މިނިވަންކަން ވާސިލް ކުރުމުގެ އަޒުމް އާކުރުމަށް ރައީސް އިލްތިމާސް ކުރައްވައިފި

އަންނަންއޮތް ޖީލުތަކާ ހަމައަށް މިނިވަންކަން ވާސިލް ކުރުމުގެ އަޒުމް އާކުރުމަށް ރާއްޖޭގެ ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލް ޤައްޔޫމް ރާއްޖޭގެ ރައްޔިތުންނަށް އިލްތިމާސް ކުރައްވައިފިއެވެ.

އެމަނިކުފާނު މިކަމަށް އިލްތިމާސް ކުރައްވާފައިވަނީ ރާއްޖޭގެ ޤައުމީދުވަހުގެ މުނާސަބަތުގައި ދެއްވާފައިވާ ޚިތާބުގައެވެ.

އެމަނިކުފާނުގެ ޚިތާބުގައި ވިދާޅުވެފައިވަނީ ޤައުމީ ދުވަސް ފާހަގަކުރަމުންދާއިރު ޤައުމާއި ދީނުގެ ޙައްޤުގައި ބޮޑުތަކުރުފާނާއި އަދި އެހެން ޤައުމީ އަބްޠާލުން ކުރެއްވި މަތިވެރި ޖިހާދުން ހިތްވަރު ލިބިގަންނަން ޖެހޭ ކަމަށެވެ. އަދި "މި މިނިވަންކަން އަމާނާތްތެރިކަމާއެކު އަންނަން އޮތް ޖީލުތަކާ ހަމައަށް ވާޞިލުކޮށްދިނުމުގެ ޢަޒުމު އާކުރެއްވުމަށް، ރާއްޖޭގެ މި ފަޚުރުވެރި ޤައުމީ ދުވަހުގެ މުނާސަބަތުގައި، ރާއްޖޭގެ ލޮބުވެތި ރައްޔިތުންނަށް އަޅުގަނޑު އިލްތިމާސް ކުރަމެވެ."

ރައީސް ވިދާޅުވެފައިވަނީ ޤައުމީ ދުވަހަކީ، މިނިވަންކަން ދެމެހެއްޓުމުގެ ރޫޙު އަލުން އާކޮށް، އާލާކުރަންވީ ދުވަހެއް ކަމަށެވއެދުވަހު ބޮޑުތަކުރުފާނު ކުރެއްވި ޖިހާދަކީ، ދިވެހި ޤައުމަށްޓަކައި އެ ތަކުރުފާނުގެ ހިތްޕުޅުގައި އޮތް މަތިވެރި ލޯތްބާއި އިޙްތިރާމް ސާބިތުވެގެންދިޔަ މާތް ތާރީޚީ ޖިހާދެއް ކަމަށްވެސް ވިދާޅުވެފައިވެއެވެ. "އެއީ، ޤައުމު ދެކެ ނުހަނު ލޯބިވާ ކޮންމެ ދިވެހި ދަރިއަކުވެސް އުފަލާއި ޝުކުރުވެރިކަމާއެކީ ބަލައިގަންނަންޖެހޭ މަތިވެރި ޤައުމީ ޚިދުމަތެއް،" ކަމަށްވެސް ވިދާޅުވެފައިވެއެވެ.

ޤައުމީ ދުވަހުގެ ޒިކުރާ އާކުރަމުންދާއިރު، ދުވަހުގެ ބަޠަލު އައްސުލްޠާނުލްޣާޒީ މުޙައްމަދު ތަކުރުފާނުލް އަޢުޒަމް ނުވަތަ ބޮޑުތަކުރުފާނު، އިސްލާމްދީނާއި، ޤައުމުގެ މިނިވަންކަމާއި، އިސްތިޤްލާލުގެ ދިފާޢުގައި ކުރެއްވި ތާރީޚީ ޖިހާދުގެ މަތިން ހަނދާންކުރަން ޖެހޭ ކަމަށްވެސް ރައީސް ވިދާޅުވިއެވެ.

ރާއްޖޭގެ ޤައުމީދުވަހަކީ ރަބީޢުލް އައްވަލްމަހުގެ ފުރަތަމަ ދުވަހެވެ.