ތެލެސީމިއާފަދަ ކުދިންނަށް އެހީވުމަށް ވިޔަފާރިވެރިންނާއި ކުންފުނިތަކަށް ރައީސް ގޮވައިލައްވައިފި
24 ޑިސެމްބަރ 2014 23:25
މިއަދުގެ ރަސްމިއްޔާތުގައި ރައީސް ޔާމީން ވާހަކަފުޅު ދައްކަވަނީ- ފޮޓޯ ރައީސް އޮފީސް
ތެލެސީމިއާ ކުދިންފަދަ، މުޖުތަމަޢުން ހަވާސާވެގެންދާ ކުދިންނަށް އެހީވެދިނުމަށް، ދިވެހި ވިޔަފާރިވެރިންނަށާއި، ސަރުކާރުގެ ކުންފުނިތަކަށް ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމް އިލްތިމާސް ކުރައްވައިފިއެވެ.
ރައީސުލްޖުމްހޫރިއްޔާ މިކަމަށް އިލްތިމާސް ކުރެއްވީ، ބޯންމެރޯ ޓްރާންސްޕްލާންޓް ހެދުމަށް ޑޯނަރެއް ހަމަޖެހިފައިވާ ފަރާތްތަކަށް ޒަކާތު ފަންޑުގެ ފަރާތުން ދެއްވާ އެހީ ހަވާލުކުރުމަށް އިސްލާމީމަރުގައި މިއަދު ބޭއްވެވި ރަސްމިއްޔާތުގައި ވާހަކަފުޅު ދައްކަވަމުންނެވެ.
ރައީސް އޮފީހުން ހާމަކުރައްވާފައިވާ ގޮތުގައި މިއަދުގެ ރަސްމިއްޔާތުގައި 34 ފަރާތަކަށް ވަނީ އެހީ ހަވާލުކޮށްދެއްވާފައެވެ. އެހީ ހަވާލުކޮށްދެއްވީ ރައީސުލްޖުމްހޫރިއްޔާ ޢަބްދުﷲ ޔާމީނެވެ.
ރައީސް ވިދާޅުވީ މިފަދަ ފަންޑުތަކަށް އެހީވެދެއްވައި، އަމިއްލަ ޙަޔާތް ނުފެށި، ނާއުއްމީދުގެ ތެރޭގައި ތިބެންޖެހޭ ފަދަ ޞިއްޙީ ހާލަތެއް މެދުވެރިވެފައިވާ ކުދިންނަށް އެހީވެދޭންޖެހޭ ކަމަށެވމި ސަރުކާރުން މަސައްކަތްކުރައްވަނީ، މުޖުތަމަޢުން ހަވާސާ ވެގެންދާ، ޚާއްޞަ އަޅާލުން ބޭނުންވާ މިފަދަ ކުދިންނަށް އެކުދިންގެ ޙަޔާތް ބާއްޖަވެރިކުރެވޭނެ ގޮތްތަކެއް ތަނަވަސްކޮށްދެވޭތޯ ކަމަށްވެސް ވިދާޅުވިއެވެ. އިޖްތިމާޢީ މިފަދަ ކަންކަން ޢާންމުންގެ ސަމާލުކަމަށް ގެނައުމަށް ސަރުކާރުން ކުރައްވަމުންގެންދަވާ ކަންކަމާބެހޭގޮތުންވެސް ރައީސް ވާހަކަފުޅު ދެއްކެވިއެވެ.
އެމަނިކުފާނު ވިދާޅުވީ ސަރުކާރުގެ މިފަދަ މަސައްކަތްޕުޅުތަކަށް ވަރަށް ބޮޑެތި ތަރުހީބު ލިބެމުންދާކަމަށެވެ. ޚާއްޞަ އެހީއަށް ބޭނުންވާ ކުދިންގެ ތެރެއިން ވަޒީފާގެ މައިދާނަށް ނުކުންނަން ތައްޔާރަށް ތިބި ކުދިންނަށް ސަރުކާރުގެ ކުންފުނިތަކުން ވަޒީފާގެ ފުރުޞަތު ތަނަވަސްކޮށްދެއްވާފައިވާކަމަށްވެސް ވިދާޅުވިއެވެ.
ރައީސުލްޖުމްހޫރިއްޔާވަނީ ޒަކާތު ފަންޑަށް އެހީތެރިވެވަޑައިގެންދެއްވި ހުރިހާ ފަރާތްތަކަށް ޝުކުރުއަދާ ކުރައްވާފައެވެ. އަދި އެކަމުގެ މަތީގައި ދެމިތިއްބެވުމަށް ވެސް އެދިވަޑައިގެންނެވިއެވެ.
ކިޔުންތެރިންގެ ހިޔާލު