ސިޔާސީ ގޮތުން ހިޔާލު ތަފާތުވިއަސް އެއްބައިވަންތަކަމާއެކު މަަސައްކަތްކުރަންޖެހޭ: ރައީސް
26 ޑިސެމްބަރ 2014 0:11
ސިޔާސީ ގޮތުން ހިޔާލު ތަފާތުވިއަސް ދިވެހިން އެއްބައި ވަންތަކަމާއެކު މަސައްކަތްކުރަންޖެހޭ ކަމަށް ރައީސުލްޖުމްހޫރިއްޔާ އަބްދުﷲ ޔާމިން ވިދާޅުވެއްޖެއެވެ.
ގައުމީ ދުވާ ގައުމީ އެއްބައިވަންތަކަމުގެ ދުވަސް ފާހަގަކުރުމުގެ ގޮތުން މިރޭ ދަރުބާރުގޭގައި ބޭއްވި ޖަލްސާގައި ވާހަކަ ދައްކަވަމުން ރައީސް ޔާމިން ވިދާޅުވީ، އެންމެން ގުޅިގެން މަސައްކަތް ނުކޮށްފިނަމަ ދިވެހިންގެ އެއްބައިވަންތަކަން ނުހިފެހެއްޓޭނެކަމަށެވެ.
"އެއްބައިވަންތަކަން ހިފެހެއްޓޭނީ އެންމެން ގުޅިގެން މަސައްކަތްކޮށްގެން. ސިޔާސީ ގޮތުން ހިޔާލުތަފާތުވުންތަކެއް ހުއްޓަސް އެއްބައިވަންތަކަށް ދެމެހެއްޓުމަށް އެންމެން ގުޅިގެން މަސައްކަތްކުރަންޖެހޭ. ސިޔާސީ ހިޔާލު ތަފާތުވުންތަކާ އެކު ވެސް އާއްމުކޮށް އެއްބަސްވެވޭ ކަންކަމުގައި، ގުޅިގެން ކުރިއަށް ނުދެވެންވީ ސަބަބެއް ނެތް،" ރައީސް ޔާމިން ވިދާޅުވިއެވެ.
ސުނާމީ ކާރިސާއާއި ގުޅޭގޮތުން ވެސް ރައީސް ވާހަކަ ފުޅުދެއްކެވިއެވެ. ރައީސް ވިދާޅުވީ، ސުނާމީގައި ފަޅުވި ރަށްތައް އާބާދުކޮށް، ގެދޮރު ގެއްލުނު މީހުންނަށް ދާއިމީ ހިޔާވަހިކަން ހޯދަން އެކި ސަރުކާރުތަކުން ބުރަ މަސައްކަތްތަކެއް ކޮށްފައިވާކަމަށެވެ.
"ސުނާމީ ކާރިސާ އަށް މާދަމާ 10 އަަހަރު ފުރޭއިރު ވަގުތީ ހިޔަލުގައި ހިތްދަތިކަމާ އެކު އެއްވެސް ރައްޔިތަކު މިހާރު ދިރިނޫޅޭނެ. މާދަމާގެ ނިޔަލަށް 50 ހަކަށް ގެ ފިޔަވައި ނުނިމި ހުރި ގެތައް އެ ގެތަކުގެ ވެރިންނާ ހަވާލުކުރެވޭނެ. ދެން ހުރި ގެތައް ﷲގެ ހެޔޮ ރަހުމަތާ އެކީ މި ޑިސެމްބަރު މަސް ނިމުމުގެ ކުރިން މަސައްކަތް ނިމިގެންދާނެ،"
ރައީސް ވިދާޅުވީ މުޖުތަމައުގެ އެއްވެސް މީހެއްގެ ހައްގަކަށް އަރައިގަތުމަކީ ކޮށްގެން ވާނެ ކަމެއް ނޫން ކަމަށެވެ.
"ނުބައި ކަންތައްތަކުގެ މައްޗަށް ރަނގަޅު ކަންކަން އިސްކުރަން ޖެހޭ،" ކަމަށް ވެސް ރައީސް ވިދާޅުވިއެވެ.
ކިޔުންތެރިންގެ ހިޔާލު