އިގްތިސާދަށް ހުރަސްއެޅޭފަދަ ހަރަކާތްތައް ހުއްޓުވާނަން-ސަލާމާތީ ބާރު

ރާއްޖޭގެ އިގްތިސާދަށް ހުރަސްއެޅޭނެ ފަދަ ގޮތަކަށް ހިންގާ ތަފާު ހަރަކާތަތްއް ހުއްޓުވުމަށް ފަސް ނުޖެހޭނެ ކަމަށް އެމްއެންޑީއެފްއާއި ޕޮލިހުން މިއަދު ބުނެފިއެވެ.

އެމްއެންޑީއެފްއާއި، ފުލުހުން ގުޅިގެން މިއަދު ނެރެފައިވާ ބަޔާނުގައި ބުނެފައިވަނީ އެފަދަ ހަރަކާތްތައް ހުއްޓުވުމަށް ކުރަން ޖެހުނު ކޮންމެ ކަމެއްވެސް ކުރައްވާނެ ކަމަށާއި އެކަމަށް ފަސްނުޖެހޭނެ ކަމަށެވެ.

އިސްކަންދަރުކޮށީގައި ނޫސްވެރިންގެ ހާޒިރުގައި ސަލާމަތީ ބާރުތަކުގެ ފަރާތުން ބަޔާން އިއްވަމުން އެމްއެންޑީއެފްގެ ތަރުޖަމާނު މޭޖެ ޙުސައިން ޢަލީ ވިދާޅުވީ ރާއްޖޭގެ އިގްތިސާދަށާއި، ހަމަޖެހުމަށް ބުރޫއަރާފަދަ އެއްވެސް ކަމެއް ކޮށްގެން ނުވާނެ ކަމަށް އިލްތިމާސް ކުރައްވާ ކަމަށެވެ.

ރާއްޖޭގެ ހަމަޖެހުމާއި އަމާންކަން ނަގައިލުމަށް ކުރަމުންދާ މަސައްކަތް ބަލައި ތަހުގީގު ކުރައްވާނެ ކަމަށްވެސް އެބަޔާނުގައި ބުނެފައިވެއެވެ.

"ޤައުމުގެ ސުލްހަމަސަލަސް ކަމަށް ހުރަސްއެޅޭ ގޮތަށް ހިންގާ އެންމެހައި ހަރަކާތްތައް ބަލައި ތަހުގީގުކޮށް، އަޅަންޖެހޭ ފިޔަަވަޅުތައް އަޅަމުން ގެންދާނެ ކަމުގެ ޔަގީންކަން މި ފުރުސަތުގައި ވެސް ލޮބުވެތި އެންމެހާ ދިވެހި ރައްޔިތުންނަށް އަޅުގަނޑުމެން އަރުވަން،" ޙުސައިން ޢަލީގެ އިއްވި ބަޔާނުގައި ބުނެފައިވެއެވެ. ސަލާމަތީ ބާރުތަކުން ހިންގާ މިފަދަ ހަރަކާތްތަކުގައި މިހާރެކޭ އެއްފަދައިން ރައްޔިތުންގެ އެއްބާރުލުން ކުރިއަށްއޮތްތާގައިވެސް ބޭނުންވާ ކަމަށް ބަޔާނުގައި ބުނެފައިވެއެވެ.

އެކިބޭނުންތަކަށް ރާއްޖެއަށް ޒިޔާރަތްކުރާ މެހުންނާއި، އިއްޒަތްތެރިންގެ ލިބެންވާ ރައްކާތެރިކަން ކަށަވަރު ކޮށްދިނުމަކީ ސަލާމަތީ ބާރުތަކުން ކުރަންޖެހޭނެ ކަމެއް ކަމަށްވެސް ބުނެފައިވެއެވެ.

ރާއްޖެ އަމާން ގައުމެއްގެ ގޮތުގައި ބޭއްވުމަށް ކުރަންޖެހުނު ކޮންމެކަމެއް ކުރުމަށް ސަލާމަތީ ބާރުތަކުން ފަސްނުޖެހޭނެ ކަމަށްވެސް ބަޔާނުގައި ބުނެފައިވެއެވެ.