އެހެންދީންތަކުގެ ޢީދުތައް މުސްލިމުން ފާހަގަކުރުން ހުއްދައެއްނޫން-ޢަދާލަތު

ޣައިރު މުސްލިމުންގެ އާދަކާދައާއި ޢީދުތައް މުސްލިމުން ފާހަގަކުރުމަކީ ހުއްދަ ކަމެއް ނޫންކަމަށް ޢަދާލަތުޕާޓީން ބުނެފިއެވެ.

އެޕާޓީގެ ޢިލްމުވެރިންގެ މަޖިލީހުނެ ނެރެފައިވާ ބަޔާނެއްގައި ބުނެފައިވަނީ މިނިފޫހިފިލުވުމާއި، ކުޅިވަރުގެ ހަރަކާތްތަކަކީ ވަކި ހުދޫދެއްގެ ތެރޭގައި ހުއްދަ ކަމެއް ކަމަށެވެ.

އެޕާޓީން މިބަޔާން ނެރެފައިވަނީ އާއަހަރު ފެށުމަށާއި، ކްރިސްމަސް ފާހަގަކުރަން ބައެއް ރިސޯޓުތަކުގައި ހަރަކާތްތަކެއް ކުރިއަށް ގެންދާ ދަނޑިވަޅެއްގައެވެ. ކްރިސްމަސް ފާހަގަ ކުރަން ބޭނުންކުރާ ބުދުތަކެއް ކަމަށް ބެލެވޭ ބުދުތަކެއްވެސް ކަސްޓަމްސްއިން ރޭ ވަނީ އަތުލައިގެންފައެވެ.

ޢަދާލަތުޕާޓީން ބުނެފައިވަނީ ރާއްޖެއަށް ޒިޔާރަތްކުރާ ޣައިރު މުސްލިމުންނަށް އިހްސާންތެރިވުމާއި، ހެކޮށްހިތުމާއި، އެމީހުންގެ ފުރާނައާއި، މުދާ ހިމާޔަތް ކުރުމަކީ އިސްލާމްދީނުގައި މުސްލިމުންނަށް އަމުރުކުރައްވާފައިވާ ކަމެއް ކަމަށެވެ. ނަަމަވެސް އެމީހުން ފާހަގަކުރާ ދުވަސްތަކާއި އާދަކާދަތައް ފާހަކުރުމާއި، ބައިވެރިވުމާއި، އެފަދަކަންކަމުގައި ބައިވެރިވުމަށް ހިތްވަރު ދިނުމަކީވެސް ކޮށްގެންވާނެ ކަމެއް ނޫންކަމަށެވެ. ޣައިރު މުސްލިމުންގެ ފާހަގަކުރާ އެފަދަ ކަންކަމުގެތެރެއަށްވަދެ އެކަންކަމުގައި ބައިވެރިވާ މީހުންނަކީ އެމީހުންގެ ތެރެއިންވާ މީހުންކަމަށް ރަސޫލާ ޙަދީސް ކުރައްވާފައިވާ ކަމަށްވެސް އެބަޔާނުގައި ބުނެފައިވެއެވެ.

ޣައިރު މުސްލިމުންނާއި، މުސްލިމުން ތަފާތުކޮށްދޭ ދީނީ އަދި އިޖުތިމާޢީީ ދެ މުނާސަބަތަކީ ފިޠުރު ޢީދާއި އަޟްޙާ ޢީދު ކަމަށްވެސް ބުނެފައިވެއެވެ.