ސްޕްރީމްކޯޓުގެ ފަނޑިޔާރުން މަދުކުރުމަށް ބިލްހުށަހެޅި ޝަރީފާމެދު ފިޔަވަޅު އަޅަންޖެހޭ- ޝިފާޒު

ސްޕްރީމްކޯޓުގެ ފަނޑިޔާރުންގެ ބެންޗު 7 އިން 5 އަށް މަދު ކުރުމަށް ރައްޔިތުންގެ މަޖިލީހަށް ބިލް ހުށަހެޅުއްވި އެމްޑީޕީގެ މަރަދޫ ދާއިރާގެ މެންބަރު މުޙައްމަދު ޝަރީފާ މެދުވެސް ފިޔަވަޅު އަޅަންޖެހޭ ކަމަށް އެމްޑީޕީގެ ނާއިބް ރައީސް އަދި އެޕާޓީގެ ފިޔަވަޅުއަޅާ ކޮމިޓީގެ މުގައްރިރު މުޙައްމަދު ޝިފާޒު ވިދާޅުވެއްޖެއެވެ.

ޝަރީފުގެ އެބިލުގެ ސަބަބުން އުއްތަމަ ފަނޑިޔާރު އަމަދު ފާއިޒް ޙުސައިނާއި ފަނޑިޔާރު މުޢުތަސިމް ޢަދުނާންވަނީ ފަނޑިޔާރު ކަމުން ވަކިކުރައްވާފައެވެ. އެމްޑީޕީން ބުނެފައިވަނީ މަޖިލީހުގެ އެނިންމުމަކީ ޤާނޫނާ ޚިލާފު ނިންމުމެއް ކަމަށެވެ.

އެމްޑީޕީ އޮފީހުގައި މިއަދު ބޭއްވި ނޫސްވެރިންގެ ބައްދަލުވުމެއްގައި ޝިފާޒު ވިދާޅުވީ ޝަރީފާމެދު ފިޔަވަޅު އެޅުމުގެ ކުރިން އެމްޑީޕީގެ ގައުމީމަޖިލީހުގެ ގަރާރަކުންވަނީ އެޕާޓީގެ ވިޕްލައިނާ ޚިލާފުވި މެމްބަރުންނާ ދެކޮޅަށް ފިޔަވަޅުއެޅުމަށް އެދިފައި ކަމަށެވެ.

ގައުމީ މަޖިލިހުން އަންގާފައިވަނީ 7 ދުވަސްތެރޭގައި އެމައްސަލަ ބަލައި ފިޔަވަޅުއެޅުމަށް ކަމަށް ޝިފާޒު ވިދާޅުވިއެވެ. އެހެން ކަމުން ޝަރީފާމެދު ފިޔަވަޅު އެޅުމުގެ ކުރިން ޕާޓީގެ ވެޕްލައިނާ ޚިލާފުވެފައިވާ މެންބަރުންނާ މެދު ފިޔަވަޅު އެޅުން އަވަސްކުރަންޖެހުނީ ކަމަށްވެސް ޝިފާޒު ވިދާޅުވިއެވެ.

ރައްޔިތުންގެ މަޖިލީހުގެ ބ.ރަށުދާއިރާގެ މެންބަރުކަން ކުރިން ކުރައްވާފައިވާ ޝިފާޒު ވިދާޅުވީ ޝަރިފާމެދު އަދި ފިޔަވަޅު ނޭޅިފައިނެތް ކަމަށެވެ.

ސުޕްރީމް ކޯޓުގެ ދެ ފަނޑިޔާރުން ވަކިކުރަން މިމަހުގެ 14 ވަނަ ދުވަހު މަޖީލީހުގައިނެގި ވޯޓުގައި ޕާޓީގެ ވިޕްލައިނާ 6 މެންބަރަކުވަނީ ޚިލާފުވެފައެވެ. އޭގެތެރެއިން ހުޅުހެންވޭރު ދާއިރާގެ މެންބަރ މޫސާ މަނިކުވަނީ ޕާޓީން ވަކިކުރައްވާފައެވެ. އަނެއް ފަސްމެންބަރުންނަށް އަންގާފައިވަނީ ޕާޓީގެ މެންބަރުންގެ ފަރާތުން މަޢާފަށްއެދި ޕާޓީއަށް ބަޔާނެއް ހުށަހެޅުމަށެވެ. އަދި އެމީހުންވަނީ ޕާޓީގެ ބައެއް ކަންކަމުން ވަކި މުއްދަތަކަށް ސަސްޕެންޑްވެސް ކުރައްވާފައެވެ.

ޝިފާޒު ވިދާޅުވެފައިވަނީ އެބިލް މަޖިލީހަށް ހުށަހެޅުމުން ބިލް އަނބުރާނެގުމަށް ޝަރީފަށް އެންގިކަމަށެވެ. އަދި އެބިލަކީ ޕާޓީގެ ސިޔާސަތާ އިދިކޮޅު ބިލެއް ކަމަށްވެސް އޭނާ ވިދާޅުވިއެވެ. އެމްޑީޕީގެ ޕީޖީ ގްރޫޕުގެ ތާއިދު އެބިލަށް ނުލިބޭނެ ކަމަށް ޝަރީފަށް އެންގި ކަަމަށްވެސް އެމްޑީޕީންވަނީ ބުނެފައެވެ.

ޝަރީފް އެބިލް ހުށަހެޅިޔަސް ބިލް ފާސްކުރަންވެސް އަދި ފަނޑިޔާރުން ވަކިކުރަންވެސް އޭނާ ވޯޓު ދެއްވާފައެެއް ނުވެއެވެ.