ސިޓީއެއްގެ ފެންވަރަށް އައްޑޫ ތަރައްގީ ކޮށްދޭނަން-މިނިސްޓަރ ތާރިގު

އެމްޑީޕީ ސަރުކާރުން އައްޑުއަށް ސިޓީއެއްގެ ދަރަޖަ ދީފައިވަނީ ނަމަކުން ކަމަށާއި، މިސަރުކާރުން އައްޑޫ، ސިޓީއެއްގެ ފެންވަރަށް ތަރައްގީ ކޮށްދެއްވާނެ ކަމަށް އެންވަޔަރަންމަންޓް އެންޑްއިނަޖީ މިނިސްޓަރ އިބްރާހީމް ތާރިގު މިރޭ ވިދާޅުވެއްޖެއެވެ.

އައްޑޫ ސިޓީ ހުޅުމީދުގައި މިހާރު ކުރިއަށްދާ ޖަލްސާގައި ވާހަކަފުޅު ދައްކަވަމުން ތާރިގު ވިދާޅުވީ މިސަރުކާރުން މަސައްކަތް ކުރައްވަނީ ވީހާވެސް އަވަހަކަށް ރައްޔިތުންނަށް ގާތުން ޚިދުމަތް ދެއްވަން ކަމަށެވެ.

އެގޮތުން 24 ގަޑިއިރުގެ ކަރަންޓުގެ ޚިދުމަތް އައްޑޫ ރައްޔިތުންނަށް ޔަގީން ކަމާއެކު ލިބޭނެ ގޮތް އަންނައަަހަރު ހަމަޖައްސަވައިދެއްވާނެ ކަމަށެވެ. އަދި ފެނާއި ނަރުދަމާގެ ނިޒާމް ވަރަށް އަވަށް ގާއިމްކޮށްދެއްވާނެ ކަމަށްވެސް ވިދާޅުވިއެވެ. މީގެ އިތުރަށް ރައްކާތެރި ކަމާއެކު ކުނި ނައްތާލުމުގެ ނިޒާމްވެސް ގާއިމް ކޮށްދެއްވާނެ ކަމަށް އެމަނިކުފާނު ވިދާޅުވިއެވެ.

އައްޑޫ ރައްޔިތުންނަށް ކުރިއަށްއޮތީ އުފާފާގަތި ދުވަސްތަކެއް ކަމަށްވެސް އެމަނިކުފާނު ވިދާޅުވިއެވެ.

މި ޖަލްސާގައި ރައީސް ޔާމީންވަނީ ހުޅުމީދޫގައި އަޅާ މިފްކޯ ފިޝަރީޒް ކޮމްޕްލެކްސް ގެ އަމަލީ މަސައްކަތް ފަށްޓަވައި ދެއްވާފައެވެ. އެތަނަކީ ދުވާލަކު 100 ޓަނުގެ މަސް ފްރީޒް ކޮށްލެވޭ ތަނެކެވެ. އަދި ދުވާލަކަށް 50 ޓަނުގެ އައިސްވެސް ވިއްކޭނެ ކަމަށް މިފްކޯއިން ބުނެފައިވެއެވެ. އަދި 50 ޓަނުގެ ފެނާއި، 200 ޓަނުގެ ތެޔޮވެސް ރައްކާކުރެވޭނެ ކަމަށް މިފްކޯއިންވަނީ ބުނެފައެވެ. އަދި އެތަނަކީ 1500 ޓަނުގެ މަސް ރައްކާކުރެވޭ ކޯލްޑްސްޓޯރޭޖެއްވެސް ގާއިމް ކުރެވިގެންދާނެ ތަނެއް ކަމަށް ހާމަކޮށްފައިވެއެވެ.

ރައީސް ޔާމީން މިރޭވަނީ އައްޑޫސިޓީގައި ފެނަކައިން ގާއިމްކޮށްދޭ ފެނުގެ ނިޒާމް އިފްތިތާހު ކޮށްދެއްވާފައެވެ.