ވިދާޅުވެފައިވަނީ ކުށަށްއަރައިގަތުން މަދުކުރެވިފައިވަނީ ފުލުހުންގެ އެކިރޭންކުތަކުގައިތިބި މީހުންގެ ބުރަމަސައްކަތުން ކަމަށެވެ.

ފުލުހުންގެ "އެކި ރޭންކުތަކުގައި ތިބި އެންމެހާ ފުލުހުންނާ މުވައްޒަފުން މުޖުތަމަޢުގެ އެކިއެކި ފަރާތްތަކާ ގުޅިގެން ރާއްޖޭގެ އެކި ކަންކޮޅުތަކުގައި ކުރި ހަރުދަނާ އަދި އަގު ނުކުރެވޭފަދަ ބުރަ މަސައްކަތުން ވަނީ ކުށަށް އަރައިގަންނަ ނިސްބަތް ވަރަށް ބޮޑުތަން ދަށްކުރެވިފައެވެ."

މިނަތީޖާއަށް ބަލައި "މިފެށޭ އަހަރަކީ މިއަހަރަށްވުރެ ޖޯޝާއި ފޯރިއާއެކު ގިނަ ގުނަ މަސައްކަތްތަކެއް ކުރާނެ އަހަރެއް ކަމުގައި ދިވެހި ފުލުހުން ޢަޒުމް ކަނޑައަޅައިގެން ތިބި ކަމުގެ ޔަޤީންކަން ލޮބުވެތި ރައްޔިތުންނަށް އަރުވަމެވެ." ސީޕީ ވިދާޅުވެފައިވެއެވެ.

އަލަށް ފެށުނު އަހަރުވެސް ފުކުހުންކުރާނެ އެންމެ މުހިންމު މަސައްކަތަކީ ރައްޔިތުންނަށް ސަލާމަތާއި ރައްކާތެރިކަން ކަށަވަރުކޮށް ޤައުމުގައި ޞުލްޙަ މަސަލަސްކަން ޤާއިމް ކުރުން ކަމަށްވެސް ކޮމިޝަނަރ ވިދާޅުވެފައިވެއެވެ. އެކަން ފިސާރި ސާބިތުކަމާއެކު ކުރުންމަތީ ފުލުހުން ދެމިތިއްބަވާނެ ކަމަށްވެސް އެމަނިކުފާނު ވިދާޅުވެފައިވެއެވެ.

"ޤާނޫނު ނަގަހައްޓައި، ކުށުގެ ނުރައްކަލުން ޤައުމު ސަލާމަތްކޮށް، ޖުވާންޖީލު ބިނާ ކުރުމުގެ މަސައްކަތުގައި ފުލުހުންގެ ސަފުތައް ބަދަހިކަމާއެކު މިފެށޭއަހަރުވެސް ރުކުރުވާލެވިފައި އޮންނާނެކަމުގައި ދަންނަވަމެވެ." ސީޕީ ވިދާޅުވެފައިވެއެވެ.

މީލާދީ އައު އަހަރަކާ ކުރިމަތިލިއިރު ކޮންމެ މީހަކުވެސް އިސްކަންދޭންޖެހޭނީ ސަލާމަތާ ރައްކާތެރިކަމާއެކު "މިލޮބުވެތި ދިވެހި ޤައުމުގައި މިނިވަންކަމާއެކު އުޅުމަށް ލިބިފައިވާ އަގުހުރި ފުރުޞަތު އެގޮތުގައި ދެމެހެއްޓުމަށް" ކުރަންޖެހޭ ކަންކަން ކުރުމަށް ކަމަށްވެސް ވިދާޅުވެފައިވެއެވެ. ސީޕީ ވިދާޅުވެފައިވަނީ ޤައުމުގެ ޒުވާނުން ނިކުންނަންވީ ޤައުމު ބިނާކޮށް، ޒިންމާދާރު ބައެއްގެ ގޮތުގައި ދެމިތިބުމަށް ކަމަށެވެ. އަދި ޤައުމު އާރާސްތު ކުރުމުގެ މަސައްކަތް ކުރުމަށެވެ. "ކުށުގެ ވެށިން ދުރުވެ، ކުށްވެރި ޢަމަލުތައް ޤައުމުގައި ހިނގުން މަދުކުރުމުގެ އެންމެ އިސް ސަފުގައި ތިބޭ ބަޔަކަށް ޒުވާނުން ވުމަށެވެ. ޒުވާނުންގެ ކުރިއެރުމަށް ކުރެވޭ ޤައުމީ މަސައްކަތް ބަލައިގަތުމަށެވެ."

ކޮމިޝަނަރ ވިދާޅުވެފައިވަނީ އެންމެން ގުޅިގެން މަަސައްކަތް ކުރަންވީ ދިވެހިންގެ ކިބައިގައިވާ މެހްމާން ދާރީ އަދާކުރުމާއި އެކުވެރި ކަމާއި އެއްބައިވަންތަކަމާއި އެއްބައެއް ވަންތަކަމުގެ ގުޅުންތައް ދެމެހެއްޓުމަށް ކަމަށެވެ. އަދި "ދުނިޔެމަތީގެ ސުވަރުގެ ގޮތުގައި ފަތުރުވެރިން ސިފަކުރާ މި ލޮބުވެތި ޤައުމުގެ އިޖުތިމާޢީ ފޭރާން ވަރުގަދަކޮށް ދުނިޔޭގެ އެންމެ ޞުލްޙަވެރި ޤައުމުގެ ގޮތުގައި ހެދުމުގެ މަސައްކަތް އިތުރު ކުރުމަށެވެ."

ޤައުމަށް ތަރައްގީއާއި ކުރިއެރުން ލިބޭނީ ޞުލްޙަ މަސަލަސްކަން ޤާއިމްވެ ދެމި އޮވެގެން ކަމަށްވެސް ސީޕީ ވިދާޅުވެފައިވެއެވެ. ޞުލްޙަ މަސަލަސްކަމާއި އަމާން ކަމަށް ހުރަސްއެޅޭފަދަ އެއްވެސް ޢަމަލެއް ދުވަހެއްގައިވެސް ނުކުރުމަށް ސީޕީވަނީ ރައްޔިތުންނަށް އިލްތިމާސް ކުރައްވާފައެވެ.