ރާއްޖޭގެ ތަރައްގީއަށް އަބަދުވެސް އެހީތެރިކަން ދޭނަން- އދ

ރާއްޖޭގެ ތަރައްޤީއަށް ދިމާވާ ‏‏ގޮންޖެހުންތަކުން އަރައިގަތުމަށް ‏ރާއްޖެއަށް ‏‏އަބަދުވެސް އ.ދ.ގެ އެހީތެރިކަން ލިބެމުންދާނެ ކަމުގެ ‏‏ޔަޤީންކަން ދެއްވިއެވެ.

އ.ދ. ގެ ފަރާތުން މިޔަގީންކަން ރާއްޖެއަށް ދެއްވީ އެތަނުން ރާއްޖެއަށް ރާއްޖެއަށް ކަނޑައަޅުއްވާފައި ހުންނަވާ ރެޒިޑެންޓް ‏‏ކޯޑިނޭޓަރ މިސް ޝޯކޯ ‏‏ނޯޑާ އެއެވެ. އެކަމަނާ ރައީސުލްޖުމްހޫރިއްޔާގެ ނާއިބު ޑޮކްޓަރ މުޙައްމަދު ޖަމީލް އަޙްމަދުގެ އަރިހަށް މިއަދު ކުރެއްވި އިޙްތިރާމުގެ ‏‏ޒިޔާރަތުގައި ވިދާޅުވެފައިވަނީ ރާއްޖޭގެ ތަރައްގީއަށް އަބަދުވެސް އ.ދ އިން އެހީތެެރިވަމުން ގެންދާނެ ކަމަށެވެ.

މިއަދު ހެނދުނު ރައީސުލްޖުމްހޫރިއްޔާގެ އޮފީހުގައި އޮތް މި ބައްދަލުކުރެއްވުމުގައި، ނާއިބު ރައީސް ޑޮކްޓަރ ޖަމީލް ވަނީ މިހާރުވެސް ރާއްޖޭގެ ތަރައްޤީއަށް އ.ދ.ގެ ފަރާތުން ‏‏‏ލިބެމުންދާ އެހީތެރިކަމާއި އެއްބާރުލެއްވުމަށް ‏‏ޝުކުރުއަދާކުރައްވާފައެވެ.

‏ޑރ. ޖަމީލް ވިދާޅުވެފައިވަނީ ‏‏އިޖްތިމާޢީ އަދި ޝަރުޢީ ދާއިރާތަކުގެ އޮނިގަނޑު އިސްލާޙުކޮށް، އިތުރަށް ހަރުދަނާ ކުރެއްވުމަށްޓަކައި ‏‏ސަރުކާރުން ކުރައްވަމުން ގެންދަވާ މަސައްކަތުގައި އ.ދ. ގެ އެހީތެރިކަން ބޭނުންވާ ކަމަށެވެ. އަދި އެކަމަށް ދެބޭފުޅުން މިއަދުވަނީ މަޝްވަރާ ކުރައްވާފައެވެ.

ޖިނާޢީ އަދުލުގެ ނިޒާމް ހަރުދަނާކުރެއްވުމަށާއި، އަންހެނުން ‏‏ބާރުވެރިކޮށް، ކުޑަކުދިންގެ ޙައްޤުތައް ރައްކާތެރިކޮށްދެއްވުމަށް ސަރުކާރުން ކުރައްވާ ‏‏މަސައްކަތްޕުޅުތަކާ ބެހޭ މަޢުލޫމާތު މިބައްދަލުވުމުގައި އެމަނިކުފާނުވަނީ ރެސިޑެންޓް ކޯޑިނޭޓަރަށް އަރުވާފައެވެ. ‏ ‏